گارۆاردتى باعىندىرعان قاراكوز نەمەسە قازاقستان ءبىلىمىنىڭ جاڭا كەزەڭى

«بىرنەشە كۇن بۇرىن جاقسى جاڭالىق ەستىدىك. استاناداعى رەسپۋبليكالىق فيزيكا-ماتەماتيكا مەكتەبىنىڭ وقۋشىسى بورتە سايرانبەكقىزى الەمنىڭ جەتەكشى ۋنيۆەرسيتەتتەرىنىڭ ءبىرى - Harvard University-گە قابىلداندى. بۇل ءبىر عانا وقۋشىنىڭ جەتىستىگى ەمەس, تۇتاس ءبىلىم جۇيەسىنىڭ الەۋەتىن كورسەتەتىن ماڭىزدى بەلگى دەر ەدىم.

بۇگىندە قازاقستاننىڭ ءبىلىم سالاسى جاڭا ساپالىق كەزەڭگە قادام باسىپ وتىر. مۇنى ناقتى دەرەكتەر دە دالەلدەيدى. ماسەلەن, «بولاشاق» حالىقارالىق باعدارلاماسى 1993 جىلدان بەرى 12,5 مىڭنان استام قازاقستاندىقتى شەتەلدە وقىتقان. قازىردىڭ وزىندە 1 400-دەن استام ستيپەنديات الەمنىڭ جەتەكشى ۋنيۆەرسيتەتتەرىندە ءبىلىم الىپ ءجۇر. ال 2026 جىلعا 635 گرانت ءبولىنۋى بۇل باعىتتاعى جۇمىستىڭ جۇيەلى تۇردە جالعاسىپ جاتقانىن كورسەتەدى», - دەيدى سپيكەر.

ول ەل جاستارىنىڭ تىلدىك دايىندىعى مەن حالىقارالىق تەستىلەۋ مادەنيەتى دە ايتارلىقتاي دامىپ جاتقانىن العا تارتتى. اشىق دەرەكتەرگە قاراعاندا, 2024-2025 جىلدارى قازاقستاندا IELTS تاپسىرعانداردىڭ 89%-ى ونى ۋنيۆەرسيتەتكە ءتۇسۋ ماقساتىندا تاڭداعان. سونىمەن بىرگە قىتاي ءتىلىن مەڭگەرۋگە قىزىعۋشىلىق ءتا وسىپ كەلەدى. 

«وسىنداي كورسەتكىشتەر ءبىلىم بەرۋ جۇيەسىندەگى ساپالىق وزگەرىستەردىڭ ناقتى ناتيجەسىن كورسەتەدى. ياعني, بۇگىنگى وقۋشى تەك مەكتەپ باعدارلاماسىمەن شەكتەلمەي, حالىقارالىق دەڭگەيدە باسەكەگە تۇسۋگە دايىندالىپ جاتىر.

سونىمەن قاتار, الەمنىڭ ۇزدىك ۋنيۆەرسيتەتتەرىنە ءتۇسۋ باسەكەسىنىڭ ءوزى وتە جوعارى. مىسالى, Harvard College دەرەگىنە سايكەس, ءبىر وقۋ جىلىندا 47 893 ءوتىنىم ءتۇسىپ, سونىڭ تەك 2 003-ءى عانا قابىلدانعان. مۇنداي جاعدايدا قازاقستاندىق وقۋشىنىڭ ىرىكتەۋدەن ءوتۋى ۇلكەن دايىندىق پەن جۇيەلى ەڭبەكتىڭ ناتيجەسى ەكەنى انىق.

دەگەنمەن, جەتىستىكتەرمەن قاتار, ويلاناتىن تۇستار دا بار. ءبىلىم ساپاسى بارلىق وڭىردە بىردەي ەمەس. قالا مەن اۋىل اراسىنداعى ايىرماشىلىق, ماتەريالدىق بازا مەن كادر ماسەلەسى ءالى دە وزەكتى», - دەيدى سەيىتجاپار قۇرالبەك.

ونىڭ پايىمىنشا, وسىنداي جەكە جەتىستىكتەردى جۇيەلى ناتيجەگە اينالدىرۋدى باستى مىندەت ەتۋ كەرەك. ياعني, دارىندى وقۋشىنىڭ تابىسى كەزدەيسوقتىق ەمەس, قولجەتىمدى مۇمكىندىككە اينالۋى ءتيىس.