قازاقستان حالىق پارتياسى جاڭا كونستيتۋتسيا جوباسىن حالىق اراسىندا ءتۇسىندىرۋ جانە تالقىلاۋ جۇمىستارىن قارقىندى جۇرگىزىپ جاتىر. پارتيانىڭ ايماقتىق فيليالدارى ماڭىزدى كەزدەسۋلەر مەن «دوڭگەلەك ۇستەلدەر» وتكىزدى, دەپ جازادى Egemen.kz.
پاۆلودار وبلىستىق دوستىق ۇيىندە وتكەن جيىنعا قحپ فيليالى توراعاسىنىڭ مىندەتىن اتقارۋشى الىمبەك اعىباەۆ قاتىستى.
وبلىس اكىمى اسايىن بايحانوۆ قۇجات ازاماتتاردىڭ, پارتيالاردىڭ, ۇكىمەتتىك ەمەس ۇيىمداردىڭ جانە ساراپشىلاردىڭ پىكىرلەرىن ەسكەرە وتىرىپ ازىرلەنگەنىن, بارلىعى 2 000-نان استام ۇسىنىس كەلىپ تۇسكەنىن اتاپ ءوتتى.
ۆيتسە-پرەزيدەنت جانە حالىق كەڭەسى: جاڭا اتا زاڭ جوباسى ۆارشاۆادا تانىستىرىلدى
سونىمەن قاتار رەفورمانىڭ تاريحي ماڭىزدىلىعى مەن ءاربىر ازامات ءۇشىن پراكتيكالىق ءمانىنىڭ زور ەكەنى ايتىلدى. قحپ مۇشەلەرى كونستيتۋتسيانىڭ جوباسىن تولىق قولدايتىندارىن جانە ونى ءتۇسىندىرۋ مەن قوعامدىق تالقىلاۋعا بەلسەندى قاتىسۋعا دايىن ەكەندەرىن جەتكىزدى.
«جاڭا كونستيتۋتسيانىڭ جوباسى قۇقىق پەن بوستاندىق اياسىن كەڭەيتەدى, زاڭ ۇستەمدىگىن نىعايتادى, ساياسي جۇيەنى جاڭعىرتادى جانە العاش رەت «ادىلەتتى قازاقستان» تۇجىرىمداماسىنىڭ قۇندىلىقتارى مەن «زاڭ مەن ءتارتىپ» قاعيداتىن بەكىتەدى», دەپ مالىمدەدى تالقىلاۋعا قاتىسۋشىلار.
تاراز قالاسىندا وتكەن كەزدەسۋدە قحپ جامبىل وبلىستىق فيليالىنىڭ وكىلدەرى مەن ءماسليحات دەپۋتاتتارى باس قوستى. فيليال توراعاسىنىڭ ورىنباسارى بولاتبەك كولتاەۆ پەن فيليال توراعاسىنىڭ مىندەتىن اتقارۋشى راحمان اققوزيەۆ قۇجاتتىڭ نەگىزگى تارماقتارىن ءتۇسىندىردى.
«بايتاق» پارتياسى «ەكولوگيا جانە ادام دەنساۋلىعى» ۇعىمىن مەملەكەتتىڭ بازالىق قۇندىلىعى رەتىندە بەكىتۋدى ۇسىندى
جيىندا تاراز قالالىق ءماسليحاتىنىڭ دەپۋتاتتارى ەلدوس دالاباي مەن ازامات لەسبەك سپيكەر رەتىندە ءسوز سويلەدى. ولار جوباعا ەنگىزىلگەن وزگەرىستەرگە توقتالىپ, نەگىزگى باپتارعا تۇسىنىكتەمە بەردى. تالقىلاۋعا پارتيا بەلسەندىلەرى قاتىستى.
«قاتىسۋشىلار تالقىلانعان ماسەلەنىڭ ماڭىزدىلىعىن ءتۇسىندى. قر كونستيتۋتسياسىن قابىلداۋعا دەگەن قىزىعۋشىلىق اتا زاڭىمىزدى جاڭارتۋ ۋاقىت تالابى ەكەنىن كورسەتتى. قازاقستان حالقى وڭ وزگەرىس كۇتىپ وتىر», دەپ اتاپ ءوتتى ءىس-شارانىڭ ۇيىمداستىرۋشىلارى.
وسىعان ۇقساس كەزدەسۋ قحپ-نىڭ شىمكەنت قالالىق فيليالىندا ءوتتى. كەزدەسۋ بارىسىندا پارتيا بەلسەندىلەرىنە كونستيتۋتسيا جوباسىنىڭ نەگىزگى ەرەجەلەرى ءتۇسىندىرىلىپ, پارتيانىڭ ۇستانىمى مەن كوزقاراسى تانىستىرىلدى. سونىمەن قاتار كونستيتۋتسيالىق وزگەرىستى ىسكە اسىرۋداعى قوعامدىق-ساياسي ينستيتۋتتاردىڭ ءرولى تالقىلاندى.
«مۇنداي كەزدەسۋلەر پارتيا اكتيۆىنىڭ قۇقىقتىق ساۋاتتىلىعىن ارتتىرىپ, قوعامداعى وزەكتى ماسەلەلەردى تالقىلاۋعا مۇمكىندىك بەرەدى», دەپ تۇيىندەدى پارتيا وكىلدەرى.