وي – پاراساتى بيىك, كوكىرەگى وياۋ ادامزات بالاسى سوڭىنان جاقسى ءىز قالدىرۋدى, حالىققا شىنايى قىزمەت ەتۋدى ماقسات ەتەدى. ءابۋ ءناسىر بابامىز «قارا قىلدى قار جارعان – جاقسىلاردىڭ بەلگىسى» دەگەن ەدى ءبىر ناسيحاتىندا. سول ايتقانىنداي, قازاق جەرىندە حالقىنا ادال, جاۋىنا قاتال بولعان, ىزگىلىك پەن ادىلدىكتى تۋ عىپ ۇستاعان ەرلەر وتكەن. سولاردىڭ ءبىرى – وتان سوعىسىنىڭ ارداگەرى, ۇلاعاتتى ۇستاز, ءادىل زاڭگەر جوكىش جارىلعاپ.
ول كىسى تۋرالى ءسوز قوزعالعاندا زاڭ سالاسىنداعى ازاماتتار, اسىرەسە, پروكۋراتۋرا قىزمەتكەرلەرى مارقۇم جوكىش جارىلعاپ ۇلىنىڭ اتقارعان قىزمەتتەرى مەن ونەگەگە تولى ەڭبەكتەرىن جايىپ سالادى. 1920 جىلى اقتوعاي اۋدانىنا قاراستى قىزىلاراي اۋىلىندا دۇنيەگە كەلگەن ونىڭ بالالىق شاعى اۋىر دا قيىن كەزەڭدەرگە ءدوپ كەلدى. سول ۋاقىتتاردا اشارشىلىق ناۋبەتىنەن توز-توز بولعان حالىقتىڭ اراسىنان بولاشاق زاڭگەر جان دەگەندە جالعىز اپاسىمەن باس ساۋعالاپ, پەتروپاۆل قالاسىنداعى بالالار ءۇيىن پانالاعان ەكەن. اتا-انادان جاستاي ايىرىلعان قوس بۇلدىرشىنگە مەيىرىن توككەن جاڭا وتباسى ءتالىم-تاربيە بەرىپ, باعىپ-قاعادى.
بالالىعىن بالالار ۇيىندە وتكىزگەن كەيىپكەرىمىز ونىڭ بەرگەن ءبىلىمىن بويىنا ءسىڭىرىپ, مەكتەپتى التىن مەدالمەن بىتىرەدى.سول داۋىرلەردە جاستاردى كادر جەتىسپەۋىنە بايلانىستى مەكتەپتى جوعارى باعاعا ءتامامداسا بولدى, ورتا بىلىمدىلىگىنە قاراماستان, جۇمىسقا قابىلداعان. مىنە, سونداي ساياساتتىڭ شەڭبەرىندە جوكىش جارىلعاپ اقمولا وبلىسىنىڭ كەڭەس اۋىلىنداعى قازاق ورتا مەكتەبىنە مۇعالىم ەمەس, باسشى بولىپ تاعايىندالادى. ونىڭ بىلىمدىلىگى مەن بىلىكتىلىگى, تاجىريبەلىلىگى اۋداندىق كەڭەس اتقارۋ كوميتەتى باسشىلارىنىڭ كوڭىل اۋدارۋىنا سەپتىگىن تيگىزەدى. سول كەزدە جاس مامان جوعارى مەملەكەتتىك ورگانعا ەڭبەك نۇسقاۋشىسى رەتىندە جۇمىسقا شاقىرىلادى.
كەيىن الماتى قالاسىنداعى زاڭ ينستيتۋتىنا وقۋعا ءتۇسىپ, وقىپ جۇرگەن شاعىندا سۇراپىل سوعىس باستالىپ, اسكەر قاتارىنا الىنادى. قىزىل اسكەر ساپىندا سوعىستىڭ ءبىرىنشى كۇنىنەن ۇرىسقا قاتىسىپ, بالتىق بويى مايدانىندا ءجۇرىپ, فاشيستەر باسىپ العان ليتۆانىڭ استاناسى ۆيلنيۋس قالاسىن جانە بەلورۋسسيانىڭ ليدا شاھارىن ازات ەتۋدە ەرەكشە ەرلىك تانىتقانى ءۇشىن جوعارى ناگرادالارعا ۇسىنىلادى. ول سونداي-اق, سوعىس جىلدارىندا ساپەرلىك باتالونىندا قىزمەت ەتىپ, كەڭەس اسكەرلەرىن, كولىكتەرىن جاۋ ميناسىنان ساقتاندىرۋ قاۋىپسىزدىگىن قامتاماسىز ەتەدى. وتان سوعىسى جىلدارىندا كورسەتكەن ۇلگىلى جانە ەرلىك ىستەرى ءۇشىن اسكەري باسشىلىقتىڭ العىسىنا جانە مەدالدارى مەن وردەندەرىنە يە بولادى.
سوعىستان امان ورالعان جوكىش جارىلعاپ ۇلى زاڭ ينستيتۋتىنداعى وقۋىن قايتا جالعاستىرىپ, 1947 جىلى اياقتايدى. ءومىر مەكتەبىنەن تۇيگەنى مول, كەمەلىنە جەتكەن ونىڭ ءىس-تاجىريبەسى, جۇمىس ءادىسى سوت جۇيەسىنىڭ باسشىلىعىن قاتتى قىزىقتىرادى. اقتوعاي اۋداندىق سوتىندا سوت ورىنداۋشىسى قىزمەتىن ءمىنسىز اتقارا ءجۇرىپ, پروكۋرورلىق ىستەردى ۇيرەنەدى. از ۋاقىتتان سوڭ وسى اۋداندا پروكۋروردىڭ كومەكشىسى, كەيىن پروكۋرور لاۋازىمىنا اۋىسىپ, ادىلدىك تىزگىنىن مىقتاپ ۇستايدى. ءوز ومىرىندە تالاي اۋىر قىلمىستاردىڭ بەتىن اشىپ, قىلمىسكەرلەردىڭ جىمىسقى ارەكەتتەرىن اشكەرەلەپ, زاڭ سالاسىنىڭ دامۋىنا سالماقتى ۇلەس قوسادى.
1950 – 1987 جىلدار ارالىعىندا مارقۇم كوپتەگەن وڭىرلەردە, كوبىرەك قاراعاندى وبلىسىنىڭ ساران, شاحتينسك قالالارىندا پروكۋرورلىق قىزمەتىن ارقاشان ادال اتقارىپ, سىبايلاس جەمقورلىققا قارسى كۇرەسىپ, ەلدى ءادىل جانە شىنشىل ەڭبەك ەتۋگە شاقىرعان.وزات زاڭگەر, اعا ادىلەت كەڭەسشىسى جوكىش جارىلعاپ تاربيەلەگەن زاڭگەرلەردىڭ كوپشىلىگى بۇگىندە بيىك ابىروي-بەدەلگە يە.
امانكەلدى تۇرجانوۆ,
جۋرناليست.
قاراعاندى وبلىسى.