پرەمەر-ءمينيستردىڭ ورىنباسارى قانات بوزىمباەۆ اقمولا وبلىسىنا ەكى كۇندىك جۇمىس ساپارىمەن كەلىپ, ءوڭىر باسشىسى مارات احمەتجانوۆپەن بىرگە استراحان, شورتاندى, ارشالى, تسەلينوگراد جانە اتباسار اۋداندارىنداعى تاسقىنعا قارسى ءىس-شارالاردىڭ ورىندالۋىن تەكسەردى.
ساپاردىڭ العاشقى كۇنى پرەمەر-ءمينيستردىڭ ورىنباسارى ارشالى اۋدانىنىڭ جىبەك جولى اۋىلىنداعى ۇزىندىعى 6,3 شاقىرىمدى قۇرايتىن جاڭا قورعانىس دامباسىن قاراپ شىقتى. بۇل نىسان كوپ جىلدان بەرى وزەكتى بولىپ كەلگەن سۋ تاسقىنى ماسەلەسىن شەشۋگە مۇمكىندىك بەرىپ, جالپى سانى 15 مىڭ ادام تۇراتىن جاقىن ماڭداعى ەلدى مەكەندەردى قورعاۋدى قامتاماسىز ەتەدى.
شورتاندى اۋدانىندا «دامسينسكايا» بوگەتىنە جوندەۋ جۇمىستارى جۇرگىزىلدى. مۇندا شليۋز-قاقپالارعا رەكونسترۋكتسيا جۇرگىزىلىپ, دامسا وزەنى ارقىلى وتەتىن 5 ملن تەكشە مەترگە دەيىن سۋ كولەمىن رەتتەۋگە مۇمكىندىك جاسالدى. بۇل دامسا, شورتاندى, ستەپنوە جانە ناۋچنىي اۋىلدارىن سۋ باسۋ قاۋپىنەن قورعاۋعا باعىتتالعان.
ەكىنشى كۇنى قانات بوزىمباەۆ اتباسار قالاسىنداعى جاباي وزەنىنىڭ ارناسىن تازارتۋ جانە قورعانىس ءۇيىندىسىن تۇرعىزۋ جۇمىسىمەن تانىستى. بۇگىنگى تاڭدا وزەننىڭ 7,2 شاقىرىم ۋچاسكەسى تازارتىلدى. قازىرگى ۋاقىتتا ارنانى تەرەڭدەتۋ, كەڭەيتۋ جانە تۇزەۋ جۇمىسى جالعاسىپ, قالا ماڭىندا قورعانىس دامباسى سالىنىپ جاتىر.
سونىمەن قاتار «اتباسار – سوچينسكوە» اۆتوجولى بويىندا جىل سايىن سۋ باسۋ قاۋپى تونەتىن اۋماقتا جاڭا اۆتوموبيل كوپىرىنىڭ قۇرىلىسى اياقتالدى. بۇل اتباسار اۋدانىنداعى ءتورت ەلدى مەكەننىڭ 2 مىڭ تۇرعىنى ءۇشىن تاسقىن كەزەڭىندە كولىك قاتىناسىنىڭ ءۇزىلۋ ماسەلەسىن شەشۋگە مۇمكىندىك بەردى.
بۇدان كەيىن پرەمەر-ءمينيستردىڭ ورىنباسارى استراحان اۋدانىنداعى ەسكى قالقۇتان اۋىلى ماڭىنداعى قالقۇتان وزەنىنىڭ ارناسىن تۇزەۋ, تازارتۋ جانە تەرەڭدەتۋ جۇمىستارىمەن تانىستى. بيىل ۇزىندىعى 20,8 شاقىرىمدى قۇرايتىن قالقۇتان وزەنىنىڭ جاعالاۋىن بەكىتۋ جانە ارناسىن تەرەڭدەتۋ جوباسى باستالدى. قالقۇتان, ەسكى قالقۇتان جانە ەڭبەك اۋىلدارىن سۋ باسۋ قاۋپىن ازايتۋ ماقساتىندا 17 ملن تەكشە مەترگە دەيىن ەرىگەن سۋدى ۇستاي الاتىن «قىزىل جۇلدىز» بوگەتىنە كۇردەلى جوندەۋ جۇمىستارى اياقتالۋعا جاقىن.
