جاز مەزگىلى تۋىسىمەن اق قۇم, التىن جاعالاۋلى تەڭىز جاعاسى ناعىز تاپتىرماس دەمالىس ورنى. الايدا, وسى تەڭىز تۇبىنە قانشا جان جۇتىلىپ, قانشاما قايعىلى-قاندى وقيعالار ورىن الىپ جاتىر دەسەڭىزشى...
دەرەك كوزدەرى جاز باستالىسىمەن كاسپي تەڭىزىنە 7 ادامنىڭ سۋعا كەتكەندىگىن ايتۋدا. بۇگىنگى كۇنگە دەيىنگى سوڭعى قايعىلى وقيعا 21 ماۋسىم كۇنى اقتاۋ قالاسىنان 25 شاقىرىم قاشىقتاعى «شورا» جاعالاۋىندا تىركەلدى. وسى كۇنى ءبىر وتباسىنىڭ 17 جانە 21 جاستاعى ەكى بىردەي بالاسى سۋعا كەتتى.
تايىز بولعانمەن, اعىسى قاتتى شورا قاۋىپتى ايماق سانالادى. سولاي بولا تۇرا وعان سۋعا ءتۇسۋ ءۇشىن كەلۋشىلەر سانى ازايمايدى, سۋعا باتىپ كەتۋشىلەر وقيعاسى بۇرىن دا تىركەلگەن. بۇل جولى قايعىلى وقيعاعا دۋشار بولعان اعالى-ءىنىلى ەكى ازامات مۇنايلى اۋدانىنىڭ تۇرعىندارى ەكەن. سۋدا قۇتقارۋشىلاردىڭ ايتۋىنا قاراعاندا, ەڭ الدىمەن بىرەۋى باتىپ بارا جاتىپ, ەكىنشىسىنەن كومەك سۇراپتى. سول مەزەتتە جاندارمەن جاردەم كورسەتۋگە كىرىسكەن ەكىنشىسى دە سۋعا باتىپ كەتەدى. ءدال وسى كەزدەردە تەڭىزدە ارنا بويىمەن ءوتىپ جاتقان اعىس قاتتى بولسا كەرەك. الايدا, بۇل تۋرالى اقپارات قۇتقارۋ بەكەتىنە كەش تۇسكەن. ماماندار بىردەن ىزدەستىرۋ جۇمىستارىنا كىرىسىپ, بىرنەشە ساعات ىشىندە ءىنىسىنىڭ عانا دەنەسىن تابادى. ال ۇشتى-كۇيلى جوعالعان اعاسى ىزدەستىرىلۋ ۇستىندە, ازىرگە ناتيجە جوق. ماماندار بۇل ءوڭىردىڭ سۋعا ءتۇسى ءۇشىن قاۋىپتى ەكەندىگىن ۇعىندىراتىن ارنايى بەلگىلەردىڭ تۇرۋىنا قاراماستان, تۇرعىنداردىڭ سۋعا تۇسۋگە ءجيى كەلەتىندىگىن ايتۋدا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.