مەملەكەتىمىز بالالارعا العاشقى دەڭگەيدە كەشەندى مەديتسينالىق كومەك كورسەتۋدى دامىتۋعا كۇش سالىپ وتىر. سونىڭ ءبىر دالەلى, بىلتىر شىلدە ايىنان باستاپ مەديتسينالىق-سانيتارلىق العاشقى كومەك (مساك) ۇيىمدارىنىڭ 80%-ىندا پەدياتريالىق بولىمشەلەر قۇرىلدى.
بىلتىر قىركۇيەك ايىندا الماتىداعى بالالارعا شۇعىل مەديتسينالىق كومەك كورسەتۋ ورتالىعىندا جاڭا تۋعان نارەستەلەردى كۇتىپ-باپتايتىن زاماناۋي نەوناتولوگيا بولىمشەسى اشىلعان ەدى. ويتكەنى كەيبىر سابيلەر اۋىر جاعدايدا دۇنيەگە كەلەدى دە, شىر ەتىپ تۋعان ساتتەن باستاپ جانساقتاۋ بولىمىنە تۇسەدى. ايتالىق, ءبىر جىلدا وسى ورتالىقتا 235 نارەستە ەمدەلسە, ولاردىڭ 52-سىنە ءتۋابىتتى دامۋ كەمىستىگىنە بايلانىستى شۇعىل وپەراتسيا جاساۋعا تۋرا كەلگەن. كىشكەنتاي پاتسيەنتتەردىڭ كوبەيە ءتۇسۋى بولىمشە مۇمكىندىكتەرىن كەڭەيتە وتىرىپ, وزىق تەحنولوگيالارمەن جابدىقتالعان جاڭا ورىن اشۋدى تالاپ ەتەدى. سول تۇرعىدا ورتالىق بازاسىندا جاڭا تۋعان نارەستەلەردى جانساقتاۋ جاعدايىندا كۇتىپ-باپتاۋعا ارنالعان مامانداندىرىلعان بولىمشە جاساقتاۋ كەزەك كۇتتىرمەيتىن ماسەلەنىڭ بىرىنە اينالدى.
جاقىندا ورتالىق ديرەكتورى الىبەك سماعۇلوۆ وتكەن جىلى اتقارىلعان جۇمىسقا ەسەپ بەرە كەلىپ, جاڭادان اشىلعان نەوناتولوگيا بولىمشەسىنىڭ جاي-جاپسارى جونىندە دە جان-جاقتى باياندادى. بولىمشە ءبىر مەزەتتە 16 سابيگە كومەك كورسەتە الادى. جەدەل تۇردە جەتكىزىلگەن نارەستەلەرگە جانساقتاۋدان كەيىنگى قارقىندى ەم-دومعا قوسا, ەرتە وڭالتۋ قىزمەتى جۇرگىزىلەدى. بولىمشە اشىلعالى بەرى 103 جاڭا تۋعان نارەستەگە مەديتسينالىق كومەك كورسەتىلدى.
سونداي-اق بىلتىردان بەرى ورتالىقتا جاڭا تۋعان شاقالاقتان باستاپ 18 جاسقا دەيىنگى بالالاردى ەمدەيتىن 12 ورىندىق وتورينولارينگولوگيا, جاق-بەت حيرۋرگياسى بولىمشەسى تاۋلىك بويى قىزمەت كورسەتە باستادى. العاشقى بەس ايدا 83 بالاعا شۇعىل, جوسپارلى كومەك كورسەتىلدى. مۇنداي بولىمشەلەردىڭ اشىلۋى كورسەتىلەتىن مەديتسينالىق كومەكتىڭ اياسىن كەڭەيتۋگە سەرپىن بەرىپ وتىر.
بىلتىر 140,6 مىڭنان استام بالا مەديتسينالىق كومەك الدى, بۇل الدىڭعى جىلمەن سالىستىرعاندا 22,5%-عا كوپ. جوسپارلى تۇردە ەلىمىزدىڭ ءار شالعايىنان كەلگەن 1500-دەن استام كىشكەنتاي پاتسيەنتتەرگە ماماندان-دىرىلعان حيرۋرگيالىق, كونسەرۆاتيۆتى كومەك كورسەتىلدى.
بىلتىر ورتالىقتا دارىلىك زاتتار مەن مەديتسينالىق بۇيىمداردى ەسەپكە الۋدى قامتاماسىز ەتەتىن گوسپيتالدىق فارماتسيا بولىمشەسى دە اشىلىپ, حالىقارالىق GPP ستاندارتىنا ساي ەكەندىگىن راستايتىن سەرتيفيكات الدى. جىل قورىتىندىسىندا ورتالىق ەڭ جوعارى اككرەديتاتسيالىق ساناتقا يە بولىپ, ەلىمىزدەگى «ۇزدىك بالالار ستاتسيونارى» دەپ تانىلدى.
الماتى