ەلوردادا مادەنيەت جانە اقپارات مينيسترلىگى ءداستۇرلى تۇردە ۇيىمداستىرىپ كەلە جاتقان «ناۋرىز بالى» ءوتتى. مەرەكەلىك ءىس-شاراعا قازاقستانداعى ديپلوماتيالىق كورپۋس وكىلدەرى, حالىقارالىق ۇيىمدار مەن شەتەلدىك سەرىكتەس قۇرىلىمدار قاتىستى.
بال مەملەكەت باسشىسىنىڭ باستاماسىمەن 2024 جىلى بەكىتىلگەن «ناۋرىزناما» ونكۇندىگى اياسىندا مادەنيەت جانە ۇلتتىق سالت-ءداستۇر كۇنىنە وراي ۇيىمداستىرىلدى.
ءىس-شارادا مادەني جانە گۋمانيتارلىق بايلانىستاردى نىعايتۋعا ىقپال ەتىپ, ەلىمىزدىڭ باي تاريحي-مادەني مۇراسى مەن ۇلتتىق داستۇرىنە, قازىرگى قوعامدىق دامۋىنا ەرەكشە نازار اۋدارىلدى. ديپلوماتتار ءۇشىن جارمەڭكە ۇيىمداستىرىلدى. بۇل ءىس-شارا تابيعات جاڭارىپ, مولشىلىق ارتاتىن ۇلىستىڭ ۇلى كۇنى – ناۋرىز مەرەكەسىنىڭ ءمان-ماعىناسىن تەرەڭ تۇسىنۋگە سەپ بولدى. قوناقتار ارقان تارتىس, اسىق اتۋ, باسقا دا ۇلتتىق ويىندارعا قاتىسىپ, قازاق مادەنيەتىن جاقىنىراق تاني ءتۇستى.
ءىس-شارادا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا بيىلعى ناۋرىز مەرەكەسى ەل ءۇشىن ماڭىزدى كەزەڭمەن تۇسپا-تۇس كەلگەنىن اتاپ ءوتتى.
«بيىلعى ناۋرىز ەلىمىز ءۇشىن ماڭىزدى تاريحي كەزەڭمەن تۇسپا-تۇس كەلىپ وتىر. كۇنى كەشە وتكەن رەسپۋبليكالىق رەفەرەندۋمدا حالقىمىز جاڭا اتا زاڭ ءۇشىن تاڭداۋ جاساپ, ەل دامۋىنىڭ جاڭا باعىتىن ايقىندادى. حالقىمىز ادىلەتتى, پروگرەسسيۆتى, ءبىلىم مەن عىلىمعا, يننوۆاتسياعا نەگىزدەلگەن بولاشاق ءۇشىن داۋىس بەردى. زاڭ مەن ءتارتىپ ساقتالاتىن, بارشاعا تەڭ مۇمكىندىك بەرەتىن ادىلەتتى قوعام قالىپتاستىرۋ جولىندا تاريحي شەشىم قابىلدادىق. رەفەرەندۋمعا بەلسەندى قاتىسقان حالىق ەل تاعدىرىنا بەيجاي قارامايتىنىن, ەرتەڭگە دەگەن جاۋاپكەرشىلىكتى تەرەڭ سەزىنەتىنىن كورسەتتى. بۇل – بىرلىگى بەكەم, بولاشاعىنا سەنىمدى قوعامنىڭ ايقىن كورىنىسى. ەلىمىز ءۇشىن ۋاقىت تالابىنا ساي جاسالعان بۇل تاريحي قادام مەملەكەتتىك جۇيەنى ينستيتۋتسيونالدىق تۇرعىدان جاڭعىرتۋعا جول اشادى. بۇل – قازاقستاننىڭ دەموكراتيالىق دامۋ جولىنداعى تاعى ءبىر ماڭىزدى بەلەسى. وسىلايشا, قازاقستان جاڭا داۋىرگە, جاڭا كەزەڭگە نىق قادام باستى. بۇل ناۋرىز مەيرامىنىڭ جاڭارۋ مەن جاڭعىرۋدى بىلدىرەتىن تەرەڭ رامىزدىك مانىمەن ۇندەسىپ جاتىر», دەدى ايدا بالاەۆا.
سونىمەن قاتار پرەمەر-ءمينيستردىڭ ورىنباسارى جاڭا كونستيتۋتسيادا قوعام دامۋىنىڭ جاڭا قۇندىلىقتارى بەكىتىلگەنىن اتاپ ءوتتى. العاش رەت تاريحي-مادەني مۇرانى ساقتاۋ جانە ءتول مادەنيەتتى ۇلىقتاۋ مەملەكەت دامۋىنىڭ نەگىزگى قاعيداتتارىنىڭ ءبىرى رەتىندە ايقىندالدى.
