جاس كادرلارعا سۇرانىس: قوستانايدا ەڭبەك نارىعى كەڭەيىپ كەلەدى

وسىنداي مامانداردىڭ ءبىرى – Allur زاۋىتىنىڭ كۋزوۆتى بوياۋ تسەحىنداعى بوياۋشى-وڭدەۋشى كامشات تىلەۋوۆا. ول قوستانايعا اقتاۋ قالاسىنان قونىس اۋدارعان.

كامشاتتىڭ زاۋىتتاعى جولى ستۋدەنت كەزىنەن باستالعان. ول Satbayev University ۋنيۆەرسيتەتىمەن سەرىكتەستىك باعدارلاماسى اياسىندا تاجىريبەدەن ءوتۋ ءۇشىن كاسىپورىنعا كەلگەن. وندىرىستىك تاجىريبەدەن وتەتىن ستۋدەنتتەرگە جاتىن ورىن مەن تاماق ۇسىنىلىپ, سونىمەن قاتار جالاقى دا تولەنەدى. Allur زاۋىتىنىڭ بازاسىندا ماشينا جاساۋ جانە اۆتوموبيل جاساۋ سالالارى بويىنشا التى بازالىق كافەدرا جۇمىس ىستەيدى جانە 18 ءبىلىم بەرۋ باعدارلاماسى ازىرلەنگەن.

كامشاتتىڭ وندىرىستىك تاجىريبەسى 2024 جىلدىڭ قىركۇيەگىنەن 2025 جىلدىڭ مامىرىنا دەيىن جالعاستى.

ء«بىزدى الماتىدان تاجىريبەدەن وتۋگە جىبەردى. ارقايسىمىز ءتۇرلى تسەحتاردا جۇمىس ىستەدىك: كوپتەگەن ستۋدەنتتەر Kia ءوندىرىس جەلىسىندە بولدى, ال مەن كۋزوۆتى بوياۋ تسەحىندا تاجىريبەدەن ءوتتىم. تاجىريبەدەن كەيىن ديپلومىمدى قورعاۋ ءۇشىن الماتىعا باردىم. بىراق ءبىراز ۋاقىتتان سوڭ قوستانايعا قايتا ورالۋدى ءجون كوردىم», دەيدى كامشات.

ديپلومىن قورعاعاننان كەيىن ول پوليروۆكا ۋچاسكەسىندەگى بوس ورىن تۋرالى ەستىپ, ءوز كۇشىن سىناپ كورۋگە شەشىم قابىلدايدى. جاڭا قالاعا كوشۋ وڭاي شەشىم بولماعانىن جاسىرمايدى.

«بۇعان ەكى سەبەپ اسەر ەتتى. بىرىنشىدەن, ۇجىم. ارىپتەستەرىممەن جاقىن ارالاسىپ كەتتىم, ءبارى ماعان جىلى قارىم-قاتىناس تانىتتى. ەكىنشىدەن, قالانىڭ ءوزى. قوستاناي تابيعاتىمەن, اۋا رايىمەن, ادامدارىمەن ۇنادى. زاۋىتتا جاس ماماندارعا دامۋ ءۇشىن كوپتەگەن مۇمكىندىك بەرىلەدى. ارينە, باستاپقىدا قولىمنان كەلە مە دەگەن كۇمان بولدى. بىراق دوستارىممەن, ارىپتەستەرىممەن سويلەسكەننەن كەيىن بۇل شەشىمىمنىڭ دۇرىس ەكەنىن ءتۇسىندىم», دەيدى ول.

قازىر كامشات كۋزوۆتى بوياۋ تسەحىندا بوياۋشى بولىپ جۇمىس ىستەيدى. ونىڭ نەگىزگى مىندەتى – اۆتوموبيل كۋزوۆتارىن كەلەسى قۇراستىرۋ كەزەڭىنە جىبەرەر الدىندا ءمىنسىز كۇيگە جەتكىزۋ. كامشاتتىڭ ايتۋىنشا, جۇمىستا ارىپتەستەردىڭ قولداۋى ەرەكشە ماڭىزدى.

