بيكەن ريموۆا اتىنداعى اكادەميالىق دراما تەاترىندا قازاق پوەزياسىنىڭ اقيىق اقىنى مۇقاعالي ماقاتاەۆتىڭ 95 جىلدىعىنا ارنالعان «مۇقاعالي» اتتى مونوسپەكتاكلى ساحنالاندى, دەپ حابارلايدى Egemen.kz.
مەرەيتويلىق ءىس-شارانىڭ شىمىلدىعى اشىلعان سالتاناتتى كەشكە جەتىسۋ وبلىسى اكىمىنىڭ ورىنباسارلارى ەسداۋلەتوۆ دياس راحمەت ۇلى مەن قاناعاتوۆ اسەت سەرىك ۇلى ارنايى قاتىسىپ, ونەر ۇجىمى مەن كورەرمەندەردى ايتۋلى مادەني وقيعامەن قۇتتىقتادى.
سۇلتان سرايلوۆتىڭ تۋىندىسى نەگىزىندە ساحنالانعان بۇل قويىلىم – قازاق ادەبيەتىنىڭ مۇزبالاق اقىننىڭ ىشكى الەمىنە ۇڭىلۋگە مۇمكىندىك بەرەتىن ەرەكشە ەكسپەريمەنتتىك جوبا. سپەكتاكلدىڭ ءساتتى شىعۋىنا بىلىكتى ماماندار اتسالىستى. قويىلىم رەجيسسەرى – ۇلان احمەتوۆ, قر ەڭبەك سىڭىرگەن قايراتكەرى, اكتەر, سافۋان رىسباي ۇلى, كومپوزيتورى – تۇرسىنجان شاپاي. اقىن رولىندە: سافۋان رىسباي ۇلى, سول سياقتى رولدەردە دارحان دۇيسەنوۆ, كۇنەكەي مۇحتارحان, اريزا اسقاروۆا, قاراقات شىنداۋلەت, اسەم مۇراتوۆا وينادى.
«مۇقاعالي» جۋرنالىنىڭ 20 جىلدىق مەرەيتويلىق كەشى ءوتتى
اكتەر اقىننىڭ جان ايقايىن, ماحاببات پەن مۇڭعا تولى ءومىرىن جانە ۋاقىت تۋرالى تەرەڭ تولعانىسىن پوەزيا تىلىمەن شەبەر ورنەكتەي ءبىلدى. ءسوز, ۇنسىزدىك جانە ەموتسيانىڭ ۇيلەسىمى كورەرمەندى مۇقاعاليدىڭ رۋحاني الەمىنە جەتەلەپ, ەرەكشە اسەرگە بولەدى.
تەاتر فويەسىندە ساحنالانعان نەبارى وتىز شاقتى كورەرمەنگە ۇسىنىلعان بۇل قويىلىمدى ونەرسۇيەر قاۋىم جىلى قابىلدادى.
«پوەتيكالىق جانر – قازاق بولمىسىنا ەتەنە جاقىن, تابيعاتىمەن بىتە قايناسقان جانر. اۋىز ادەبيەتىندەگى ەپوستاردىڭ ءوزى وسى پوەتيكالىق ۇلگىدە قالىپتاسقان. سونىمەن قاتار, وزدەرىڭىزگە بەلگىلى, اقيىق اقىن مۇقاعالي ماقاتاەۆ قاراولەڭگە ەرەكشە ءمان بەرگەن. ونىڭ ولەڭدەرىن جوعارى دەڭگەيدەگى, شەبەر اكتەردىڭ ساحنادا سويلەتۋى – ۇلكەن تابىس. اكتەر مۇقاعاليدىڭ پوەزياسىن ءتىرىلتىپ قانا قويماي, تەاتردىڭ وزىندىك زاڭدىلىقتارىن شەبەر پايدالانا ءبىلدى. ناتيجەسىندە قىسقا دا نۇسقا, بىراق جۇرەككە جەتەتىن اسەرلى دۇنيە شىققان», دەيدى قازاقستاننىڭ ەڭبەك سىڭىرگەن قايراتكەرى سايلاۋ قاميەۆ.
مونوسپەكتاكلدىڭ باستى كەيىپكەرىن قويۋشى رەجيسسەرى, اكتەر, قر ەڭبەك سىڭىرگەن قايراتكەرى سافۋان رىسباي ۇلى سومدادى.
«بۇل قويىلىم 2018 جىلى رەجيسسەر سۇلتان سرايلوۆتىڭ يدەياسىمەن استانا قالاسىندا جۇزەگە استى. سپەكتاكلدەن گورى, مۇنى پوەتيكالىق قويىلىم دەپ اتاعان دۇرىس. بۇل جەردە مەن ءوزىمدى مۇقاعاليدىڭ ناقتى وبرازىندا ءجۇرمىن دەپ ايتا المايمىن, ويتكەنى تاقىرىپتىڭ ءوزى – سىرلاسۋ, نەگىزگى ماقساتىم – مۇقاعاليدىڭ جان دۇنيەسىن جەتكىزۋ.
جالپى, تەاترداعى كەز كەلگەن قويىلىم – تاربيەلىك, يدەولوگيالىق ءمانى بار دۇنيە. مۇقاعاليدى بىلمەيتىن ادام جوق, ونى ەڭبەكتەگەن بالادان باستاپ, ەڭكەيگەن قارتقا دەيىن تانيدى. اقىننىڭ ءتىلى جەڭىل, ۇيقاسى قاراپايىم بولعانىمەن, ولەڭدەرى وتە ومىرشەڭ. زەرتتەۋ بارىسىندا ءبىر ەرەكشە دۇنيەگە كوز جەتكىزدىم: مۇقاعالي پوەزياسىنىڭ تەرەڭدىگى شەكسىز. ونىڭ شاعىن عانا ءبىر كىتابىندا قوزعاماعان تاقىرىپ جوق – ساياسات تا بار, ليريكا دا, تاريح, تابيعات, ماحاببات, ادام تاعدىرى دا تۇگەل قامتىلعان. نە ىزدەسەڭ دە مۇقاعاليدان تابۋعا بولادى. بۇل قويىلىم – سونىڭ ءبىر عانا قىرى. ءبىز مونوقويىلىمدى 45 مينۋتقا سىيدىردىق, سوندىقتان مۇقاعاليدىڭ بار بولمىسىن تولىق اشىپ تاستادىق دەپ ايتا المايمىز. دەگەنمەن, نەبارى 45 جىل عۇمىر كەشكەن مۇقاعالي ومىردەن وتكەننەن كەيىن دە كينوعا ارقاۋ بولىپ, سپەكتاكلدەر مەن ادەبي كەشتەردە ناسيحاتتالىپ كەلەدى. ونىڭ مۇراسى ەشقاشان تاۋسىلمايدى, قايتا ۋاقىت وتكەن سايىن تەرەڭدەي بەرەدى», دەيدى اكتەر.
پرەمەرا سوڭىندا كورەرمەن قاۋىم ارتىستەرگە تىك تۇرىپ قوشەمەت كورسەتىپ, قويىلىم ىستىق ىقىلاس پەن زور ريزاشىلىققا بولەندى. اقيىق اقىننىڭ رۋحىن اسقاقتاتقان بۇل كەش جەتىسۋ جۇرتشىلىعى ءۇشىن ناعىز رۋحاني قازىناعا اينالدى.
قاراسازدا مۇقاعالي جىرلارى قالىقتادى