جي-ءدى وقۋ جۇيەسىنە ەنگىزۋ جەدەلدەيدى

عىلىم جانە جوعارى ءبىلىم مينيسترلىگىنىڭ تاراتقان اق­پا­راتىنا سۇيەنسەك, ەلىمىزدىڭ بۇل باستاماعا قوسىلۋى جاساندى ينتەللەكتىنىڭ «ChatGPT Edu» دەپ اتالاتىن ءبىلىم بەرۋگە ارنالعان ارنايى نۇسقاسىن ۇلتتىق ءبىلىم سالاسىنا جۇيەلى تۇردە ەنگىزۋدىڭ باستالعانىن بىلدىرە­دى. قازاقستان اتالعان حالىقارا­لىق باعدارلاماعا قاتىس­­قان ورتالىق ازياداعى العاش­قى مەملەكەت اتانىپ وتىر. «Edu for Countries» باعدارلاماسىنا قاتىسۋ ەلىمىزدىڭ ءبىلىم ساياساتى ءۇشىن ستراتەگيالىق ماڭىزعا يە. جاساندى ينتەللەكتىنىڭ وقىتۋ ۇدەرىسىنە ىقپالى جونىندەگى جاھاندىق پىكىرتالاستا قازاق­ستان جاساندى ينتەللەكت پەداگوگ­تى الماستىرمايتىنىن, كەرى­سىن­شە ونىڭ كاسىبي مۇمكىندىگىن كۇشەيتەتىنىن باسشىلىققا الادى. وسى رەتتە «ChatGPT Edu» جۇيەسىن قولدانۋ پەداگوگتەردىڭ اكىمشىلىك جانە ادىستەمەلىك جۇكتەمەسىن ازايتۋعا, سونداي-اق ساپالى ءارى جەكەلەندىرىلگەن وقىتۋعا قولايلى جاعداي جاساۋ­عا باعىتتالعان.

جوبا بىلتىر قاراشا ايىندا مەملەكەت باسشىسىنىڭ اقش-قا جاساعان رەسمي ساپارى بارىسىندا قول قويىلعان ىنتىماقتاستىق تۋرالى مەموراندۋم اياسىنداعى كەلىسىمدەر نەگىزىندە ىسكە اسادى. نەگىزگى كەلىسىم «OpenAI, Inc.», «Freedom Holding Corp.» جانە وڭىرلىك سەرىكتەس «Bilim Group» اراسىندا جاسالدى. جوبا مەملەكەتتىك بيۋدجەت نەمەسە سىرتقى گرانتتار تارتىلماي, جەكە قاراجات ەسەبىنەن جۇرگىزىلمەك.

پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ ەلىمىزدىڭ «Edu for Countries» باعدارلاماسىنىڭ العاشقى حالىقارالىق لەگىنە قوسىلۋى جاساندى ينتەللەكت جانە تسيفرلاندىرۋ جىلىمەن تۇسپا-تۇس كەلىپ, بۇل ءبىزدىڭ جاساندى ينتەللەكتىنى نەگىزگى سالالارعا جۇيەلى تۇردە ەنگىزۋگە باعىتتالعان ۇستانىمىمىزدى كورسەتەتىنىن ايتادى.

ال عىلىم جانە جوعارى ءبىلىم ءمينيسترى ساياسات نۇربەك: ء«بىز OpenAI» كومپانيا­­سىمەن ارىپتەستىكتى بولاشاق ءبىلىم بەرۋ مودەلىنىڭ نەگىزىن قالايتىن بىرەگەي جوبا رەتىندە قاراستىرامىز, ال «ChatGPT Edu»-ءدى وقىتۋشى مەن زەرتتەۋشىنىڭ مۇمكىندىكتەرىن الماستىرمايتىن, كەرىسىنشە كەڭەيتەتىن كەشەندى شەشىم دەپ بىلەمىز. جاساندى ينتەللەكت – ادامدى الماستىراتىن قۇرال ەمەس, سىني ويلاۋ مەن ونى قولدانۋ مادەنيەتى قالىپتاسقان جاعدايدا ويلاۋ قابىلەتىن كۇشەيتەتىن قۇرال. ءبىلىم مەن عىلىم سالاسىندا جي وقۋ ماتەريالدارىن ازىرلەۋدى جەدەلدەتۋگە, ستۋدەنتتەرمەن كەرى بايلانىستىڭ ساپاسىن ارتتىرۋعا جانە زەرتتەۋ جۇمىستارى ءۇشىن جاڭا مۇمكىندىكتەر اشۋعا جول اشادى», دەدى.

