الماتىدا «Qonaev Media» تەلەارناسىنىڭ جاڭا كەڭسەسى مەن زاماناۋي ستۋدياسىنىڭ رەسمي اشىلۋ سالتاناتى ءوتتى. ءىس-شاراعا الماتى وبلىسىنىڭ اكىمى مارات سۇلتانعازيەۆ ارنايى قاتىسىپ, تەلەارنانىڭ جۇمىس بارىسىمەن تانىستى, دەپ حابارلايدى Egemen.kz.
جاڭا تەلەارنا 2025 جىلدىڭ قىركۇيەك ايىندا كورەرمەنگە جول تارتىپ, قازىرگى ۋاقىتتا الماتى وبلىسىنىڭ بارلىق اۋداندارى مەن قالالارىن قامتي وتىرىپ, رەسپۋبليكالىق دەڭگەيدە حابار تاراتىپ وتىر.
سالتاناتتى شارا بارىسىندا تەلەارنانىڭ تەحنيكالىق مۇمكىندىكتەرى, جاڭا ستۋديالارى مەن جۇمىستىڭ اتقارىلۋ بارىسى تانىستىرىلدى. ءوڭىر باسشىسى ءوز سوزىندە جاڭا تەلەارنانىڭ اشىلۋى وبلىس ءۇشىن ماڭىزدى ءارى تاريحي وقيعا ەكەنىن اتاپ ءوتتى.
«بۇگىن ءبىز ءوڭىرىمىز ءۇشىن ماڭىزدى, تاريحي ءساتتىڭ كۋاسى بولىپ وتىرمىز. وڭىرلىك جاڭا تەلەارنانىڭ اشىلۋى – تەك ءبىر مەديا الاڭنىڭ ىسكە قوسىلۋى ەمەس, بۇل – قوعامدىق سانانى قالىپتاستىرۋعا, اشىق ديالوگ ورناتۋعا جانە ءوڭىردىڭ دامۋىن جاڭا دەڭگەيگە كوتەرۋگە باعىتتالعان ماڭىزدى قادام. جاڭا ارنانىڭ باستى ۇستانىمى – شىنايىلىق, جاۋاپكەرشىلىك جانە حالىق مۇددەسىنە ادال قىزمەت بولۋى كەرەك. اقپاراتتىق ساياساتتا تەپە-تەڭدىك پەن كاسىبيلىكتى ساقتاي وتىرىپ, كورەرمەنگە پايدالى ءارى ساپالى كونتەنت ۇسىنادى دەپ سەنەمىن», دەدى, وبلىس اكىمى مارات سۇلتانعازيەۆ.
سونداي-اق تسيفرلاندىرۋ داۋىرىندە «Qonaev Media» تەلەارناسى «Digital Sana» جوباسى اياسىندا جاساندى ينتەللەكت تەحنولوگيالارىن ەنگىزىپ, وتاندىق مەديا كەڭىستىگىندەگى وزىق ءارى جاڭاشىل ارنالاردىڭ قاتارىنا قوسىلۋدى ماقسات ەتىپ وتىر.
Silk Way Star جوباسىنىڭ فينالى قىتاي تەلەارناسىندا كورسەتىلدى
ءوز كەزەگىندە «Qonaev media» تەلەارناسىنىڭ باس ديرەكتورى قىمبات حانگەلدينا تەلەارنا تاراپىنان ءوڭىردىڭ وڭ ءيميدجىن قالىپتاستىرۋعا باعىتتالعان ساپالى كونتەنتتەر الداعى ۋاقىتتا دا جالعاساتىنىن ايتتى.
«وبلىس اكىمدىگى تاراپىنان كورسەتىلىپ وتىرعان قولداۋ ءۇشىن العىس بىلدىرەمىن. ۇجىم مۇشەلەرى ءوڭىردىڭ دامۋىنا ءوز ۇلەستەرىن قوسىپ عانا قويماي, بۇقارالىق اقپارات قۇرالدارىنان وبلىسىمىزدىڭ وڭ ءيميدجىن قالىپتاستىرۋدى ماقسات ەتۋدە. بۇدان بولەك, تەلەارنا ۇجىمى ساپالى ءارى زاماناۋي تەلەۆيزيالىق ءونىم ازىرلەۋگە باعىتتالعان ۇزاق مەرزىمدى جۇمىستى جالعاستىرۋعا نيەتتى», دەدى تەلەارنا ديرەكتورى.
كورەرمەنگە جول تارتقان جاڭا تەلەارنا ەفيرلىك, كابەلدىك, Smart TV جانە ونلاين پلاتفورمالار ارقىلى حابار تاراتىپ, ءوڭىر تۇرعىندارىنا ساپالى ءارى قولجەتىمدى كونتەنت ۇسىنۋعا تولىق مۇمكىندىككە يە.
قازاقستان تەلەارنالارى قىسقى وليمپيادا ويىندارىن تىكەلەي ەفيردە كورسەتەدى
الماتى وبلىسى