«مەن ءارتۇرلى جاستاعى ادامدارمەن ءتىل تابىسۋدى, كوماندادا جۇمىس ىستەۋدى جانە ءوز ىسىمە جاۋاپكەرشىلىكپەن قاراۋدى ۇيرەندىم. ءبىز ارقاشان ءبىر-بىرىمىزگە كومەكتەسەمىز. قازىر ءوزىمدى تولىققاندى مامان رەتىندە سەزىنەمىن جانە زاۋىتتىڭ, جالپى سالانىڭ دامۋىنا ءوز ۇلەسىمدى قوسىپ جۇرگەنىمدى تۇسىنەمىن», دەيدى ول.

Allur كومپانياسى بىرنەشە جىلدان بەرى ەلىمىزدىڭ جەتەكشى ۋنيۆەرسيتەتتەرى مەن بەيىندى كوللەدجدەرىندە دۋالدى ءبىلىم بەرۋ باعدارلاماسىن دامىتىپ كەلەدى. كوپتەگەن ستۋدەنتتەر زاۋىتتا تاجىريبەدەن وتكەننەن كەيىن وسى كاسىپورىندا جۇمىسىن جالعاستىرعىسى كەلەدى.

جاستار – وزگەرىستىڭ تىڭ كۇشى

الايدا قوستاناي تەك جاس مامانداردى عانا ەمەس, تاجىريبەلى كاسىبي كادرلاردى دا وزىنە تارتىپ وتىر. سولاردىڭ ءبىرى – جەتكىزۋشىلەر ساپاسىن باسقارۋ ءبولىمىنىڭ باسشىسى اسەت سۇگراليەۆ. ول قوستانايعا ورال قالاسىنان كوشىپ كەلگەن.

«سول كەزەڭدە مەن اۆتوكولىك ونەركاسىبىنە اۋىسۋ مۇمكىندىگىن قاراستىرىپ جۇرگەن ەدىم. Allur كومپانياسىنداعى بوس ورىندى كورگەندە, ءوز تاجىريبەمنىڭ بۇل كاسىپورىنعا پايدالى بولاتىنىن ءتۇسىندىم. سوندىقتان بىردەن كومپانيا وكىلدەرىمەن بايلانىسقا شىقتىم», دەيدى اسەت.

بۇعان دەيىن ول ورالدا, الماتىدا, قازاندا جانە استانادا جۇمىس ىستەگەن. ونىڭ ايتۋىنشا, قالا اۋىستىرۋ – كاسىبي دامۋدىڭ تابيعي ءبىر بولىگى.

جاستار جۇمىسى قايتا جانداندى

قازىر اسەت ءوندىرىس جەلىسىنە جەتكىزىلەتىن كومپونەنتتەردىڭ ساپاسىن الدىن الا باقىلاۋعا جاۋاپتى باعىتتى باسقارادى.

ء«بىزدىڭ مىندەتىمىز – جەتكىزۋشىلەرمەن جۇيەلى جۇمىس جۇرگىزىپ, كومپونەنتتەردىڭ تۇراقتى ساپاسىن قامتاماسىز ەتۋ», دەيدى ول.

بۇگىندە كامشات پەن اسەت سەكىلدى مامانداردىڭ ەڭبەك جولى ەلىمىزدىڭ جاڭا يندۋستريالىق كارتاسىن قالىپتاستىرىپ كەلەدى. ءتۇرلى قالادان جانە ءارتۇرلى كاسىبي تاجىريبەمەن كەلگەن ادامدار قوستانايعا جينالىپ, قازاقستانداعى ەڭ ءىرى اۆتوكولىك زاۋىتتارىنىڭ بىرىندە ەڭبەك ەتىپ ءجۇر. ولاردىڭ كاسىبيلىگى, دامۋ جولىنداعى تالپىنىسى مەن كوماندالىق رۋحىنىڭ ارقاسىندا Allur ستراتەگيالىق ماڭىزى بار كاسىپورىن رەتىندەگى مارتەبەسىن نىعايتىپ, ال قوستاناي بۇكىل ەل بويىنشا مامانداردى وزىنە تارتاتىن ورتالىققا اينالىپ وتىر.

قۇرمانبەك ديحانباەۆ