شىنى زاۋىتىنداعى بىرەگەي جوبالار

– ءبىزدىڭ زاۋىتتا جۇزگە جۋىق مامان جۇمىس ىستەيدى. ءۇش تسەح بار. ءبىرى اۆتوكولىك شىنىلارىن جاساسا, ەكىنشىسى اليۋميني كونسترۋكتسيالاردى قۇراستىرادى. ءۇشىنشى تسەح شىنى پاكەتتەردى وندىرەدى ءارى شىنىلاردى شىڭدايدى, – دەگەن كاسىپورىن ديرەكتورى ايدار ماميەۆ جالپى جۇمىستىڭ قىر-سىرىن سيپاتتاپ بەردى. 

كاسىپورىننىڭ ونىمدەرى مەملەكەتتىك ستاندارت تالاپتارىنا تولىق ساي كەلەتىن­دىكتەن, وڭىردەگى ءىرى ءوندىرىس ورىندارىمەن ارىپتەستىك ورناتقان. شىنىمەن قاپ­تالعان كوپقاباتتى تۇرعىن ۇيلەر مەن عي­ماراتتاردىڭ جارق-جۇرق ەتكەن شىنىسى وسى زاۋىتتا وندىرىلەدى. كاسىپورىنداعى قاجەتتى قۇرال-جابدىقتاردىڭ بارلىعى دەرلىك زامان تالابىنا ساي. شىنىدان ساپالى ءونىم شىعارۋ ءوز الدىنا, ونى وڭدەۋ تەحنولوگياسى دا – ۇلكەن جۇ­مىس. مامانداردىڭ ايتۋىنشا, ءار ميل­ليمەتردىڭ دالدىگى, جيەكتەرىنىڭ تەگىستىگى – قاۋىپسىزدىك كەپىلى. سوندىقتان شىنىنى ەڭ العاشقى وڭدەۋ ساتىسىنان باستاپ اسقان جاۋاپكەرشىلىك قاجەت.

البەتتە, جۇمىستىڭ دەنى كومپيۋ­تەر كومەگىمەن جۇزەگە اسادى. ءونىمنىڭ ءپىشىنى ايقىندالىپ, تەحنيكالىق پارا­مەتر­لەرى ناقتىلانادى. تسيفرلىق باس­قارۋ جۇيەسىمەن شىنى قاجەتتى ولشەم­گە كەلتىرىلىپ قانا قويماي, كۇردەلى پىشىن­دەر كەسىلىپ, ساندىك ورنەكتەر تۇسىرىلەدى. مۇن­داي تەحنولوگيا ادام ەڭبەگىن جەڭىل­دەتىپ, ءونىم ساپاسىن جاڭا دەڭگەيگە كوتەر­گەن. ماسەلەن, فرەيزەرلىك اپپاراتپەن كەز كەلگەن كولەمدەگى شىنىنى كەسىپ, تاپ­سىرىسقا قاراي ءتۇرلى ورنەك سالۋعا بولادى.

– بۇل قۇرىلعى يتاليادان اكەلىنگەن. شىنىنى 100 مم دەيىنگى ولشەمدە وڭدەي الادى. قازىر جۋىنۋ بولمەسىنە قوياتىن كابينانىڭ شىنىسى وڭدەلىپ جاتىر. سىرتقى كونتۋردى جونامىز, قاۋىپسىزدىك ءۇشىن وعان ەۋروجيەك جاسايمىز, تۇتقاعا ارنالعان ورىندى بۇرعىلايمىز. ءسويتىپ, دايىن ءونىم بولىپ شىعادى, – دەيدى كاسىپورىن قىزمەتكەرى رۋسلان ءنازبي.

