اقش-تىڭ پرەزيدەنتى دونالد ترامپ تاياۋ شىعىستاعى شيەلەنىس ۋشىعا تۇسسە, يراننىڭ ستراتەگيالىق ماڭىزى زور وڭتۇستىك پارس گاز كەن ورنى تولىق جويىلۋى مۇمكىن ەكەنىن مالىمدەدى. ول بۇل تۋرالى Truth Social الەۋمەتتىك جەلىسىندە جازدى, دەپ حابارلايدى Egemen.kz.
ترامپتىڭ ايتۋىنشا, اقش قاتارعا باعىتتالعان ناقتى شابۋىل تۋرالى الدىن الا ەشقانداي مالىمەت بىلمەگەن.
«امەريكا قۇراما شتاتتارى بۇل ناقتى شابۋىل تۋرالى ەشتەڭە بىلگەن جوق, ال قاتار وعان ەشقانداي قاتىسى بولماعان ءارى مۇنداي وقيعانىڭ بولاتىنىن مۇلدە بىلمەگەن», دەدى ول.
دونالد ترامپ: يرانعا قارسى سوعىستا اقش-قا ناتو ەلدەرىنىڭ كومەگى قاجەت ەمەس
سونداي-اق ول ءيزرايلدىڭ بۇل كەن ورنىنا بۇدان بىلاي سوققى جاسامايتىنىن جەتكىزدى. الايدا ترامپ يران تاراپىنان قانداي دا ءبىر ارانداتۋشىلىق ارەكەت ورىن السا, جاۋاپتىڭ تىم قاتال بولاتىنىن ەسكەرتتى.
«ەگەر يران بۇل جاعدايدا مۇلدە كىناسىز قاتارعا اقىلعا سىيمايتىن شابۋىل جاساۋعا بەل بۋسا, وندا امەريكا قۇراما شتاتتارى ءيزرايلدىڭ كومەگىمەن نەمەسە ونسىز وڭتۇستىك پارس كەن ورنىن بۇرىن-سوڭدى بولماعان كۇشپەن جانە قۋاتپەن جويىپ جىبەرەدى», دەدى ول.
ورمۇز بۇعازى: يران شارت قويدى, الەم ەنەرگەتيكاسى الاڭداۋلى
ايتا كەتەيىك, تاياۋ شىعىستاعى جاعدايدىڭ قايتا شيەلەنىسۋىنە يزرايل قارۋلى كۇشتەرىنىڭ پارسى شىعاناعىندا ورنالاسقان يراننىڭ وڭتۇستىك پارس گاز كەن ورنىنا سوققى بەرۋى تۇرتكى بولدى. بۇل ارەكەتتى قاتار مەن بىرىككەن اراب امىرلىكتەرى ايىپتاپ ۇلگەردى.
يزرايل يراننىڭ ۇلتتىق قاۋىپسىزدىك كەڭەسىنىڭ حاتشىسى قازا تاپقانىن مالىمدەدى
ساراپشىلاردىڭ پىكىرىنشە, ەنەرگەتيكالىق ماڭىزى زور نىساندارعا باعىتتالعان مۇنداي شابۋىلدار ايماقتاعى تۇراقتىلىققا عانا ەمەس, جاھاندىق گاز نارىعىنا دا اسەر ەتۋى ىقتيمال.