ەكولوگيالىق سەنبىلىكتەر جالعاستىرىلا بەرمەك.بۇل كۇندە ءوندىرىستى ءوڭىردىڭ قالالارى مەن اۋداندارى ورتالىقتارىندا, الىستاعى ەلدى مەكەندەر, كولدەر مەن وزەندەر جاعالاۋلارى, ورمان-توعاي اينالاسى كوز تارتارلىق بەينەگە ەنىپ, جايناپ-قۇلپىرعان كورىنىستەر كوڭىل كوركەيتۋدە. بۇل جولى “بىرلىگىمىز جاراسقان!” اكتسياسى اياسىندا بارلىق جەردە ءوتىپ جاتقان “اۋىلدىڭ گۇلدەنۋى – قازاقستاننىڭ گۇلدەنۋى” اتتى شاراعا ۇلكەن قولداۋ كورسەتۋشى ۇكىمەتتىك ەمەس جانە جاستار ۇيىمدارى قورشاعان ورتانى تازارتۋ, كوركەيتۋ جۇمىستارىن جۇمىلا اتقارۋدا.
الدىمەن تەمىرتاۋلىقتار باستاعان وسىناۋ يگىلىكتى ءىس سامارقان سۋ قويماسىنىڭ كوپشىلىك دەمالاتىن ورىندارىن اباتتاندىرۋعا ارنالدى. اتالعان ۇيىمدار بەلسەندىلەرى قاتارىنا كەلىپ قوسىلعان قالا تۇرعىندارى ەكى كۇن بويىندا جاساندى كول توڭىرەگىن جۇرتشىلىق سۇيسىنە تىنىعاتىن ورىنعا اينالدىردى.
شاپاعاتى مول شارانى ءىلىپ اكەتكەن بالقاشتىقتار بولسا شاھار ىرگەسىندەگى ايدىن جاعالاۋلارىن تازارتۋدى قولعا الدى. بۇعان ۇيىتقى بولعان “جاس وتان” جاستار قاناتى, “بالقاش جاستار كلۋبى”, ستۋدەنتەر اليانسى, “مۇراگەر” سياقتى ۇيىمدار مۇشەلەرى وعان قاتىسۋشىلاردىڭ بەل ورتاسىندا ءجۇردى.
جاڭاارقا اۋدانىنىڭ ورتالىعى – اتاسۋ كەنتىندەگى و. باۋبەكوۆ اتىنداعى ساياباق تا وسى شارانىڭ ارقاسىندا اجارى كىرە ءتۇستى. “بىرلىگى بەكەم ەلدىڭ بەرەكەسى مول بولماق” دەگەن ۇراندى الىسقا جاڭعىرتىپ, باس قوسقان جەرگىلىكتى جىگىتتەر مەن قىزدار ەڭبەگىنەن كەيىن ساياباق ءىشى جايناپ سالا بەردى. وزدەرى ويناپ جۇرگەن قۇرال-قوندىرعىلاردىڭ سىرلانىپ, جوندەلۋىنە, اسىرەسە, بالدىرعاندار قۋانىشتى بولدى. پريوزەرسك كەنتىنىڭ ساياباعى دا ساندەندى. مۇندا ۇلكەندەرمەن بىرگە ورتاق ىسكە اتسالىسقان بالالارعا بالمۇزداقتار سىيعا تاراتىلدى.
ەكولوگيالىق سەنبىلىكتەر جالعاستىرىلا بەرمەك. ول بۇگىندە قالىپتى ۇردىسكە اينالىپ كەلەدى. بوتاقارا اۋىلىنىڭ جاستارى نۇرا وزەنى بويىن كۇل-قوقىستان تازارتۋعا شىقسا, قارقارالىلىق قۇربى-زامانداستارى ورمان ءىشىن تازالاۋدى ۇيعاردى.
– قازىرگى جايناعان ءومىر تالاپ-تالعامىنا تاماشا جاراستى مۇنداي شارالارعا باستاماشى بولىپ, جارقىراتىپ كوتەرگەن جاستارعا رازىلىعىمىز بولەك. تۇپكى ماقساتى ماعىنالى, تاربيەلىك ءمانى زور ءىستى ءبارىمىز قوستايمىز,–دەپ تەمىرتاۋلىق ازامات جاناس ارىسوۆ ايتقانداي, اينالانى جاساندىرۋ وبلىستا بۇل كۇندە مەرەيلى مىندەتكە اينالىپ تۇر.
قاراعاندى وبلىسى.