شەتەلدەگى قازاق جاستارىنىڭ اراسىندا عىلىمدا, مادەنيەتتە, بيزنەستە, شىعارماشىلىقتا بيىك بەلەستەردى باعىندىرىپ جۇرگەن دارىندى بۋىن قالىپتاسىپ كەلەدى. وسىنداي زەرەك تە تالاپتى قازاق جاستارىنىڭ ءبىرى – يراندا ومىرگە كەلگەن جاس قالامگەر اتريە چالاك.
اتريە چالاك يراننىڭ بەندەر-تۇرىكمەن قالاسىندا ءومىر ەسىگىن اشقان. جاسى جيىرمادا. جۋىردا ونىڭ پارسى تىلىندە جازىلعان تۇڭعىش كىتابى جارىق كوردى. بۇل جاڭالىقتى قازاق قوعامىنا سۇيىنشىلەگەن گەلحور جەمەنەيدىڭ ايتۋىنشا, جاس قالامگەردىڭ شىعارماسىندا جاستىق شاقتىڭ نازىك سەزىمى, ادامنىڭ ىشكى جان دۇنيەسىندەگى تولعانىس پەن پسيحولوگيالىق ارپالىس بەينەلەنەدى.