حالقىمىزدىڭ باعزىدان بۇگىنگە جەتكەن ايرىقشا مەيرامىنىڭ ءبىرى – امال مەرەكەسى. كوكتەمنىڭ ءسارۋار شۋاعىنا شومىلىپ, جۇرتشىلىقتىڭ اقجارقىن كوڭىلىمەن كومكەرىلەتىن امال كۇنى – ۇلىس مەيرامىنىڭ باستاۋى.
كورىسۋ كۇنى دەپ اتاپ كەتكەن مەرەكە ماڭعىستاۋدان باستالىپ, بۇگىندە تۇتاس ەل كولەمىندە تويلانىپ ءجۇر. قىستىڭ قۇرساۋىنان قۇتىلىپ, جىلعا امان جەتكەن اعايىن جادىراي كورىسەتىن 14 ناۋرىز – كيىز ۇيلەر تىگىلىپ, التىباقان قۇرىلىپ, ۇلتتىق ءداستۇر مەن ونەردىڭ سالتانات قۇراتىن كۇنى.
ماڭعىستاۋدا امال مەرەكەسى كەيىنگى جىلدارى تۇراقتى تۇردە وتپان تاۋ بيىگىندەگى تاريحي-مادەني كەشەندە تويلانىپ كەلەدى. وڭىرلىك قوعامدىق كوممۋنيكاتسيا ورتالىعىنىڭ حابارلاۋىنشا, ماڭعىستاۋدا امال مەيرامى بيىل دا ايرىقشا تويلانادى.
ەكى كۇنگە جوسپارلانعان مەرەكەلىك باعدارلاما ۇلتتىق رۋح پەن سالت-ءداستۇردى دارىپتەۋگە باعىتتالعان مازمۇندى ءىس-شارالارعا ۇلاسادى. اتاپ ايتقاندا, قازاق كۇرەسى, كىر تاسىن كوتەرۋ, قول كۇرەسى, ارقان تارتۋ سىندى ۇلتتىق سپورت تۇرلەرىنەن جارىستار وتەدى. سونىمەن قاتار جىر-تەرمە كەشى, قولونەر كورمە-جارمەڭكەسى, انالار شەرۋى جانە كونتسەرتتىك باعدارلامالار ۇيىمداستىرىلادى.
امال كۇنى وتپان تاۋدا وتەتىن ءداستۇرلى ءىس-شارانىڭ ءبىرى – «بىرلىك» وتىن جاعۋ ءراسىمى. ۇيىمداستىرۋشىلاردىڭ ايتۋىنشا, بۇل ءراسىم جاۋگەرشىلىك كەزىندە ماڭعىستاۋدىڭ ويى مەن قىرىن جايلاعان قازاق قولىن بىرىكتىرۋ ءۇشىن وتپاننىڭ بيىگىنەن جاعىلعان ۇران وت قۇرمەتىنە جانە شەيىتتەر رۋحىنا باعىشتالعان, بۇگىندە حالىقتىڭ بىرلىگى مەن ۇرپاق ساباقتاستىعىن بەينەلەيتىن بەلگى بولىپ تابىلادى.
داستۇرگە ساي ات سپورتى دا مەرەكەنىڭ باستى كوركىنە اينالادى. 7 شاقىرىمدىق قۇنان بايگە, 12 شاقىرىمدىق توپ بايگە مەن 18 شاقىرىمدىق الامان بايگە جارىستارى وتەدى.
«امال – تاتۋلىق پەن بىرلىك مەرەكەسى» اتتى مەرەكەلىك باعدارلاما اياسىندا جەرگىلىكتى ونەرپازدارمەن قاتار, شەتەلدەن ارنايى شاقىرتىلعان ءداستۇرلى ونەر وكىلدەرى كورەرمەنگە تۇركى حالىقتارىنىڭ ۇلتتىق مۋزىكاسى مەن باي مادەني مۇراسىن ۇسىنادى. ولاردىڭ قاتارىندا وزبەك حالىق اندەرىن ورىنداۋدا شەبەرلىگىمەن تانىمال وزبەكستان مەملەكەتتىك فيلارمونياسىنىڭ ءانشىسى ديلفۋزا قابىلەۆا, قىرعىز رەسپۋبليكاسىنىڭ بەلگىلى ءانشىسى, ت.ساتىلعانوۆ اتىنداعى قىرعىز مەملەكەتتىك فيلارمونياسىنىڭ ءسوليسى جانار تۋراتوۆا, ازەربايجان رەسپۋبليكاسىنان كەلگەن ءداستۇرلى ءانشى, «Vatan Musik Group» ءانسامبلىنىڭ ۆوكاليسى, ازەربايجان حالىق مۋزىكاسىن جاڭا ستيلدە ناسيحاتتاپ جۇرگەن ونەرپاز سەفالي ميرزەليەۆ, تۇركيا مادەنيەت جانە تۋريزم مينيسترلىگىنىڭ بەينەلەۋ ونەرى باس باسقارماسىنا قاراستى انكارا مەملەكەتتىك تۇرىك حالىق مۋزىكاسى حورىنىڭ ۆوكاليسى نيلگيۋن كيزيلچي بار.
كورىسۋ كۇنىن تويلاۋ تەك وتپان تاۋمەن شەكتەلمەيدى. ادەمى كەشتەر مەن كورىنىستەر ءاربىر اۋدان, قالالاردا, كوشەلەر مەن الاڭداردا, مادەنيەت مەكەمەلەرى مەن ءبىلىم وشاقتارىندا جانە ءاربىر وتباسىندا ۇلكەن مەرەكەگە اينالادى.
امال – بىرلىك پەن مەيىرىمنىڭ, تابيعات پەن تاريحتىڭ ومىرشەڭ مەرەكەسى.
ماڭعىستاۋ وبلىسى