استانا. 13 تامىز. قازاقستان فۋتبول فەدەراتسياسى وڭتۇستىك قازاقستان وبلىسىندا فۋتبول اكادەمياسىن اشۋدى كوزدەپ وتىر. بۇل تۋرالى egemen.kz حابارلادى.
وڭىردە 7 تامىزدان باستاپ يسپانيادان كەلگەن ماماندار جۇمىس ىستەۋدە. بەلگىلى فۋتبول كلۋبتارىنىڭ جاتتىقتىرۋشىلارى بۇگىندە سپورتقا قابىلەتى بار بالالاردى ءوز كوماندالارىنا قابىلداۋ ءۇشىن ىرىكتەۋ وتكىزۋدە. ءۇش جاس ەرەكشەلىگى بويىنشا ءوتىپ جاتقان ىرىكتەۋ 15 تامىزعا دەيىن جالعاسادى.
شەتەلدەن كەلگەن بەس مامان كۇنىنە جۇزدەن استام بالالاردىڭ شەبەرلىگىن باعالايدى. يسپاندار اسىرەسە, جەتكىنشەكتەردىڭ ويىن كەزىندەگى ءىس-ارەكەتىنە ەرەكشە ءمان بەرۋدە. اكادەمياعا 66 بالا قابىلدانادى. وندا شەتەلدىك ماماندارمەن بىرگە وتاندىق جاس جاتتىقتىرۋشىلار دا جۇمىس ىستەيتىن بولادى.
جاس فۋتبولشىلار بيك فۋتبول ورتالىعىنىڭ الاڭدارىندا جاتتىعادى. ازىرگە جاڭا فۋتبول اكادەمياسىنىڭ رەسپۋبليكالىق نەمەسە ايماقتىق بولاتىنى بەلگىسىز.
ەلامان قوڭىر.
دەرەك: egemen.kz.
سۋرەت: otyrar.kz.