ىنتىماقتاستىقتىڭ ىرگەلى نەگىزى

سەنات توراعاسى سارانگو رادناراگچاعا ءىلتيپات ءبىلدىرىپ, ەلىمىز بەن بۇۇ-نىڭ دايەكتى ىنتىماقتاستىعىنا نەگىز بولاتىن ىرگەلى قۇندىلىقتاردى اتاپ ءوتتى. سونداي-اق ول ەلىمىز ۇيىمنىڭ بارلىق قۇرىلىمىمەن تىعىز ءارى سىندارلى بايلانىستى ودان ءارى نىعايتۋعا مۇددەلى ەكەنىن ايتتى.

الەمدەگى گەوساياسي احۋالدى تال­قى­لاۋ بارىسىندا م.اشىم­باەۆ ەلىمىز داۋ-جانجالدى حا­لىق­ارالىق قۇقىق جانە بۇۇ جارعىسى اياسىن­دا ديپلو­ماتيا­لىق جولمەن بەيبىت شەشۋگە بەيىل ەكەنىن اتاپ ءوتتى.

ء«بىز تاياۋ شىعىستاعى احۋال­دىڭ كۇرت شيەلەنىسۋىن تەرەڭ الاڭ­داۋشىلىقپەن باقىلاپ وتىرمىز. پرەزيدەنت قاسىم-جومارت توقاەۆ جاعدايدىڭ ۋشىعۋىنا بايلانىستى پارسى شىعاناعىن­داعى بىرقاتار ەلدىڭ باسشى­لارىنا قولداۋ ءبىلدىردى. مەم­لە­كەت باسشىسى اتاپ وتكەندەي, ەلىمىز قاقتىعىستاردى تەزىرەك توقتاتۋدى, بارلىق تەكەتىرەستى ديالوگ پەن ديپلوماتيا ارقىلى بەيبىت رەتتەۋدى قولدايدى», دەدى م.اشىمباەۆ.

وسىعان وراي پالاتا توراعاسى ورتالىق ازيا ايماعىنىڭ قاۋىپ­سىزدىگىن نىعايتۋدا وزەكتى قۇرى­لىمنىڭ بىرىنە اينالعان بۇۇ-نىڭ الماتىداعى وڭىرلىك ورتا­لىعىنىڭ ماڭىزى تۋرالى ايتتى. ول ورتالىقتى قۇرۋ دەر كەزىن­دە قابىلدانعان شەشىم ەكە­نىن, بۇل قادام قازاقستان مەن بۇۇ اراسىنداعى سەنىمگە نەگىزدەلگەن قارىم-قاتىناستاردىڭ ناقتى ناتيجەسى سانالاتىنىن اتاپ ءوتتى.

كەزدەسۋدە سەنات توراعاسى ەلىمىزدە جۇرگىزىلىپ جاتقان كونستيتۋتسيالىق رەفورمانىڭ ىسكە اسىرىلۋ بارىسىنا دا توقتالدى.

«مەملەكەت باسشىسى بىل­تىرعى قىركۇيەكتە حالىققا ار­ناعان جولداۋىندا ءبىر پالاتالى پارلامەنت جۇيەسىنە كوشۋ تۋرالى باستاما كوتەرگەن ەدى. وسى ماقساتپەن كونستيتۋتسيالىق رەفورما جونىندەگى كوميسسيا قۇرىلىپ, ەلىمىزدىڭ ستراتەگيالىق دامۋ باسىمدىقتارىنا, قازىرگى جاھاندىق سىن-قاتەرلەرگە ساي جاڭا كونستيتۋتسيا جوباسى ازىرلەندى. جاڭا اتا زاڭ جوبا­سىندا قۇقىقتىق مەملەكەت قاعي­داتتارى, قورشاعان ورتانى قورعاۋ, ازاماتتاردىڭ قۇقىق­تارى مەن بوستاندىقتارىن قامتا­ما­سىز ەتۋ پرينتسيپتەرى بەكىتىل­گەن. ولار مەملەكەت ءۇشىن ەڭ جوعارى قۇندىلىقتار رەتىندە ايقىن­دالدى. اتالعان باستاما بويىنشا قورىتىندى شەشىمدى ەلىمىزدىڭ ازاماتتارى 15 ناۋرىزدا وتەتىن رەسپۋبليكالىق رەفەرەندۋمدا قابىلدايدى», دەپ م.اشىمباەۆ بۇۇ-نىڭ قازاقستانداعى تۇراقتى ۇيلەستىرۋشىسىنە جاڭا كونس­تيتۋتسيا جوباسىنىڭ ماڭىزدى ەرەجەلەرى تۋرالى ايتىپ بەردى.

سونىمەن قاتار ولار الداعى كەزەڭگە ارنالعان بىرلەسكەن جۇ­مىستىڭ باسىم باعىتتارىن جان-جاقتى تالقىلاپ, ورتالىق ازيا­­داعى ورنىقتى دامۋ ماقسات­تارىنا قول جەتكىزۋ جانە گەوساياسي شيەلەنىس جاعدايىندا ايماقتاعى كليماتتىق سىن-قاتەرلەردى ەڭسەرۋ ماسەلەلەرى تۋرالى پىكىرلەستى.

ءوز كەزەگىندە سارانگو راد­ناراگچا ەلىمىزگە ورنىقتى دامۋ ماقساتتارىنا قول جەتكىزۋ, ادام كاپيتالىن دامىتۋ, ينكليۋزيانى قامتاماسىز ەتۋ جانە بۇۇ-مەن سەرىكتەستىكتى نىعايتۋ باعىتىنداعى باستامالارى ءۇشىن العىس ءبىلدىردى. سونداي-اق ول كوپجاقتى قارىم-قاتىناستى ىلگەرىلەتۋگە, بىرقاتار باعىت بو­يىنشا بىرلەسكەن جوبالاردى ىسكە اسىرۋعا دايىن ەكەنىن جەتكىزدى.