كەشە «قازاق گازەتتەرى» سەرىكتەستىگىندە كونستيتۋتسيالىق رەفورمانى تالقىلاۋعا ارنالعان جيىن ءوتتى. وندا جۋىردا جاريالانعان اتا زاڭ جوباسى تاقىرىپ وزەگىنە اينالىپ, جۋرناليستەردىڭ اقپاراتتى جەتكىزۋدەگى بىلىكتىلىگى, جاۋاپكەرشىلىگى ءسوز بولدى.
سەرىكتەستىكتىڭ باس ديرەكتورى, اكادەميك ديحان قامزابەك ۇلى كونستيتۋتسيامىزدىڭ جاڭا جوباسى ەلدىكتىڭ مارتەبەسىن كوتەرىپ, حالقىمىزدىڭ بىرلىگىن نىعايتىپ, بولاشاعىن بەكەمدەۋگە باعىتتالعان ماڭىزدى قۇجات ەكەنىن تىلگە تيەك ەتتى.
«اتا زاڭ جوباسىنىڭ اڭداتۋ – پرەامبۋلاسىنان باستاپ, مەملەكەتىمىزدىڭ بىرتۇتاستىعى مەن مىزعىماستىعىن ايشىقتايتىن ماڭىزدى سوزدەر جازىلدى. ەگەمەندىك پەن تاۋەلسىزدىكتىڭ ورنى بەكەمدەلدى. قازاق ءتىلى ەلىمىزدىڭ مەملەكەتتىك ءتىلى ەكەنى ايقىن جازىلدى. وسى جوبانى تالقىلاعان كوميسسيانىڭ قۇرامىندامىن. ول جەردە تاجىريبەلى زاڭگەرلەر مەن عالىمدار, ءتۇرلى سالانىڭ بىلىكتى ماماندارى تىزە قوسىپ ەڭبەك ەتىپ, اتا زاڭ جوباسىن جان-جاقتى ساراپتاپ ازىرلەدى», دەدى د.قامزابەك ۇلى.
سونداي-اق باس ديرەكتور الەۋمەتتىك جەلىدە ءارتۇرلى الىپقاشپا اڭگىمەلەردى تاراتىپ جاتقان جازبالاردىڭ نەگىزسىز ەكەنىن ايتىپ, ءباسپاسوز وسى ماسەلەنى پاراساتتى, ءبىلىمدى ماماندارعا, ەل سىيلايتىن زيالىلارعا مىنبەر بەرە ءبىلۋى كەرەكتىگىن ەسكە سالدى.
«وزدەرىڭىز دە جوبا ماتىنىمەن العاشقىلاردىڭ ءبىرى بولىپ تانىستىڭىزدار. وندا ءبىرتۇتاس حالىق, بايىرعى قازاق جەرى, ۇلى دالانىڭ مىڭجىلدىق تاريحى, مەملەكەتتىڭ ۋنيتارلىق سيپاتى مەن تۇتاستىعى, «ادىلەتتى قازاقستان» يدەياسى, «زاڭ مەن ءتارتىپ» قاعيداتى, ازاماتتاردىڭ قۇقىقتارى مەن بوستاندىقتارى, ەتنوسارالىق جانە كونفەسسياارالىق كەلىسىم سەكىلدى بىرلىگىمىزدى نىعايتىپ, بولاشاعىمىزدى ايقىندايتىن تۇجىرىمدامالىق ۇعىمدار قامتىلعان. بۇنىڭ ءبارى مەملەكەتىمىزدىڭ زاڭدىق نەگىزىن قالىپتاستىرىپ, بەكىتەدى», دەدى ول.
جيىندا باس ديرەكتوردىڭ ءبىرىنشى ورىنباسارى ۆيكتور پريانيكوۆ «قازاق گازەتتەرى» سەرىكتەستىگىنە قاراستى باسىلىمدار جاڭا كونستيتۋتسيا جوباسىن حالىققا تانىستىرۋ مەن ناسيحاتتاۋ جولىندا جۇمىلا ەڭبەك ەتۋ كەرەك ەكەنىن ايتتى. «بۇل – ءبىزدىڭ ەلىمىزدىڭ تاريحىنداعى جاڭا بەتبۇرىس. سول ارقىلى ءبىز دامۋ مەن وركەندەۋدىڭ جاڭا كەزەڭىنە اياق باسامىز. بۇل ءبىزدىڭ بارىمىزدەن جاۋاپكەرشىلىك پەن ازاماتتىق ۇستانىمدى تالاپ ەتەدى», دەدى ول.
سونداي-اق جيىندا سەرىكتەستىك باس ديرەكتورىنىڭ ورىنباسارى قامبار احمەت, باس ديرەكتوردىڭ ورىنباسارى – الماتى باسىلىمدارىنىڭ جەتەكشىسى باعاشار تۇرسىنباي ۇلى, «Egemen Qazaqstan» گازەتىنىڭ باس رەداكتورى عابيت ىسكەندەر ۇلى, «كازاحستانسكايا پراۆدا» گازەتىنىڭ باس رەداكتورى ءسابيت مالدىباەۆ ءسوز الىپ, كونستيتۋتسيالىق رەفورمانىڭ ەل ومىرىنە اكەلەتىن وزگەرىستەرى جايىندا ويلارىن ورتاعا سالدى.
باس قوسۋعا ونلاين جۇيەسىندە الماتى باسىلىمدارىنىڭ قىزمەتكەرلەرى, وڭىرلەردەگى مەنشىكتى تىلشىلەر دە قاتىستى.