«ChatGPT Edu» پەداگوگتەرگە وقۋ ماتەريالدارىن, تاپسىرمالار مەن تەستتەردى دايىنداۋعا, كونتەنتتى ءبىلىم الۋشىلاردىڭ دەڭگەيىنە بەيىمدەۋگە, سونداي-اق قازاق, ورىس جانە اعىلشىن تىلدەرىندە وقۋ ماتەريالدارىن ازىرلەۋگە جاعداي جاسايدى. جۇمىستاردى تەكسەرۋ بارىسىندا جۇيە باعالاۋ كريتەريلەرىن قالىپتاستىرۋعا جانە كەرى بايلانىس ازىرلەۋگە قولدانىلۋى مۇمكىن, الايدا باعالاۋعا قاتىستى بارلىق شەشىم تولىقتاي وقىتۋشىنىڭ قۇزىرەتىندە قالادى.

وسىعان قاتىستى وقۋ-اعارتۋ ءمينيسترى جۇلدىز سۇلەيمەنوۆا جاساندى ينتەللەكتىنى ءبىلىم جۇيەسىنە ەنگىزۋدى پەداگوگتەردىڭ ءرولىن كۇشەيتۋگە باعىتتالعان ستراتەگيالىق قادام رەتىندە قاراستىراتىنىن جەتكىزدى.

«جاساندى ينتەللەكت پەداگوگكە ءتان ەمەس بىرقاتار مىندەتتى ءوز موينىنا الىپ, ونىڭ سەنىمدى كومەكشىسىنە اينالادى. «ChatGPT Edu» سەكىلدى قۇرالدار پەداگوگتەردىڭ زياتكەرلىك سەرىكتەسىنە اينالىپ, ولاردىڭ مۇمكىندىكتەرىن كەڭەيتەدى. سونداي-اق ءار ءبىلىم الۋشىعا جەكە ءتاسىلدى كۇشەيتەدى. جي – دايىن جاۋاپتاردىڭ كوزى ەمەس, ويلاۋ, جاۋاپكەرشىلىك جانە تسيفرلىق مادەنيەتتى دامىتۋعا ارنالعان رەسۋرس. ول ءارتۇرلى دايىندىق دەڭگەيىندەگى وقۋشىلارعا ارنالعان سارالانعان وقۋ ماتەريالىن جەدەل ازىرلەۋگە, كەرى بايلانىستىڭ تيىمدىلىگىن ارتتىرۋعا جانە ءبىلىم الۋشىلاردىڭ زاماناۋي تەحنولوگيالارمەن جۇمىس ىستەۋ داعدىلارىن قالىپتاستىرۋعا كومەكتەسەدى», دەدى ول.

وسى قاڭتار ايىنان «OpenAI» ماماندارىمەن بىرلەسىپ, «ChatGPT Edu» جۇيەسىن ءبىلىم بەرۋ, اكىمشىلىك جانە عىلىمي زەرتتەۋ قىزمەتىندە پراكتيكالىق تۇرعىدا قولدانۋ بويىنشا پايدالانۋشىلاردى تۇراقتى وقىتۋدى ۇيىمداستىرۋ باستالدى. بۇل جاساندى ينتەللەكتىنى قولدانۋدا بىرىڭعاي تاسىلدەردى قالىپتاستىرىپ, پەداگوگتەردىڭ تسيفرلىق ءارى AI-ساۋاتتىلىعىن ارتتىرۋعا مۇمكىندىك بەرەدى.