ەلوردادا Taldau Run ءداستۇرلى سپورتتىق ءىس-شاراسى ءوتتى. جۇگىرۋگە 400-دەن اسا سالاماتتى ءومىر سالتىن دارىپتەپ جۇرگەن بەلسەندى ازاماتتار قاتىستى. ولاردىڭ قاتارىندا پارلامەنت دەپۋتاتتارى مەن مەملەكەتتىك جانە قوعامدىق ۇيىمداردىڭ, تالداۋ قۇرىلىمدارىنىڭ وكىلدەرى بار.
سەنات توراعاسى ماۋلەن اشىمباەۆ اتاپ وتكەندەي, مەملەكەت باسشىسىنىڭ باستاماسىمەن بۇگىندە بارلىق سالادا كەشەندى وزگەرىستەر جۇرگىزىلىپ جاتىر. جاڭا كونستيتۋتسيا مەملەكەتتىك باسقارۋدىڭ زاماناۋي ءارى ءتيىمدى ۇلگىسىنە كوشۋىن قامتاماسىز ەتۋ جانە ازاماتتاردىڭ ەلىمىزدىڭ قوعامدىق-ساياسي ومىرىنە قاتىسۋ قۇقىقتارىن كەڭەيتۋ جونىندەگى رەفورمالاردىڭ ناقتى ناتيجەسى ەكەنى ءسوز بولدى.
م.اشىمباەۆ وسىنداي ءىس-شارالارعا قاتىسۋ ناعىز ازاماتتىق بەلسەندىلىكتىڭ جارقىن كورىنىسى ەكەنىن ايتتى. بۇل – سانالى جانە جاۋاپتى ازاماتتىق ۇستانىمدى قالىپتاستىرۋ جولىنداعى ماڭىزدى قادام.
«پرەزيدەنت قاسىم-جومارت توقاەۆتىڭ جارلىعىمەن 15 ناۋرىزدا جاڭا كونستيتۋتسيا جوباسىنا بايلانىستى رەسپۋبليكالىق رەفەرەندۋم وتەدى. وسى ورايدا باستى نارسەگە نازار اۋدارۋىمىز كەرەك. ياعني تۇپكىلىكتى ءسوزدى حالىق ايتادى. سوندىقتان اركىم ءوز ۇستانىمىن ءبىلدىرىپ, ەلىمىزدىڭ بولاشاعىن ايقىندايتىن رەفەرەندۋمعا قاتىسۋ ەرەكشە مانگە يە. بۇگىن وسىلاي بەلسەندى, سىني ويلاي الاتىن, ەل ەرتەڭىنە بەيجاي قارامايتىن ورتادا جاڭا كونستيتۋتسيا تۋرالى ايتۋىمىزدىڭ سيمۆوليكالىق ماعىناسى تەرەڭ دەپ ەسەپتەيمىن. سىزدەردىڭ ارقايسىڭىز اينالاڭىزدى جاسامپازدىققا شاقىرىپ, ۇلگى كورسەتىپ كەلەسىزدەر. مۇنى الداعى جاڭارۋلارعا ىقپال ەتەتىن ىنتالاندىرۋدىڭ وزىق ۇلگىسى دەپ قابىلدايمىز», دەپ سەنات توراعاسى قالا اكىمدىگىنە سپورتتىق ءىس-شارانى ۇيىمداستىرۋعا قولداۋ كورسەتكەنى ءۇشىن العىسىن ءبىلدىردى.