«ۇلتتىق بىرەگەيلىكتى ساقتاۋ, تاريحي ساباقتاستىقتى ۇزبەۋ جانە مادەني كودتى كەلەر ۇرپاققا امان جەتكىزۋ – كونستيتۋتسيالىق نورمالاردىڭ تۇپكى ءمانى. ويتكەنى مادەني مۇرا – وتكەننىڭ ەستەلىگى عانا ەمەس, ەلدىڭ رۋحاني تىرەگى, قوعامدى بىرىكتىرەتىن قۇندىلىقتاردىڭ نەگىزى.
ازاماتتاردىڭ تاريحي جانە مادەني مۇراعا قامقورلىق جاساۋ مىندەتىنىڭ بەكىتىلۋى دە قوعامنىڭ مادەني جاۋاپكەرشىلىگىن كۇشەيتەدى. سونىمەن قاتار ەلىمىزدىڭ دامۋ جولى «بىرلىك پەن ىنتىماق, ەتنوسارالىق جانە كونفەسسياارالىق تاتۋلىق قاعيداتتارىنا سۇيەنەتىنى» جاڭا كونستيتۋتسيانىڭ پرەامبۋلاسىندا انىق بەكىتىلدى. بۇل قاعيداتتار قازاقستان قوعامىنىڭ باستى تىرەكتەرىنىڭ ءبىرى بولىپ قالا بەرەدى جانە كوپەتنوستى, كوپكونفەسسيالى ەلىمىزدىڭ تۇراقتى دامۋىنىڭ بەرىك نەگىزىن قالىپتاستىرادى.
ەلىمىز قاي كەزدە دە حالىقتار اراسىنداعى دوستىق پەن وركەنيەتتەر ديالوگىن دامىتۋعا باسىمدىق بەرىپ كەلەدى. وسى رەتتە دوستىق پەن تاتۋلىقتىڭ التىن كوپىرىنە اينالعان ديپلوماتيالىق كورپۋس وكىلدەرىنە ەرەكشە العىس بىلدىرگىم كەلەدى.
قازاقستاندا قىزمەت اتقارىپ جۇرگەن شەتەلدىك ەلشىلەر ءبىزدىڭ مادەنيەتىمىزگە, داستۇرىمىزگە, تىلىمىزگە زور قىزىعۋشىلىق تانىتىپ قانا قويماي, ولاردى حالىقارالىق ارەنادا ناسيحاتتاۋعا دا ۇلكەن ۇلەس قوسىپ ءجۇر. سوندىقتان بىرلىگىمىزدى بەكەمدەۋدە بارشاڭىزدىڭ ەسەلى ەڭبەكتەرىڭىز ايرىقشا زور دەپ بىلەمىن», دەپ اتاپ ءوتتى ۇكىمەت باسشىسىنىڭ ورىنباسارى.
ءىس-شارادا سىرتقى ىستەر ءمينيسترىنىڭ ورىنباسارى الىبەك باقاەۆ قۇتتىقتاۋ ءسوز سويلەدى. ول ناۋرىز مەرەكەسىنىڭ مادەني ديپلوماتياداعى ماڭىزدى ءرولىن اتاپ ءوتىپ, بۇل مەيرام حالىقتاردى جاقىنداستىرىپ, مەملەكەتتەر اراسىنداعى ءوزارا تۇسىنىستىكتى نىعايتاتىنىن ايتتى. الىبەك باقاەۆتىڭ پىكىرىنشە, جاڭارۋ مەن جاسامپازدىقتى بىلدىرەتىن بۇل مەرەكە – حالىقارالىق ىنتىماقتاستىق پەن تاتۋلىقتىڭ جارقىن كورىنىسى.
مەرەكەلىك باعدارلاما اياسىندا قوناقتارعا قازاق ونەرىنىڭ التىن قورىنان مۋزىكالىق شىعارمالار شىرقالىپ, حالىق ەرتەگىلەرىنىڭ جەلىسىمەن قويىلىم كورسەتىلدى. سونىمەن قاتار كيىز ءۇي قۇرۋ ءادىسى كورسەتىلىپ, قازاقتىڭ ۇلتتىق ءبيىن ۇيرەتەتىن شەبەرلىك ساباقتار وتكىزىلدى, قازاقى داستارقان مەن ۇلتتىق تاعامدار ۇسىنىلدى. كەش سوڭىندا ۇلتتىق اسپاپتاردا ءتۇرلى مۋزىكالىق شىعارمالار ورىندالدى.
مەركەلىك ءىس-شاراعا ەۋروپا, ازيا, تاياۋ شىعىس, سولتۇستىك جانە وڭتۇستىك امەريكا ەلدەرىنەن 70-تەن استام ەلشى مەن وكىلدىك باسشىسى, ديپلومات جانە حالىقارالىق ۇيىمداردىڭ مۇشەلەرى قاتىستى. ولاردىڭ قاتارىندا بۇۇ جۇيەسى, يۋنيسەف, ددۇ, حالىقارالىق كوشى-قون ۇيىمى, ەقىۇ جانە دۇنيەجۇزىلىك بانك وكىلدەرى بار.