«مازمۇنداما» باسپاسىنان قازاقتىڭ كاسىبي مۋزىكا ونەرىنىڭ نەگىزىن سالۋشى احمەت جۇبانوۆتىڭ تاعىلىمعا تولى ءومىر جولى باياندالعان «احمەت جۇبانوۆ كىم؟» اتتى كىتاپ جارىق كوردى.
كىتاپ اۆتورى – «Egemen Qazaqstan» گازەتىنىڭ ءبىلىم جانە عىلىم ءبولىمىنىڭ ءتىلشىسى, بەلگىلى جاس قالامگەر بەكزات قۇلشار. ارىپتەسىمىزدىڭ «احمەت جۇبانوۆ كىم؟» اتتى بۇل جيناعىندا بەلگىلى تۇلعانىڭ بالالىق شاعىنان باستاپ ونەردەگى العاشقى باسپالداقتارى, ۇلتتىق وركەستردى قۇرۋ تاريحى, ەل ىشىندەگى تالانتتاردى ىزدەپ تابۋ وقيعالارى سىندى قالىڭ جۇرتشىلىققا بەيمالىم دەرەكتەر جەتەرلىك.
ماسەلەن, احمەت جۇبانوۆ ءوزىنىڭ جەتى جاس ۇلكەن تۋعان اعاسى, قازاقتىڭ ءتىل ءبىلىمى سالاسىنداعى العاشقى پروفەسسورى قۇدايبەرگەن جۇبانوۆ ەكەۋى مەكتەپ تابالدىرىعىن بىرگە اتتاعانى, ۇستازدارى قۇدايبەرگەندى ء«بىرىنشى جۇبانوۆ», ال احمەتتى «ەكىنشى جۇبانوۆ» دەپ اتايتىنى, سول كەزدە سىنىپتاعى بالالاردىڭ ەڭ كىشكەنتايى بولعان, پارتادان بويى ارەڭ كورىنەتىن احمەتتىڭ قىزىقتى وقيعالارى وقىرماندى وزىنە باۋراپ الادى. ال كىتاپتى وقىپ وتىرعاندا ۇلتتىق وركەستر قۇرۋ جولىندا كۇرەسىپ, العان بەتىنەن قايتپاعان تۇلعانىڭ ەرلىگىن ەرىكسىز مويىندايسىز. سونداي-اق اۋىلاۋىلدى ارالاپ, كۇيشىلەردى ىزدەپ تاۋىپ, ەل ىشىندە ۇمىتىلا باستاعان شىعارمالاردى نوتاعا ءتۇسىرىپ, قازاقتىڭ تۇڭعىش ۇلتتىق اسپاپتار وركەسترىن قۇرىپ, بۇرىن جەكە-جەكە تارتىلاتىن دومبىرا, قوبىز, سىبىزعى, سىرناي سەكىلدى اسپاپتاردىڭ ءۇنىن ءبىر ارناعا توعىستىرعان مۋزىكانتتىڭ ۇشان-تەڭىز ەڭبەگىنە باس يەسىز.
احمەت جۇبانوۆ 6 جاستاعى نۇرعيسا تىلەنديەۆتىڭ قابىلەتىن بايقاپ, مۋزىكا سىنىبىنا وقۋعا تۇسىرگەنى, 70 جاستان اسقان كۇيشى دينا نۇرپەيىسوۆانى ەلىمىزدىڭ باتىس ايماعىنان الماتىعا كوشىرىپ العانى, تاعى دا باسقا تالانتتاردى ەل اراسىنان ىزدەپ تاۋىپ, كاسىبي مۋزىكاعا باۋلىعانى سىندى تاعىلىمدى دەرەكتەر ءالى دە ىندەتە زەرتتەلۋگە ءتيىس. ارىپتەسىمىز سول تاعىلىمدى ميسسيا جولىنا وسى ءبىر شاعىن كىتابىمەن تۇسكەنىن اڭعاردىق.