شىمكەنتتە وتكەن ەۋرازيالىق ۇكىمەتارالىق كەڭەستىڭ شاعىن قۇرامداعى وتىرىسىندا ينتەگراتسيالىق ىنتىماقتاستىقتى جاڭا دەڭگەيگە كوتەرۋ ماسەلەسى تالقىلاندى. تاراپتار ساۋدا-ەكونوميكالىق بايلانىستى كەڭەيتۋ, تسيفرلىق تەحنولوگيا مەن جاساندى ينتەللەكتىنى ەنگىزۋ ارقىلى ورتاق نارىقتىڭ تيىمدىلىگىن ارتتىرۋعا باسىمدىق بەردى.
وتىرىس پرەمەر-مينيستر ولجاس بەكتەنوۆتىڭ توراعالىعىمەن ءوتتى. جيىنعا بەلارۋس رەسپۋبليكاسىنىڭ پرەمەر-ءمينيسترى الەكساندر تۋرچين, قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك كاسىماليەۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين, ارمەنيا رەسپۋبليكاسىنىڭ ۆيتسە-پرەمەرى مگەر گريگوريان, ەۋرازيالىق ەكونوميكالىق كوميسسيا القاسىنىڭ توراعاسى باقىتجان ساعىنتاەۆ قاتىستى.
كەزدەسۋ بارىسىندا ەۋرازيالىق ەكونوميكالىق وداق (ەاەو) اياسىنداعى ءوزارا ءىس-قيمىلدى ودان ءارى تەرەڭدەتۋ, ساۋدا-ەكونوميكالىق بايلانىستاردى كەڭەيتۋ, تسيفرلىق تەحنولوگيالاردى ەنگىزۋ مەن جاساندى ينتەللەكتىنى ينتەگراتسيالىق ۇدەرىستەرگە ءتيىمدى پايدالانۋ ماسەلەلەرى تالقىلاندى. تاراپتار قازىرگى گەوەكونوميكالىق جاعدايدا بىرلەسكەن جوبالاردى دامىتۋ مەن كەدەرگىسىز ورتا قالىپتاستىرۋدىڭ ماڭىزدىلىعىنا ەرەكشە نازار اۋداردى.
ەلىمىز بيىل ەۋرازيالىق ەكونوميكالىق وداق ورگاندارىنا توراعالىق ەتەدى. وسىعان بايلانىستى مەملەكەت باسشىسى قاسىم-جومارت توقاەۆ ۇيىمعا مۇشە مەملەكەتتەر باسشىلارىنا جولداعان ۇندەۋىندە توراعالىق كەزەڭىنىڭ نەگىزگى باسىمدىقتارىن ايقىنداپ بەرگەن بولاتىن. اتاپ ايتقاندا, ەكونوميكالىق ينتەگراتسيانىڭ جاڭا ساپالى كەزەڭىنە ءوتۋ ءۇشىن جاساندى ينتەللەكت مۇمكىندىكتەرىن ءتيىمدى پايدالانۋ, ساۋداداعى اكىمشىلىك توسقاۋىلداردى ازايتۋ, سونداي-اق ءوزارا جەتكىزۋ تىزبەكتەرىن جەتىلدىرۋ مىندەتتەرى بەلگىلەندى.
ولجاس بەكتەنوۆ ينتەگراتسيالىق كۇن ءتارتىبىن ىسكە اسىرۋدا ورتاق كۇش-جىگەردىڭ ماڭىزىنا توقتالىپ, ەاەو كەڭىستىگىندە ەكونوميكالىق بايلانىستاردى نىعايتۋ جاڭا مۇمكىندىكتەرگە جول اشاتىنىن جەتكىزدى. ونىڭ ايتۋىنشا, تسيفرلىق تەحنولوگيالار مەن جاساندى ينتەللەكت قۇرالدارىن كەڭىنەن قولدانۋ وندىرىستىك كووپەراتسيانى جانداندىرىپ, وڭىرلىك ساۋدا كولەمىن ۇلعايتۋعا ىقپال ەتەدى.
جيىن بارىسىندا قاتىسۋشىلار تسيفرلاندىرۋدىڭ ەكونوميكانىڭ ءارتۇرلى سالاسىنا تيگىزەر اسەرىنە دە نازار اۋداردى. جاساندى ينتەللەكت تەحنولوگيالارىن ەنگىزۋ لوگيستيكالىق ۇدەرىستەردى جەدەلدەتىپ, تاۋار قوزعالىسىنىڭ اشىقتىعىن ارتتىرۋعا, سونداي-اق ءتيىمدى تسيفرلىق جەتكىزۋ تىزبەكتەرىن قالىپتاستىرۋعا مۇمكىندىك بەرەتىنى ايتىلدى. بۇل ءوز كەزەگىندە كاسىپكەرلىك بەلسەندىلىكتى ارتتىرىپ, جاڭا يننوۆاتسيالىق جوبالاردىڭ ىسكە اسۋىنا جاعداي جاسايدى.
بۇعان قوسا, تاراپتار ونەركاسىپتىك كووپەراتسيانى كەڭەيتۋ, بىرلەسكەن تسيفرلىق پلاتفورمالاردى دامىتۋ, دەرەكتەر الماسۋ تەتىكتەرىن جەتىلدىرۋ باعىتىندا تاجىريبە ءبولىستى. ينتەگراتسيالىق بىرلەستىك اياسىندا زاماناۋي تەحنولوگيالاردى پايدالانۋ ءوندىرىس تيىمدىلىگىن ارتتىرىپ قانا قويماي, ەكونوميكالاردىڭ باسەكەگە قابىلەتتىلىگىن كۇشەيتەتىنى ايتىلدى.
وتىرىس «يندۋستريا 5.0: ءوزارا ءىس-قيمىل كۇشى» تاقىرىبىنا ارنالعان Digital Qazaqstan 2026 حالىقارالىق تسيفرلىق فورۋمى قارساڭىندا ۇيىمداستىرىلدى. بۇل ءوز كەزەگىندە تسيفرلىق ترانسفورماتسيا ماسەلەلەرى بويىنشا كوپجاقتى ديالوگتى تەرەڭدەتۋگە, جاڭا باستامالاردى ىلگەرىلەتۋگە مۇمكىندىك بەرەدى.
جيىن قورىتىندىسىندا قاتىسۋشىلار ەۋرازيالىق ەكونوميكالىق وداق كەڭىستىگىندە يننوۆاتسيالىق دامۋ قارقىنىن كۇشەيتۋ, تسيفرلىق شەشىمدەردى كەڭىنەن ەنگىزۋ جانە ەكونوميكالىق ارىپتەستىكتى جاڭا دەڭگەيگە كوتەرۋ باعىتىنداعى ءوزارا ءىس-قيمىلدى جالعاستىرۋعا نيەتتى ەكەندەرىن ءبىلدىردى.