الماتى تورىندە قازاق ۇلتتىق كاسىبي مۋزىكاسىنىڭ نەگىزىن قالاعان تۇلعا, كومپوزيتور, ديريجەر ءارى عالىم احمەت جۇبانوۆتىڭ 120 جىلدىعىنا ارنالعان «عاسىرلار پەرنەسى» اتتى تاعىلىمدى كونتسەرت ءوتتى. مەرەيتويلىق كەشتى قۇرمانعازى اتىنداعى قازاق ۇلتتىق حالىق اسپاپتار وركەسترى ۇيىمداستىرىپ, كورەرمەندى ۇلتتىق ونەردىڭ تەرەڭ تامىرىنا جەتەلەدى.
تۇلعا مەرەيتويىنا قۇرمانعازى اتىنداعى ۇلتتىق حالىق اسپاپتار وركەسترىنىڭ ەرەكشە ءمان بەرۋى بەكەر ەمەس. سەبەبى ۇلت قايراتكەرى 1934 جىلى 11 دومبىراشىدان قۇرالعان شاعىن انسامبل نەگىزىندە بۇگىندە الەمگە تانىمال وركەستردىڭ نەگىزىن قالاپ, ونىڭ تۇڭعىش كوركەمدىك جەتەكشىسى ءارى باس ديريجەرى بولدى. ونەر يەسى, سونداي-اق, ۇلتتىق مۋزىكاعا تەرەڭ عىلىمي زەرتتەۋلەر جۇرگىزىپ, قازاقتىڭ كۇي ونەرىن كاسىبي دەڭگەيگە كوتەرىپ, ونى حالىقارالىق مادەني كەڭىستىككە تانىتقان بىرەگەي تۇلعا رەتىندە تاريحتا قالدى.
كورنەكتى كومپوزيتور مەرەيتويىنا ارنالعان كونتسەرت باعدارلاماسىندا احمەت جۇبانوۆتىڭ سارقىلماس مۋزىكالىق مۇراسىنان تاڭداۋلى شىعارمالار ورىندالىپ, قازاق مۋزىكاسىنىڭ قالىپتاسۋ كەزەڭدەرى كوركەم اۋەن ارقىلى جاڭعىردى. ۇلت رۋحىن اسقاقتاتقان تۋىندىلاردى قازاقستاننىڭ ەڭبەك سىڭىرگەن قايراتكەرى تولقىن زابيروۆا, اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءسوليسى ايدوس جاباعين, وپەرا ءانشىسى نەماتۋللو زكرۋللاەۆ, كۇيشى ازامات شىناروۆ, قوبىزشى اسەل راقىمجان جانە احمەت جۇبانوۆ اتىنداعى دارىندى بالالارعا ارنالعان مەكتەپ-ينتەرناتىنىڭ بالالار حورى ورىندادى.
كەش تىزگىنىن قولىنا العان «قۇرمەت» وردەنىنىڭ يەگەرى ابىلاي تىلەپبەرگەن, ديريجەرلەر نۇركەن ءاشىروۆ پەن ەرلان داۋرەنبەكوۆ وركەسترگە ەرەكشە سەرپىن بەرىپ, ءاربىر شىعارمانىڭ مازمۇنىن كورەرمەنگە اسەرلى جەتكىزدى.
– كونتسەرت احمەت جۇبانوۆقا تاعزىم رەتىندە ونىڭ ءوز رەپەرتۋارىنان باستالدى. باعدارلامادا كومپوزيتوردىڭ كۇيلەرى مەن اندەرى, لاتيف حاميديمەن بىرلەسىپ جازعان وپەراسىنان ۇزىندىلەر قۇرمانعازى اتىنداعى وركەستردىڭ سۇيەمەلدەۋىمەن ورىندالدى. ساحنادا 80-گە جۋىق ءارتىس ونەر كورسەتتى, – دەدى ديريجەر ابىلاي تىلەپبەرگەن.
مەرەيتويلىق ءىس-شارا اياسىندا ۇلتتىق ورتالىق مۋزەيگە قاراستى احمەت جۇبانوۆ پەن عازيزا احمەتقىزىنىڭ مەموريالدىق مۋزەيىندە «ۇلت رۋحىن اسقاقتاتقان تۇلعا» اتتى مازمۇندى كورمە ۇيىمداستىرىلدى. ەكسپوزيتسيادا احمەت جۇبانوۆتىڭ عۇمىر جولى مەن شىعارماشىلىق قىزمەتىنەن سىر شەرتەتىن ارحيۆتىك قۇجاتتار, سيرەك فوتوسۋرەتتەر, قولجازبالار, نوتالىق مۇرالار, كىتاپتار مەن جەكە زاتتارى جۇرتشىلىق نازارىنا ۇسىنىلدى.
«ەكسپوزيتسيا ارقىلى كومپوزيتوردىڭ ۇلتتىق مۋزىكا تاريحىنا قوسقان ولشەۋسىز ۇلەسى تانىستىرىلدى. كورنەكتى كومپوزيتوردىڭ ۇلتقا ادال قىزمەت ەتكەنىنىڭ دالەلى – 1950 جىلعى نەمىس باسپا ماشيناسى. بۇل قۇرالعا قازاق ارىپتەرى ەنگىزىلگەن», – دەدى مۇراجاي جەتەكشىسى رىسكۇل ساعاتقىزى.