كۇنۇزاق شاعىن شەبەرحاناسىندا ۋاقىت وتكىزەتىن سۋرەتشى قىزدىڭ شىعارماشىلىق باعىتى وزگەشە. مايلى بوياۋدى كەنەپ بەتىندە ويناتىپ, كارتينا جازۋدى ەمەس, ەرتەگى جەلىسى بويىنشا يلليۋستراتسيا سالعاندى ۇناتادى. كىشكەنتاي بالالارعا ارنالعان كەيىپكەرلەردىڭ كەسكىن-كەلبەتىن كەلىستىرە جازادى. كەيدە ءوزى دە ەرتەگى قۇراستىرىپ, ونى ءتۇرلى-ءتۇستى سۋرەتپەن ارلەيدى.
كۇرشىم اۋدانىنىڭ تۋماسى گۇلسىم ەركىنقىزى وسكەمەندەگى ق.نۇرعاليەۆ اتىنداعى كوللەدجدىڭ سۋرەتشى-ديزاينەر فاكۋلتەتىندە ءبىلىم الىپ, كاسىبي سۋرەتشى بولىپ شىققان. كوللەدج باعدارلاماسىمەن عانا ەمەس, ءوزى قوسىمشا ىزدەنىپ, ءبىلىمىن ۇشتاي تۇسكەن. قازىر جەكە شىعارماشىلىعىمەن قاتار, سۋرەت ستۋدياسىندا شاكىرت تاربيەلەيدى. ايتۋىنشا, تسيفرلى ءداۋىردىڭ بالالارى ويلارىن ەركىن جەتكىزەدى, وزگەشە ويلايدى. سولاردىڭ ىشىنەن زاماننىڭ سۇرانىسىنا قاراي سۋرەتشىلەر شىقسا ەكەن دەيدى. تالانتتى سۋرەتشىنىڭ ويلاۋى دا, الىستى بولجاۋى دا وزگەشە ەكەن. اپپاق قاعازدى شيمايلاي وتىرىپ, اڭگىمەسىن وربىتكەن.
«سۋرەتشىلىكتى جان-جاقتى مەڭگەردىم. مايلى بوياۋمەن كارتينا دا جازا الامىن. بىراق بۇگىنگى جاستارعا, بالالارعا كەرەك دۇنيەمەن شۇعىلدانعىم كەلەدى. كەيىنگى جىلدارى جاستار اراسىندا كوميكس وقۋ سانگە اينالدى. ايتپاعىم, جاستارعا رۋحانياتىمىزدى كوميكس ستيلىندە ناسيحاتتاساق دەيمىن. مويىنداۋ كەرەك, ءتىپتى قازاق مەكتەپتەرىندەگى وقۋشىلار ورىسشا سويلەيدى. سەبەبى كىشكەنتايىنان اقپاراتتى ورىس تىلىندە سىڭىرگەن», دەيدى جاس سۋرەتشى.
ايتىپ وتىرعان يدەياسى ورىندى بولعانىمەن, ءبىر ادامنىڭ قولىنان كەلمەيدى. ول ءۇشىن كوماندا بولىپ جۇمىس ىستەلۋى كەرەك. قازاقتىلدى مۋلتفيلم, قازاقتىلدى بەينەروليكتەر دايىنداۋ قىرۋار كۇشتى قاجەت ەتەدى. دەسە دە, سۋرەتشى گۇلسىم شاما-شارقىنشا ەرتەگى كەيىپكەرلەرىن بەينەلەپ, بالدىرعاندارعا ۇسىنىپ ءجۇر. شاعىن ەرتەگىلەر جازىپ, سۋرەتپەن كومكەرەدى. العاشىندا اكەسىنە دەگەن ساعىنىشتان قولىنا قالام الىپ, «كىشكەنتاي پەرىشتە» اتتى ەرتەگى جازعان. وقيعا جەلىسى بويىنشا سەريالىق سۋرەتتەر سالىپ, كىتاپشا ەتىپ جيناقتاعان.
سۋرەتشىنىڭ ويى – ءوسىپ كەلە جاتقان جاستارعا ءتول تىلىمىزدە ءونىم ۇسىنۋ. ونىڭ وزىندە قانداي دا ءبىر ەسەپ ءۇشىن ەمەس, شىنايى ونەرمەن سۇرانىستى اقتايتىنداي كوميكس كىتاپتار بولسا دەيدى.
وسكەمەن