تسەلينوگراد اۋدانىندا قانات بوزىمباەۆ اقمول – نۇرەسىل – تالاپكەر وبلىستىق جولىنىڭ اپاتتى ۋچاسكەسىندە اۆتوموبيل كوپىرىن سالۋ ماسەلەسىن تالقىلادى. بۇل ەسىل وزەنىنىڭ ارناسىن تۇزەۋ جوباسىن تولىق اياقتاۋعا مۇمكىندىك بەرەدى. سونداي-اق پرەمەر-ءمينيستردىڭ ورىنباسارى تسەلينوگراد اۋدانىندا اتقارىلعان تاسقىنعا قارسى ءىس-شارالار تۋرالى ەسەپتى تىڭدادى.
جالپى, اقمولا وبلىسىندا تاسقىنعا قارسى ءىس-شارالار 163 ەلدى مەكەن مەن 32 جول ۋچاسكەسىن قامتىدى. 70 ەلدى مەكەندە سۋ باسۋ قاۋپى جويىلدى. قالعان ەلدى مەكەندەردە قاۋىپ بارىنشا ازايتىلدى. كەيىنگى ەكى جىلدا سۋ باسۋ قاۋپى بار اۋماقتاردان 718 وتباسى كوشىرىلدى.
ازاماتتىق قورعاۋ قىزمەتتەرىنىڭ كۇشتەرى مەن قۇرالدارى جوعارى دايىندىق رەجىمىنە كوشىرىلدى. بۇل – 2,5 مىڭ ادام, 1 مىڭنان استام تەحنيكا, 400-گە جۋىق موتوپومپا جانە 37 ءجۇزۋ قۇرالى. قاجەتتى ينەرتتى ماتەريالدار, قاپتار مەن جانار-جاعارماي قورى دا-يىندالدى.
15 ناۋرىزدان باستاپ تاسقىنعا قارسى شتابتار تاۋلىك بويى جۇمىس ىستەيدى. قاۋىپتى ۋچاسكەلەردە تۇراقتى مونيتورينگ جۇرگىزۋ ماقساتىندا 19 درون قولدانىلادى.
«قازگيدرومەت» رمك دەرەگىنە سايكەس اقمولا وبلىسىندا تاسقىننىڭ شارىقتاۋ كەزەڭى 30 ناۋرىزدان كەيىن بولادى دەپ كۇتىلىپ وتىر. «Tasqyn» اقپاراتتىق جۇيەسىندەگى مودەلدەۋ ناتيجەلەرى بويىنشا قاۋىپ ايماعىندا استراحان, اتباسار جانە بۇلاندى اۋداندارىنداعى ەلدى مەكەندەر بار.
ء«بىزدىڭ مىندەتىمىز – تاسقىننىڭ شارىقتاۋ كەزەڭىن تولىق دايىندىقپەن قارسى الۋ. بارلىق الدىن الۋ شارالارى بارىنشا قىسقا مەرزىمدە اياقتالۋعا ءتيىس. الدىن الا ارەكەت ەتىپ, قاۋىپ ايماعىنداعى ەلدى مەكەندەردىڭ تولىق دايىن بولۋىن قامتاماسىز ەتۋ قاجەت», دەپ اتاپ ءوتتى قانات بوزىمباەۆ.
ۆيتسە-پرەمەر قاردى تاۋلىك بويى شىعارۋدى قامتاماسىز ەتۋدى, وزەن ارنالارى مەن سۋ وتكىزۋ قۇرىلىستارىن تازارتۋ جۇمىستارىن جەدەلدەتۋدى, ۋاقىتشا ورنالاستىرۋ پۋنكتتەرىن تەكسەرۋدى, قاجەتتى تەحنيكا مەن ماتەريالداردىڭ رەزەرۆىن دايىنداۋدى, سونداي-اق حالىقتى ۋاقتىلى اقپاراتتاندىرۋدى تاپسىردى.