تۋريزم جانە سپورت ءمينيسترى ەربول مىرزابوسىنوۆ پارا بياتلوننان ميلاندا وتكەن قىسقى پاراليمپيادا چەمپيونى ەربول حاميتوۆپەن جانە ونىڭ جاتتىقتىرۋشىلارىمەن كەزدەستى. كەزدەسۋ بارىسىندا مينيستر وتاندىق سپورت سالاسىنا قوسقان ەلەۋلى ۇلەسى مەن حالىقارالىق ارەناداعى جوعارى جەتىستىكتەرى ءۇشىن ەربول حاميتوۆقا «ەڭبەك سىڭىرگەن سپورت شەبەرى» اتاعىن تابىستادى, دەپ حابارلايدى Egemen.kz.
ەربول حاميتوۆ – قازاقستاننىڭ پارا سپورتىنداعى الەمدىك دەڭگەيدەگى جەتەكشى سپورتشىلارىنىڭ ءبىرى. ونىڭ باستى ەرەكشەلىگى – امبەباپتىعى. ول پارا شاڭعى جارىسى مەن پارا بياتلوندا بىردەي جوعارى ناتيجەلەر كورسەتىپ, توزىمدىلىك, دالدىك جانە تاكتيكالىق شەبەرلىكتى شەبەر ۇيلەستىرەدى. سونىمەن قاتار ول پارا بياتلوننان الەم كۋبوگىنىڭ جالپى ەسەبىندە جەڭىسكە جەتىپ, حرۋستال گلوبۋستى يەلەنگەن قازاقستان تاريحىنداعى العاشقى سپورتشى اتاندى.
جۋىردا يتاليانىڭ ميلان-كورتينا قالالارىندا وتكەن XIV قىسقى پاراليمپيادادا ەربول حاميتوۆ پارا بياتلوننان التىن, ال پارا شاڭعى جارىسىنان قولا مەدال جەڭىپ, ەل قورجىنىنا زور ۇلەس قوستى.
سونىمەن قاتار مينيستر ەربول حاميتوۆتىڭ جاتتىقتىرۋشىلارى – اسلان توقباەۆ, ۆاسيلي كولوميەتس جانە انتون ءجدانوۆيچتى قۇرمەت گراموتاسىمەن ماراپاتتادى.
ەستەرىڭىزگە سالساق, بۇعان دەيىن مەملەكەت باسشىسى ەربول حاميتوۆقا ءىىى دارەجەلى «بارىس» وردەنىن تابىستاعان بولاتىن. ال ۆاسيلي كولوميەتس پەن انتون جدانوۆيچ «پاراسات» وردەنىمەن, اسلان توقباەۆ «قۇرمەت» وردەنىمەن ماراپاتتالعان.
كەزدەسۋ بارىسىندا ەربول مىرزابوسىنوۆ مىقتى سپورتشىلار مەن كاسىبي سپورت مەنەدجەرلەرىن قولداۋدىڭ ماڭىزىن ەرەكشە اتاپ ءوتتى. ويتكەنى ولاردىڭ جەتىستىكتەرى قازاقستاننىڭ حالىقارالىق دەڭگەيدەگى بەدەلىن ارتتىرۋعا زور ۇلەس قوسادى.
جانكۇيەرلەر ەربول حاميتوۆتى اۋەجايدا سالتاناتتى تۇردە قارسى الدى
ايتا كەتەيىك, ەلىمىزدە پارا سپورتتىڭ 19 ءتۇرى قارقىندى دامىپ كەلەدى. 2025 جىلدىڭ قورىتىندىسى بويىنشا 66 159 مۇمكىندىگى شەكتەۋلى ازامات جۇيەلى تۇردە دەنە شىنىقتىرۋ جانە سپورتپەن اينالىسادى. قازىرگى تاڭدا رەسپۋبليكادا مۇمكىندىگى شەكتەۋلى جاندارعا ارنالعان رەسپۋبليكالىق سپورتتىق دايارلاۋ ورتالىعى, 16 سپورت كلۋبى, الماتى وبلىسىندا سپورتتى دامىتۋ ديرەكتسياسى جانە 2 ارنايى سپورت مەكتەبى جۇمىس ىستەيدى.