بارەكەلدى, بەيبىت!

جازىلعان جايدىڭ جاڭعىرىعى حالقىمىزدا “الا قويدى بولە قىرىققان جۇنگە جارى­ماي­دى” دەگەن ماتەل بار. ونىڭ مازمۇنى بۇگىنگى قوزعاپ وتىر­عان اڭگىمەمىزگە ءدوپ كەل­گەندەي. “ەگەمەننىڭ” باتىس قا­زاقستان وبلىسىنداعى مەن­شىك­تى ءتىلشىسى تەمىر قۇسايىن “ەش­كى سۇتىنە دە ەلەپ قارايىق” دەگەن تاقى­رىپپەن كوكەيدە جۇرگەن دىلگىر ماسەلەنى قوزعاپ وتىر. مال شارۋاشىلىعىمەن ەتە­نە ارالا­سىپ وسكەن اۋىل با­ل­اسىمىز. حالقىمىز ەشكى مالىن قويدان بولە-جارا قا­را­ماعان. قازاق ۇعىمىندا قوي مەن ەشكى قاتار ايتىلىپ, اسپەتتەلىپ كەلگەن. كەرەك دەسە­ڭىز, كەدەي بولساڭ ەشكى باق دەپ ناقتىلاي ەس­كەرتىپ تە وتەدى. قازىردە اۋىلدا ەڭبەك ەتەتىن شارۋانىڭ ءوزى ەشكى مالىن ەلەمەي كەلە جات­قانىن كوزىمىز كورىپ ءجۇر. ءبىز بالالىق شاعىن كورمەگەن كە­شەگى الاپات سوعىس كەزىنىڭ ۇرپا­عىمىز. ءيا, سول سۇ­راپىل جىل­دار­دا مەنىڭ شە­شەم تاۋدا كول­حوز مالىن باق­تى. ال مەن ءوزىم بولسام اۋىلدا سۇلۋحان دەگەن اپانىڭ قولىن­دا ءوستىم. ۇيدە جەسىر ايەلدىڭ جال­عىز قىزى ايمان, جاعال ەش­كى جانە مەن, ۇشەۋمىز عانا­مىز. تاڭدايعا با­سار ءتۇيىر جوق, تالعاجاۋ ەتەتىن تاماق جوق. ءبىر كۇنى جاڭاعى جاعال ەش­كى لاقتادى. جالعىز ەمەس, ەگىز لاق. ايمان ەكەۋمىز قۋا­نىپ قالدىق, اۋزىمىز اققا ءتيدى. سۇلۋحان انا ەشكىمنىڭ ءسۇ­تىنە تالقان شىلاپ, كوجە جا­ساپ بەرەتىن بولدى. قۋا­نىش­تا شەك جوق. كوكتەمدە مال جاپ­پاي تولدەدى دە اۋزىمىز اققا ءتيدى. سول جاعال ەشكىنىڭ ءتاتتى ءسۇتىنىڭ ءدامى ءالى كۇنگە دەي­­ىن اۋىزدان كەتپەيدى. كەيىنىرەك شارۋاشى­لىق­تاردا انگور ەش­كىسىن ءوسىرۋ كو­بەيدى. وتە ءوسىمتال مال. ءجى­بەك ءجۇنى, ءتۇبىتى قولعاپ, بايپاق توقۋعا قانداي ادەمى, جىپ-جىلى. ءتىپتى سول ەشكىنىڭ ءجۇنىن سا­تىپ الماق بولىپ ءبىر قيىر­دا­عى كاۆكازدان كەلگەن تۇتىنۋ­شىلاردى دا كورگەنىمىز بار. كەيىنىرەك, نەگە ەكەنى بەل­گىسىز, سول انگور ەش­كىنىڭ تۇقىمى ازايىپ كەتتى. تەلەحاباردان فرانتسيادا ەشكى مالى كوپتەپ وسىرىلەتىنىن كورگەنىم بار. ءتىپتى ەشكى ءسۇ­تى­نەن ىرىمشىكتىڭ 70 ءتۇرى ءون­دى­رىلەدى. سىرتقا تاۋار رەتىندە دە ساۋدالايدى ەكەن. دەمەك پايدالى بولعانى عوي. ال بىزدە شە؟ نەگە ۇمىتتىق؟ وسى شا­رۋانى قولعا الىپ وتىرعان كا­سىپكەر, اتومشى بەرىك باۋى­رى­ما جول بولسىن دەيمىن. شا­رۋا­نى دوڭگەلەنتىپ, پايدالى كا­سىپكە اينالدىراتىنىنا سەنىم­دىمىن. اۋىلداعى اعايىن­دار ءبىز دە ويلانايىق. تولەن قاۋپىنباي ۇلى, جازۋشى.