دەنساۋلىق ساقتاۋ مينيسترلىگىنىڭ مالىمەتىنە سۇيەنسەك, 2025 جىلدىڭ باسىندا شامامەن 600 مىڭعا جۋىق وتانداسىمىزعا ءتۇرلى سيپاتتاعى نەۆرولوگيالىق دياگنوزدار قويىلعانى تىركەلگەن, دەپ حابارلايدى Egemen.kz.
وسى ورايدا ەڭ كۇردەلى ماسەلەلەردىڭ ءبىرى – ينسۋلت بولىپ تۇر. 2024 جىلى ينسۋلتقا 49 مىڭداي ادام دۋشار بولسا, ولاردىڭ ءاربىر بەسىنشىگە جۋىعى ستاتسيوناردا نەمەسە اۋرۋحانادان شىققاننان كەيىنگى العاشقى ءبىر اي ىشىندە قايتىس بولعان. سوندىقتان ەلىمىزدە نەۆرولوگيالىق اۋرۋلاردىڭ بەلەڭ الىپ تۇر دەۋگە نەگىز بار.
التسگەيمەر اۋرۋىنا شالدىققان ناۋقاستاردىڭ دا قاتارى قارقىندى ءوسىپ جاتقانى بايقالادى, ويتكەنى ەكى جىل ىشىندە بۇل كورسەتكىش 62,6%-عا جەتتى. الايدا مامانداردىڭ پىكىرىنشە, رەسمي ستاتيستيكا دەمەنتسياعا شالدىققان ادامداردىڭ ناقتى سانىنىڭ تەك 10–15%-ىن عانا قامتيدى.
ال پاركينسون اۋرۋى 13 343 ادامدا انىقتالسا, شاشىراڭقى سكلەروز 3 885 ناۋقاستا تىركەلگەن, ءارى بۇل دەرت جاستار اراسىندا دا ءجيى انىقتالا باستادى.
قازاقستاندا نەۆرولوگيالىق اۋرۋلار سانىنىڭ ارتۋىنا اسەر ەتەتىن قوسىمشا فاكتورلاردىڭ ءبىرى – مامانداردىڭ يىعىنا تۇسەتىن سالماق. ماسەلەن, مەملەكەتتىك سەكتوردا مەديتسينا قىزمەتكەرلەرىمەن جاساقتالۋ دەڭگەيى 90%-دان اسقانىمەن, بۇل كورسەتكىش قوسىمشا جۇمىس كوزى نەمەسە ءبىر قىزمەتكەردىڭ بىرنەشە ستاۆكا ەسەبىنەن قامتاماسىز ەتىلىپ وتىر.
سول سياقتى جەكەمەنشىك سەكتورداعى كادر تاپشىلىعى شامامەن 20%-عا جەتەدى, اسىرەسە امبۋلاتوريالىق بۋىندا. ياعني, جۇيە ەڭبەك قارقىندىلىعىن ارتتىرۋ ەسەبىنەن جۇمىس ىستەپ تۇر, بۇل كاسىبي تۇرعىدا قاجۋدى كۇشەيتىپ, تۇراقتىلىقتىڭ تومەندەۋىنە اكەلۋى مۇمكىن.
سونىمەن ەم-دومداردىڭ شيپاسىن ارتتىرۋ, يننوۆاتسيالىق ەمدەۋ ادىستەرى مەن تسيفرلىق شەشىمدەردى ەنگىزۋ ماسەلەلەرى 2026 جىلعى 27–28 اقپان كۇندەرى الماتىدا ءوتىپ جاتقان IV ورتالىق ازيا نەۆرولوگيالىق فورۋمىنىڭ وزەكتى تاقىرىبىنا اينالدى.
مەديتسينا قىزمەتىندە كەمشىلىك بولماۋعا ءتيىس
حالىقارالىق فورۋمدا «قانتامىرلىق دەمەنتسيانىڭ الدىن الۋ: جاساندى ينتەللەكت كومەگى شىنايى ما؟», «يشەميالىق ءينسۋلتتىڭ جەدەل كەزەڭىندە نەيرومەتابوليكالىق تەراپيانىڭ مۇمكىندىكتەرى», «دارىگە ءتوزىمدى ەپيلەپسيانى دياگنوستيكالاۋداعى ستەرەوەەگ», «ينسۋلت العان ناۋقاس: ءتۇرلى ساتىداعى وڭالتۋدىڭ ساباقتاستىعى» تاقىرىپتارىندا باياندامالار تىڭدالدى. فورۋم دەنساۋلىق ساقتاۋ جۇيەسىنىڭ تۇراقتىلىعىن قامتاماسىز ەتۋ ستراتەگيالارىن جانە زاماناۋي كلينيكالىق حاتتامالاردى ەنگىزۋ ماسەلەلەرىن تالقىلاۋعا ارنالعان الاڭ بولماق.
قوسىمشا مەديتسينالىق ءبىلىم ساپاسىنا قويىلاتىن تالاپ كۇشەيدى