قازاقستاندا العاشقى 7 ايدا بولشەك ساۋدا كولەمى 2,9 پايىزعا ءوسىپ, سوماسى 3 ترلن. 328 ملرد. تەڭگەگە جەتتى. ۇلتتىق ەكونوميكا مينيسترلىگى ستاتيستيكا كوميتەتىنىڭ حابارلاۋىنشا, وسى جىلدىڭ قاڭتار-شىلدە ايلارىندا ساۋدا كاسىپورىندارى ارقىلى تاۋارلاردى وتكىزۋ كولەمى 2014 جىلدىڭ سايكەس مەرزىمىمەن سالىستىرعاندا 0,1 پايىزعا تومەندەپ, 1 ترلن. 772 ملرد. تەڭگەنى قۇراعان.
قازاقستاندىقتار ماۋسىم ايىندا تولەم كارتالارى ارقىلى 22,9 ملن. ترانزاكتسيا جاسادى. ۇلتتىق بانكتىڭ ستاتيستيكالىق مالىمەتتەرىنە سۇيەنسەك, بۇل وتكەن جىلعى ماۋسىم ايىنداعى كورسەتكىشتەن 10,2 پايىزعا كوپ. ءبىر ايدا جاسالعان ترانزاكتسيالاردىڭ كولەمى 687,4 ملرد. تەڭگە بولدى.
بيىل استانادا جىلۋ قۇبىرلارىن جاڭارتۋعا 533 ملن. 933 مىڭ تەڭگە قاراستىرىلىپ وتىر. «استانا-تەپلوترانزيت» اق وندىرىستىك قىزمەتىنىڭ جەتەكشىسى ءماجيت شوناەۆتىڭ ايتۋىنشا, ول جۇمىستار جىل سوڭىنا دەيىن اياقتالادى. كومپانيا جىل سايىن ەلوردادا ەكى ەسەلەنگەن 13-14 شاقىرىم جىلۋ قۇبىرلارىن الماستىرىپ كەلەدى.
الماتى وبلىسىنداعى «اميران» ءسۇت زاۋىتىندا 247 جۇمىس ورنى اشىلدى. كاسىپورىندا 2015 جىلدىڭ 4 ايى ىشىندە 315,2 توننا ءسۇت وڭدەلىپ, 203,8 ملن. تەڭگەگە 394 توننا ءونىم ءوندىرىلدى. جالپى, ءوندىرىس ورنى جىلىنا 1 500 توننا بالالارعا ارنالعان ءسۇت ونىمدەرىن دايىنداۋعا ارنالعان.
شىمكەنتتە تابىسى تومەن 600-دەن استام وتباسىعا اتاۋلى الەۋمەتتىك كومەك كورسەتىلدى. قالا اكىمى دارحان ساتىبالدىنىڭ ايتۋىنا قاراعاندا, وسى ماقساتتا 19,1 ملن. تەڭگە جۇمسالعان. سونداي-اق, 18 جاسقا دەيىنگى بالالارعا ارنالعان 447,5 ملن. تەڭگە جاردەماقى جانە 674 وتباسىعا 22,3 ملن. تەڭگە كولەمىندە تۇرعىن ءۇي كومەگى تولەندى.
قوستاناي وبلىسىندا سوڭعى بەس جىلدا 4,4 مىڭ اۋىل شارۋاشىلىعى تەحنيكالارى ساتىپ الىندى. وبلىس اكىمىنىڭ ورىنباسارى بازىل جاقىپوۆتىڭ مالىمدەۋىنشە, وعان 46 ملرد. تەڭگە جۇمسالعان. بيىلدىڭ وزىندە وڭىردە 206 تراكتور, 74 كومباين, 40 ەگىس كەشەنى, 90 تۇقىم سەپكىش جانە 220 دانا وزگە دە تەحنيكا ساتىپ الىنعان.
باتىس قازاقستاندا بيىل رەسپۋبليكالىق ماڭىزى بار جولداردى كۇتىپ-ۇستاۋ ءۇشىن 600 ملن. تەڭگە ءبولىندى. «قازاقاۆتوجولدىڭ» باتىسقازاقستاندىق فيليالى ديرەكتورىنىڭ مىندەتىن اتقارۋشى باۋىرجان تەمىرحانوۆ مۇنداي جولدىڭ كولەمى وڭىردە 1 287 شاقىرىمدى قۇرايتىنىن جەتكىزدى.
حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «24kz» تەلەارناسىنىڭ دەرەكتەرى بويىنشا دايىندالدى.