شىمكەنتتە «تازا قازاقستان» اكتسياسى اياسىندا «تازا شىم» جوباسى ىسكە اسىرىلىپ, وعان قالانىڭ بەلسەندى جاستارى اتسالىسىپ كەلەدى. جاقىندا جاستار تۇران اۋدانىنا قاراستى اقتاس ەلدى مەكەنىنە بارىپ, اۋماقتى قوقىستان تازالادى. ءوز كەزەگىندە اۋدان اكىمدىگىنىڭ ماماندارى دا جاستارعا قولعابىس كورسەتتى. قاجەتتى قۇرال-سايمان, تەحنيكامەن قامتاماسىز ەتتى.
جالپى, قىس مەزگىلىندە قالا تۇرعىندارى اقتاس اۋىلىنا كەلىپ سىرعاناق تەپكەندى ۇناتادى. الايدا كەي جاعدايدا تابيعات اياسىندا دەمالۋشىلار تازالىق ەرەجەلەرىن ۇمىت قالدىرىپ جاتادى. سونىڭ سالدارىنان قورشاعان ورتانىڭ كەيپىن بۇزعان قوقىستار پايدا بولادى. ولاردى جيناۋعا جالعىز اۋىل تۇرعىندارىنىڭ شاماسى جەتپەيدى. سول سەبەپتى قالا جاستارى اقتاستىقتارعا كومەككە كەلدى. ۇيىمداستىرۋشىلاردىڭ ايتۋىنشا, ءىس-شارانىڭ ماقساتى – اينالانى تەك قوقىستان تازارتۋ ەمەس, سونىمەن بىرگە, تۇرعىنداردى قالانى تازا ۇستاۋعا شاقىرۋ. تازالىق اكتسياسى سونىسىمەن دە ماڭىزدى. اينالا مۇنتازداي تازا بولسا, بىرىنشىدەن, تۋعان جەردىڭ ەكولوگياسىنا پايدا, ەكىنشىدەن, تۇرعىنداردىڭ قوعامدىق جاۋاپكەرشىلىگىنىڭ جوعارى ەكەنىن كورسەتەدى. مۇنداي باستاماعا جاستاردىڭ تارتىلۋى كەلەشەك ساپالى ۇرپاقتىڭ قالىپتاسۋىنا نەگىز قالايدى.
«تازالىق ءار وتباسىنان باستالۋى كەرەك. وسى ورايدا جاستاردىڭ بەلسەندى ارالاسۋىمەن شاھاردا «تازا شىم» جوباسى ءساتتى جۇزەگە اسىرىلىپ جاتىر. تازالىق ءىس-شاراسىندا ەرەكشە كوزگە تۇسكەن ەرىكتى جاستارعا ايتار العىسىمىز زور. جوعارى وقۋ ورىندارىنىڭ ستۋدەنتتەرى جۇمىس تا ىستەپ, اراسىندا فلەشموب ۇيىمداستىرىپ تا ۇلگەرىپ ءجۇر. «تازا قازاقستان» اكتسياسى قالا, ەلدى مەكەندەردى قوقىستان تازارتۋمەن قاتار, ادامداردىڭ بويىندا تازالىق مادەنيەتىن قالىپتاستىرۋعا ۇندەيدى. قورشاعان ورتانىڭ تازالىعىنا ءمان بەرۋ ادام بويىندا وتانعا دەگەن سۇيىسپەنشىلىك سەزىمىن وياتادى. جاستاردى تابيعاتتى ايالاۋعا ۇيرەتەدى. سول تۇرعىدا «تازا قازاقستان» اكتسياسى, ونىڭ اياسىندا ىسكە اسىپ جاتقان «تازا شىم» جوباسى ءارى تازالىقتى كوزدەگەن, ءارى رۋحاني كەمەلدىككە ۇندەگەن ماڭىزدى باستاما. اقتاس ەلدى مەكەنىندە ۇيىمداستىرىلعان تازالىق ءىس-شاراسىنا شىمكەنتتىڭ ەكى جۇزگە جۋىق ەرىكتى جاسى قاتىستى», دەيدى مەگاپوليستەگى جاستار رەسۋرستىق ورتالىعىنىڭ باسشىسى جانسەرىك جۇمان.
اكتسيا بارىسىندا قاتىسۋشىلار «تازالىقتى ساقتاۋ ءبىر كۇندىك ناۋقان ەمەس, كۇندەلىكتى داعدى بولۋعا ءتيىس» دەگەن پىكىردى العا تارتىپ, بارشانى وسى قاعيدانى قالىپتى ۇستانۋعا شاقىردى. جاستاردىڭ ۇيىمداسۋىمەن وتكەن ءىس-شارا شاھاردىڭ تازالىعىنا عانا ەمەس, قوعامنىڭ ەكولوگيالىق ساناسىنىڭ ويانۋىنا دا ءوز سەپتىگىن تيگىزەدى.
شىمكەنت