ءجۇرىپ كەلە جاتقان جولدىڭ ءبىر مەزەتتە تۇيىققا تىرەلگەنىن اڭعارىپ, باسقا جولعا بۇرىلاتىن كەزدەر بارىمىزگە تانىس. مۇنداي جاعدايدى الدىن الا جوسپارلاي المايسىز, بىراق كەيىن ءدال وسى شەشىم ءومىرىڭىزدىڭ ەڭ ماڭىزدى بۇرىلىسى بولعانىن تۇسىنەسىز. ينتەللەكتۋالدىق ساپارعا شىققان قوعامدىق سانا دا تاعى ءبىر بەتبۇرىستىڭ الدىندا تۇر. جاڭادان جارىق كورگەن «Turning points Qazaqstan», ەركىن اۋدارساق «بەتبۇرىس بەلەسىندەگى قازاقستان» جۋرنالى سىندارلى ساتتە سىني ويلايتىن, كوزى اشىق قوعامدى قالىپتاستىرۋعا باعاتتالعان ەڭبەگىن باستاپ ۇلگەردى, دەپ جازادى Egemen.kz.
باسىلىمنىڭ العاشقى سانى Kazmedia Holding كومپانياسىنىڭ ىجداعاتىمەن وتكەن «Qazaqstan NEXT 2026» فورۋمىندا تانىستىرىلدى. جيىندا بيىلعى جىلدىڭ ترەندتەرى مەن بەتبۇرىستى كەزەڭدەرى تالقىعا سالىندى. عىلىم, ەكونوميكا, ساياسات سالاسىنىڭ بىلگىرلەرى ەلدەگى جانە الەمدەگى جاعدايلارعا باعا بەرىپ, تۇجىرىمدى ويىن ورتاعا سالدى. شەت ەلدەن كەلگەن پىكىر كوشباسشىلارى دا اقىل كەمەسىنە ات بايلادى. ءار سالانىڭ ماماندارى بولعاننان كەيىن, ارقايسىنىڭ اڭگىمەسى ءار الۋان. بىراق سونىڭ ءبارى جينالا كەلە كەلەشەك كەلبەتىن كورسەتەتىن بايىپتى بولجامدار. وسى سەكىلدى جان-جاقتى زەردەلەنگەن, ەڭ باستىسى كاسىبي ساراپشىلاردىڭ ماقالالارى «Turning points Qazaqstan» جۋرنالىندا قاتتالعان.
استانالىق وقۋشىنىڭ ەسسەسى The New York Times باسىلىمىندا جاريالاندى
باسىلىمنىڭ باس ديرەكتورى ءارى كومپانيا قۇرىلتايشىسى ەركىن جاقىپوۆ جۋرنالدىڭ «The New York Times» ليتسەنزياسىمەن شىعاتىنىن مالىمدەدى. ويلى وقىرمان حاباردار بولۋى كەرەك, «The New York Times» – الەمدەگى ەڭ اۋقىمدى باسىلىمداردىڭ ءبىرى. ەلىمىزدىڭ داۋىسى جاھاندىق جۋرنالدىڭ پلاتفورماسىندا جاڭعىرۋى – شىن مانىندە, ۇلكەن جەتىستىك.
ء«بىز الەمدىك باسىلىم ساراپشىلارىنىڭ ەكسكليۋزيۆ تالداۋلارى مەن جەرگىلىكتى مامانداردىڭ باتىل بولجامدارىن ءبىر الاڭدا ۇسىنىپ وتىرمىز. «Turning Points Qazaqstan» جۋرنالى وتاندىق مەدياكەڭىستىككە جاڭا سەرپىن اكەلەدى دەپ سەنەمىز», دەدى ەركىن جاقىپوۆ.
تەڭىزدىڭ ءدامى – تامشىدان. جاقسى جۋرنالدىڭ سالماعى مازمۇنىنان كورىنىپ تۇرادى. اۋەلگى تاقىرىپتا بىلتىرعى جىلدىڭ ەرەك وقيعالارىنا شولۋ جاسالعان. ارىمەن قاراي جاھاندىق ەنەرگەتيكا, كرەاتيۆ يندۋستيريا, جي داۋىرىندەگى جوعارى ءبىلىم, بيزنەس پەن ينۆەستيتسيا, الەمدىك ءتارتىپ, بۇۇ-نىڭ جاڭا ساياساتى سىندى ماڭىزى زور تاقىرىپتار وقىرمان نازارىنا قارماق سالادى. جۋرنالدىڭ تىزگىن تارتار بەتىندە ەرەكشە تاجىريبە جاسالعانىن اڭعاردىق. ء«بىرىنشى بەتكە شىقپاعان, بىراق نازاردا بولعان وقيعالار» اتاۋىمەن ايدارلانعان بەتتە وقىرمان ءوزىنىڭ زەردەسىن سىناپ كورەدى. تەست تاپسىرمالارىنا جاۋاپ بەرە وتىرىپ, ەل ەسىندەگى ەلەۋلى وقيعالاردى قانشالىقتى بىلەتىنىن تەكسەرىپ كورەدى. بۇل دا جۋرنالدىڭ جاسامپازدىعى دەپ بىلەمىز.
الماتىعا تامسانعان The New York Times
جالپى, «Turning Points Qazaqstan» جۋرنالى Kazmedia Holding كومپانياسىنىڭ العاشقى ءونىمى ەمەس. بۇعان دەيىن كومپانيا «National Geographic Qazaqstan» جۋرنالىن شىعارىپ, وقىرمان ىقىلاسىنا بولەنگەن ەدى. ول باسىلىم ماقالالاردىڭ ۇسىنىلۋ ديزاينى, ءماتىن ءتىلىنىڭ جاتىقتىعىمەن ەرەكشەلەنەتىن. بۇل جولى دا شىعارۋشىلار داستۇردەن جاڭىلماعانىن ايتتى. تۇساۋى كەسىلگەن جۋرنالدىڭ باس رەداكتورى ايبىن شاعالاق الەمدىك مەديا كەڭىستىكتىڭ باعىت-باعدارى تۋرالى ايتىپ, وعان قالاي ىلەسۋ كەرەكتىگى تۋرالى ويىن جەتكىزدى.
«شەتەلدىك ىرگەلى گازەت-جۋرنالدار سالا ماماندارىنا باسىمدىق بەرەدى. ماسەلەنىڭ بەتكى قاباتىن ەمەس, تۇپكى شەشىمىن بىلەتىن ساراپشىلاردىڭ پىكىرىن گازەتكە جاريالايدى. البەتتە, ول ءوز جۇمىسىن جەتىك بىلە وتىرىپ, ونى حالىققا تۇسىنىكتى جەتكىزۋى كەرەك. بۇل ۇردىستەن ءبىز كوپ تاجىريبە الامىز. شىعارىپ وتىرعان جۋرنالىمىز دا حالىق تانىم كوكجيەگىن كەڭەيتىپ, سالالىق جۋرناليستيكانىڭ ءورىسىن اشادى دەپ ەسەپتەيمىز», دەدى باس رەداكتور.