اينەكتى جابىق كابينادا وڭدەۋ ۋاقىتى ورتاشا ەسەپپەن 20–25 مينۋتقا سوزى­لادى ەكەن. شىنى تازارتىلىپ, وندى­رىستىك جەلىگە جىبەرىلگەننەن كەيىن قۇراس­تىرۋ جۇمىسى باستالادى. بۇل كەزەڭ­دە ءار ارەكەت ناقتى ەسەپپەن, تەحنو­لو­گيالىق تالاپقا ساي ورىندالادى. اۆتوماتتاندىرىلعان جۇيە ءونىمنىڭ ساپا­سىن بىرقالىپتى ساقتاپ, ونىڭ بەرىك­تىگى مەن تيىمدىلىگىن قامتاماسىز ەتەدى. زاۋىت ۇجىمى تەحنولوگيالىق مۇمكىندىكتەرىن ۇنەمى جاڭارتىپ, زاماناۋي قوندىرعىلاردى كەزەڭ-كەزەڭىمەن ىسكە قوسىپ كەلەدى. جۋىردا كاسىپورىنعا جاڭا جەلى ورناتىلعان. بۇل – شىنى پاكەتتەرىن دايىنداۋدى تولىق اۆتوماتتاندىرىپ, ءونىمنىڭ بەرىكتىگى مەن جىلۋ ساقتاۋ قاسيەتىن ارتتىرۋعا ارنالعان كەشەندى قۇرىلعى. ايتا كەتەيىك, كاسىپورىن جۋىردا عانا 80 ملن تەڭگەگە جاڭارتىلعان قۇرىلعى ورناتقان.

– بۇل قۇرىلعى تۇركيادان اكەلىن­گەن. ەڭ اۋەلى شىنىنى جۋىپ, اۋامەن قۇر­عاتادى. سودان كەيىن بارىپ, ول­شە­مىنە قاراي كەسىلەدى, جاقتاۋلارى جابىس­­تىرىلادى. جاقتاۋلارى ارنايى جەلىم­­مەن جابىستىرىلعاندىقتان, سۋىق وتكىز­بەيدى. اسىرەسە شىعىستىڭ اۋا رايىنا لايىقتالعان, – دەيدى كاسىپورىن قىز­مەتكەرى قايرات سۇلەيمەنوۆ.

جوعارىدا ايتقانداي, شىنىنى شىڭ­داۋ كەزەڭىن دە كوردىك. ياعني ادەتتەگى اينەكتىڭ بەرىكتىگىن بەس-التى ەسە ارتتىراتىن ارنايى تەرميالىق وڭدەۋدەن وتكىزەدى ەكەن. وڭدەلگەن شىنى جىلۋ مەن سوققىعا وتە ءتوزىمدى بولادى. شىنى سىنعان جاعدايدا ۇلكەن كەسەكتەرگە بولىنبەي, كۇل بولىپ تۇسەدى. مۇنداي شىنى قۇرىلىسپەن قاتار, اۆتوكولىكتەرگە دە قولدانىلادى. ونىڭ ۇستىنە ونى كەز كەلگەن تۇسكە بوياۋعا بولادى.

ءىرى كاسىپورىن بولعاندىقتان, ارنايى ماماندار اۆتوكولىكتەر مەن ءتۇرلى تەحني­كالاردىڭ تەرەزەسىن جوندەۋمەن دە اينالىسادى. تاس ءتيىپ شىتىناعان شىنىنى دا جاساپ, دۇرىستاپ بەرەدى. 

– ءبىز كولىكتىڭ اينەكتەرىن دايىنداۋ-مەن دە, ورناتۋمەن دە اينالىسامىز. اينەك ارنايى قالىپتا بالقىتىلىپ, كولىككە لايىقتالادى. اۆتوكولىك تەرە­زەسى­نىڭ ءبىر ەرەكشەلىگى, اينەكتىڭ اراسىنا ۇلبىرەگەن پلەنكا ورنالاستىرىلادى. ەگەر قانداي دا ءبىر جول-كولىك وقيعاسى بولسا قالسا, مۇنداي شىنى جان-جاققا ۇشىپ, جولاۋشىعا قاۋىپ توندىرمەيدى. شىنى دايىن بولعان سوڭ ماماندار بارلىق بولشەكتى قايتا جيناپ, ورنىنا قويادى. ودان كەيىن اينەك 24 ساعات كەبەدى, – دەيدى ميحايل ەسىمدى جۇمىسشى.

سونداي-اق كاسىپورىندا قوعامدا جوعارى سۇرانىسقا يە پلاستيكالىق تەرەزە شىعارۋمەن دە اينالىسادى. بۇ­عان قاجەتتى كەيبىر ماتەريالدى وتان­دىق وندىرۋشىلەردەن الادى. تسەحتا قۇراستىرىلىپ, تۇتىنۋشىعا جونەلتىلەدى.

باسقا قالالاردى قايدام, وسكە­مەندەگى ون-ون بەس قاباتتى عيمارات­تاردىڭ جارق-جۇرق ەتىپ قاپتالىپ جاتقانى وسىنداعى وندىرۋشىلەردىڭ ەڭبەگى ەكەنىنە كوز جەتتى.

وسكەمەن