شىمكەنت قالاسىنىڭ اكىمى عابيت سىزدىقبەكوۆ 24 وتباسىنا پاتەر كىلتىن تابىستادى. جاڭا قونىس يەلەرى – الەۋمەتتىك تۇرعىدان وسال توپتاعى ازاماتتار. پاتەرلەر شاھاردىڭ تۇران شاعىن اۋدانىنداعى جاڭادان سالىنعان كوپقاباتتى ۇيلەردەن بەرىلدى. باسپانالى بولعان وتباسىلار پاتەرلەردىڭ تەك جالداۋ قۇنىن تولەپ تۇرادى.
سالتاناتتى ءىس-شارادا ءسوز العان قالا باسشىسى مەملەكەتتىك باعدارلامالاردىڭ جۇيەلى جۇزەگە اسىپ جاتقانىن اتاپ ءوتتى.
– مەملەكەت باسشىسى قاسىم-جومارت توقاەۆ حالىققا ارناعان جولداۋىندا حالىقتىڭ الەۋمەتتىك ماسەلەسىن شەشۋدى باسىم باعىت رەتىندە ايقىندادى. مەگاپوليستە تۇرعىن ءۇي قۇرىلىسى قارقىندى ءجۇرىپ جاتىر. ءبىرىنشى كەزەكتە باسپاناعا مۇقتاج جاندار, اسىرەسە, الەۋمەتتىك وسال توپتاعى وتباسىلار قامتىلادى. پاتەرلەردىڭ ساپاسىنا مەردىگەر كومپانيا تولىق كەپىلدىك بەرەدى. ارينە, كەزەكتە تۇرعان بارلىق ازاماتتى ءبىر ساتتە باسپانامەن قامتۋ مۇمكىن ەمەس, بۇل – ۋاقىت پەن قارجىنى تالاپ ەتەتىن ۇدەرىس. سوندىقتان كەزەكتەگى تۇرعىنداردى سابىر ساقتاۋعا شاقىرامىن. مەملەكەت ءوز مىندەتتەمەلەرىن كەزەڭ-كەزەڭىمەن, تولىق ورىندايدى, – دەدى ع.سىزدىقبەكوۆ.
شىمكەنت قالاسى تۇرعىن ءۇي باسقارماسى باسشىسىنىڭ مىندەتىن اتقارۋشى كوپجان تولەباەۆتىڭ مالىمەتىنشە, بۇگىندە مەگاپوليستە ءۇي كەزەگىندە 90 مىڭنان استام ازامات تۇر. جالدامالى پاتەرلەردى ۇلەستىرۋ «وتباسى بانك» اق ارقىلى جۇرگىزىلەدى. بانك تاراپىنان 544 الەۋمەتتىك وسال توپتاعى ازاماتتى باسپانامەن قامتۋ جۇمىسى قولعا الىنعان. ىرىكتەۋدەن وتكەن 235 وتباسىنا جالداۋ شارتىن جاساسۋعا ءتىزىم جولدانعان. سونىڭ ىشىندەگى 24 وتباسى قونىستويىن تويلاپ وتىر. جالپى, وسى ۋاقىتقا دەيىن تىزىمدەگى 187 وتباسى باسپانالى بولدى. قالعان 309 وتباسىنىڭ قۇجاتتارى تەكسەرىلۋ ۇستىندە, الداعى ۋاقىتتا ولارعا دا پاتەر بەرىلەدى. بيىل 1,5–2 مىڭعا جۋىق وسال توپتاعى وتباسىنى باسپانامەن قامتۋ جوسپارلانعان.
ايتا كەتەرلىگى, 2024 جىلعى 24 قاراشاداعى تۇرعىن ءۇي ساياساتىن رەفورمالاۋ تۋرالى زاڭعا ەنگىزىلگەن وزگەرىستەرگە سايكەس, بارلىق جالدامالى پاتەرلەر بولاشاقتا ساتىپ الۋ قۇقىعىمەن بەرىلەدى. شىمكەنتتە پاتەردىڭ جالداۋ قۇنى ايىنا ورتا ەسەپپەن 15–20 مىڭ تەڭگەنى قۇرايدى. الەۋمەتتىك وسال ساناتتاعى ازاماتتار ءۇي العاندا باستاپقى جارنا تولەمەيدى, تەك «وتباسى بانكتەن» جەكە كابينەت اشىپ, مارتەبەسىن راستاۋى قاجەت.
تاعى ءبىر جاڭاشىلدىق – اكىمدىك ەندى تۇرعىن ءۇيدى سالۋعا تاپسىرىس بەرمەيدى, دايىن ۇيلەردى ساتىپ الادى. بۇل قۇرىلىس كومپانيالارىنىڭ جاۋاپكەرشىلىگىن ارتتىرىپ, ساپاسىز قۇرىلىستىڭ الدىن الۋعا باعىتتالعان ءتيىمدى قادام بولىپ وتىر.
جاڭا قونىستانۋشىلاردىڭ قاتارىندا كوپبالالى, تولىق ەمەس وتباسىلار, مۇگەدەكتىگى بار ازاماتتار, ەرەكشە بالا تاربيەلەپ وتىرعان جاندار, سونداي-اق جەتىم بالالار بار. قالا باسشىلىعى تۇرعىن ءۇي قورىن جاڭارتۋ, حالىقتىڭ الەۋمەتتىك جاعدايىن جاقسارتۋ جۇمىستارى جالعاسا بەرەتىنىن مالىمدەدى.
شىمكەنت