ەلورداداعى «قازاق ەلى» الاڭىندا وتكەن اۋقىمدى درون-شوۋ تۇنگى اسپاندى جارقىراتا ءتۇستى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
قالا تۇرعىندارى مەن قوناقتارى قازاقتىڭ ءداستۇرلى مۇراسىن بەينەلەيتىن جارقىن كومپوزيتسيالارىن تاماشالادى. اسپاندا كيىز ءۇي, تايقازان, شۇبات قۇيىلعان توستاعان, تۇيەلى كەرۋەن جانە اسىق بەينەلەرى كورىنىس تاپتى.
بۇل وبرازدار كوشپەلى مادەنيەتتى, بەرەكە-بىرلىكتى, كۇش-قۋات پەن ۇلتتىق بولمىستى بىلدىرەدى.
سونداي-اق, اسپاندا كوكتەمنىڭ كەلۋى مەن تابيعاتتىڭ جاڭارۋىن ايشىقتايتىن ءۇش ولشەمدى قىزعالداق بەينەسى پايدا بولدى. كۇن مەن ايدىڭ كورىنىستەرى كۇن مەن ءتۇننىڭ تەڭەلگەنىن مەڭزەيدى.
شوۋدىڭ سوڭىندا «ناۋرىز قۇتتى بولسىن!» دەگەن جازۋ كورىنىس تاپتى.
ەسكە سالايىق, استانادا 22 ناۋرىز كۇنى ناۋرىز مەيرامىنا ارنالعان اۋقىمدى ءىس-شارالار جالعاسادى. نەگىزگى الاڭداردا ۇلتتىق تاعامدار مەن قولونەر بۇيىمدارى ۇسىنىلاتىن جارمەڭكەلەر مەن فۋد-كورتتار جۇمىس ىستەيدى, شەبەرلىك ساعاتتارى مەن ءداستۇرلى راسىمدەر كورسەتىلەدى.
استانادا ناۋرىز مەيرامى اۋقىمدى دەڭگەيدە تويلانىپ جاتىر
سول سياقتى قازاقشا كۇرەس, ساداق اتۋ, گىر سپورتى, قول كۇرەسى جانە اسىق اتۋ بويىنشا جارىستار ۇيىمداستىرىلىپ, جەڭىمپازدارعا باعالى سىيلىقتار تابىستالادى.