قازاقستاننىڭ تاعى ەكى وڭىرىندە اۋا تەمپەراتۋراسىنىڭ كۇرت كوتەرىلۋىنە بايلانىستى ەرىگەن قار سۋى رەسپۋبليكالىق ماڭىزى بار تاسجولدارعا شىقتى, دەپ حابارلايدى Egemen.kz.
اقمولا وبلىسىندا «استانا – پاۆلودار» اۆتوجولىندا جول قىزمەتتەرى سۋ باسۋ سالدارىن جەدەل جويۋ جۇمىستارىن جۇرگىزىپ جاتىر.
«كازاۆتوجول» مالىمەتىنشە, «استانا – شىدەرتى – پاۆلودار – ۋسپەنكا – رف شەكاراسى (قوساق وتكىزۋ پۋنكتى)» اۆتوجولىنىڭ 117-شاقىرىمىندا 27 ناۋرىز كەشكىسىن ۇزىندىعى شامامەن 50 مەتر, تەرەڭدىگى 15–20 سم بولاتىن ەرىگەن سۋ تاسقىنى تىركەلگەن. بۇل جاعداي ماۋسىمدىق سۋ كولەمىنىڭ ارتۋى مەن مۇزدىڭ ەرۋىنە بايلانىستى بولعان.
قازىرگى ۋاقىتتا جاعداي تولىق باقىلاۋعا الىندى. وقيعا ورنىندا «قازسەرۆيس» جشس-ءنىڭ (اقمولا وبلىستىق فيليالى) ماماندارى جۇمىلدىرىلعان. جول توسەمىن نىعايتۋ, توپىراق توگۋ جانە سۋ اعىنىن رەتتەۋ ءۇشىن قورعانىش ءۇيىندىسىن جاساۋ جۇمىستارى جۇرگىزىلىپ جاتىر.
اتالعان ۋچاسكەدە قوزعالىس جابىلعان جوق, كولىك كەپتەلىسى بايقالمايدى. قاۋىپسىزدىكتى ارتتىرۋ ءۇشىن ارنايى بەلگى باعاندارى ورناتىلىپ, جول جاعدايىنا تۇراقتى باقىلاۋ ۇيىمداستىرىلعان. ەلدى مەكەندەرگە قاۋىپ جوق. جول قىزمەتتەرى تاۋلىك بويى مونيتورينگ جۇرگىزىپ, قوزعالىستىڭ قاۋىپسىز ءارى ۇزدىكسىز بولۋىن قامتاماسىز ەتۋ شارالارىن جالعاستىرىپ جاتىر.
ال كورشىلەس قاراعاندى وبلىسىندا 27 ناۋرىز كەشكى ۋاقىتتا قاراعاندى – تەمىرتاۋ تاسجولىنىڭ ءبىر بولىگىن سۋ باستى.
وبلىس اكىمدىگىنىڭ ءباسپاسوز قىزمەتى ءمالىم ەتكەندەي, قاردىڭ قارقىندى ەرۋىنە بايلانىستى جولدىڭ ءبىر جولاعىندا ەرىگەن سۋ جينالعان. اتالعان اۋماقتا بوگەت جاساۋ جۇمىستارى جۇرگىزىلدى, كولىك قوزعالىسى توقتاتىلعان جوق.
ايتا كەتەيىك, بۇعان دەيىن قوستاناي وبلىسىندا رەسپۋبليكالىق ماڭىزى بار تاسجولدىڭ ءبىر ۋچاسكەسى سۋ تاسقىنى سالدارىنان جابىلىپ قالعانىن حابارلاعان ەدىك.
قازاقستاندا قاي جولدار اشىق, قاي باعىت جابىق؟