ەكونوميكالىق ىنتىماقتاستىق جانە دامۋ ۇيىمى (ەىدۇ) قازاقستان رەسپۋبليكاسىنىڭ ەىدۇ-نىڭ قوعامدىق ادالدىق جونىندەگى ۇسىنىمىنا (OECD Recommendation on Public Integrity) قوسىلعانىن رەسمي تۇردە راستادى. بۇل تۋرالى ءتيىستى حاتتى ەىدۇ باس حاتشىسى ماتتياس كورمانن قازاقستان رەسپۋبليكاسى مەملەكەتتىك قىزمەت ىستەرى اگەنتتىگى توراعاسىنىڭ اتىنا جولدادى.
اتالعان شەشىم ەىدۇ-نىڭ قازاقستانداعى قوعامدىق ادالدىق جۇيەسى مەن ونىڭ ىسكە اسىرىلۋ تەتىكتەرىنە جۇرگىزگەن كەشەندى شولۋىنىڭ قورىتىندىلارى جانە ۇيىم اياسىنداعى بارلىق ءراسىمنىڭ تولىق اياقتالۋى نەگىزىندە قابىلداندى. شەشىم ەلىمىزدىڭ ادالدىق, سىبايلاس جەمقورلىققا قارسى ساياسات سالاسىندا ەىدۇ ستاندارتتارىن ەنگىزۋ جونىندەگى مىندەتتەمەلەردى قابىلداعانىن كورسەتەدى.
ەىدۇ-نىڭ قوعامدىق ادالدىق جونىندەگى ۇسىنىمى – مەملەكەتتىك باسقارۋ جۇيەسىندە ادالدىق مادەنيەتىن قالىپتاستىرۋعا, سىبايلاس جەمقورلىققا قارسى ءىس-قيمىلدىڭ زاماناۋي تاسىلدەرىن ورنىقتىرۋعا باعىتتالعان نەگىزگى حالىقارالىق قۇجاتتىڭ ءبىرى. ول 13 قاعيداتقا نەگىزدەلگەن جانە مەملەكەتتىك اپپاراتتىڭ بارلىق دەڭگەيىندە, سونداي-اق تۇتاستاي قوعامدا ادالدىقتى قامتاماسىز ەتۋدىڭ جۇيەلى, تاۋەكەلگە باعدارلانعان ءارى كونتەكستى ەسكەرەتىن تاسىلدەرىن ىسكە اسىرۋدى كوزدەيدى.
بۇل قادام مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان كاسىبي, ەسەپ بەرەتىن جانە ازاماتتارعا باعدارلانعان مەملەكەتتىك اپپاراتتى قالىپتاستىرۋ جونىندەگى رەفورمالاردىڭ ماڭىزدى كەزەڭى سانالادى. قازاقستاننىڭ ەىدۇ ۇسىنىمىنا قوسىلۋى – حالىقارالىق ستاندارتتارعا ءارى «ادىلەتتى قازاقستان» قاعيداتتارىنا ساي وزگەرىستەردىڭ ايقىن كورىنىسى.
مەملەكەتتىك قىزمەت ىستەرى اگەنتتىگى اتالعان ۇسىنىمعا قوسىلۋدى مەملەكەتتىك قىزمەت جۇيەسىن ودان ءارى جەتىلدىرۋدىڭ, ادەپ ستاندارتتارىن كۇشەيتۋدىڭ, سىبايلاس جەمقورلىققا قارسى تەتىكتەردى دامىتۋ مەن ازاماتتاردىڭ مەملەكەتتىك ينستيتۋتتارعا دەگەن سەنىمىن ودان ءارى ارتتىرۋدىڭ ءتيىمدى قۇرالى رەتىندە قاراستىرادى.
اگەنتتىك الداعى ۋاقىتتا دا مەملەكەت باسشىسىنىڭ مەملەكەتتىك باسقارۋ جۇيەسىنە وزىق حالىقارالىق تاجىريبەلەردى ەنگىزۋ, سىبايلاس جەمقورلىققا مۇلدەم توزبەۋشىلىك مادەنيەتىن قالىپتاستىرۋ جونىندەگى تاپسىرمالارىن تۇراقتى تۇردە ىسكە اسىرۋدى جالعاستىرادى.
ايتا كەتەيىك, ەىدۇ – ەكونوميكالىق جانە الەۋمەتتىك ساياسات, مەملەكەتتىك باسقارۋ, سىبايلاس جەمقورلىققا قارسى ءىس-قيمىل جانە قوعامدىق ينستيتۋتتاردى دامىتۋ سالالارىندا حالىقارالىق ستاندارتتار مەن ۇسىنىمدار ازىرلەيتىن بەدەلدى حالىقارالىق ۇيىم.