كۇندەگى بەلسەندىلىكتىڭ ارتۋىنا بايلانىستى جەر شارىندا سوڭعى بىرنەشە ايداعى ەڭ قۋاتتى ماگنيتتىك داۋىل باستالادى. كۇن فيزيكاسى مەن استرونوميا زەرتحاناسىنىڭ مالىمەتىنشە, 19 ناۋرىزدان 21 ناۋرىزعا دەيىن سوزىلاتىن بۇل قۇبىلىس قاڭتار ايىنىڭ ورتاسىنىن بەرگى ەڭ كۇشتى گەوماگنيتتىك اۋىتقۋ بولماق, دەپ حابارلايدى Egemen.kz.
باستاپقىدا داۋىلدىڭ ۇزاقتىعى 10 ساعاتقا سوزىلادى دەپ بولجانعان ەدى. الايدا عالىمدار گەوماگنيتتىك تولقۋلاردىڭ جالپى كەزەڭى شامامەن التى تاۋلىككە سوزىلىپ, 24 ناۋرىزعا دەيىن جالعاساتىنىن ناقتىلادى.
«22-نەن 24 ناۋرىزعا دەيىن كورونالدى تەسىكتەردىڭ اسەرىنەن ءالسىز «قالدىق تولقىندار» بايقالادى. مۇنداي كۇردەلى ءارى كوپفاكتورلى قۇبىلىستىڭ ناقتى گرافيگىن بولجاۋ قيىن. دەگەنمەن, تولقۋلاردىڭ نەگىزگى شىڭى كەشكى جانە تۇنگى ۋاقىتقا سايكەس كەلۋى ىقتيمال. بۇل ءوز كەزەگىندە پوليار شۇعىلاسىن باقىلاۋعا مۇمكىندىك بەرەدى. ونىڭ اسەرى 50-55 گرادۋس ەندىكتەرگە دەيىن تومەندەۋى مۇمكىن. العاشقى مۇنداي مۇمكىندىك بۇگىن, ياعني 19 ناۋرىزدان 20 ناۋرىزعا قاراعان ءتۇنى كۇتىلەدى», دەپ اتاپ ءوتتى ماماندار.
عالىمداردىڭ تۇسىندىرۋىنشە, بۇل داۋىل بىرنەشە فاكتوردىڭ ۇشتاسۋىنان تۋىنداپ وتىر. ونىڭ باستى سەبەبى – اپتا باسىندا كۇن بەتىندە بايقالعان پلازمانىڭ بىرنەشە رەت ءبولىنۋى. سونىمەن قاتار كۇننىڭ جەرگە قاراعان بەتىندە پايدا بولعان كورونالدى تەسىكتەر دە ءوز اسەرىن تيگىزىپ وتىر.
ماگنيتتىك داۋىلدىڭ العاشقى بەلگىلەرى كۇن جەلىنىڭ تىعىزدىعى مەن جىلدامدىعىنىڭ ارتۋىنان بايقالماق. ماماندار بۇل كەزەڭدە ادامدارعا دەنساۋلىعىنا مۇقيات بولۋدى ەسكەرتەدى.
ەسكە سالا كەتەيىك, 2026 جىلدىڭ باسىندا جەر بەتىندە العاشقى ماگنيتتىك داۋىل 2 قاڭتار كۇنى شامامەن تۇنگى 23:00-دە (ماسكەۋ ۋاقىتىمەن) بايقالىپ, وزىنە ءتان ەرەكشەلىك رەتىندە عالامشارلىق سيپات الدى.