قازاقستان ونەرپازدارى ءۇندىستاننىڭ چەنناي قالاسىندا وتكەن 11-ءشى عالامدىق مۋزىكا فەستيۆالىنە قاتىستى. ونەر دوداسى 25 ەلدەن كەلگەن جۇزدەگەن ءارتىستىڭ باسىن قوستى. قازاق مادەنيەتىن پاش ەتۋگە استاناداعى ەركەعالي راحماديەۆ اتىنداعى مەملەكەتتىك اكادەميالىق فيلارمونياسى, «گاككۋ» بالەت بي ءانسامبلى, سونداي-اق عازيزا جۇبانوۆا اتىنداعى اقتوبە وبلىستىق فيلارمونياسىنىڭ قازاق كامەرالىق حورى ارنايى باردى, دەپ حابارلايدى Egemen.kz.
ء «ۇندى كورەرمەنىنە قازاق اندەرىنىڭ, ونىڭ ىشىندە ابايدىڭ, تاتتىمبەتتىڭ, قازاق كلاسسيكالىق شىعارمالارىنىڭ ورىندالۋى ۇلكەن اسەر قالدىردى. مۇنداي كونتسەرتتىك باعدارلامالار ەكى ەل اراسىنداعى ءبىرىنشى كەزەكتە مادەني ديپلوماتيانى ودان ءارى نىعايتۋعا سەپتىگىن تيگىزەدى», دەدى ۇندىستانداعى قازاقستان ەلشىلىگىنىڭ ديپلوماتى قايرات نۇرمولدا.
ءۇندى جۇرتى مەن شەتەلدەن بارعان قوناقتار قازاقتىڭ كلاسسيكالىق مۋزىكاسىمەن تانىسىپ, ءداستۇرلى بيلەرىن تاماشالادى. ساحنا تورىندە ابايدىڭ اندەرى شىرقالىپ, قۇرمانعازىنىڭ كۇيلەرى تارتىلدى. باعدارلاما اياسىندا ءبىزدىڭ ونەرپازدار ۇندىستاندىق كورنەكتى مۋزىكانتتار – لاكشمينارايانا سۋبرامانيام جانە كاۆيتا كريشنامۋرتيمەن بىرلەسىپ ونەر كورسەتتى.
«كونتسەرتتە اتاقتى كومپوزيتور سۋبرامانياممەن, ديريجەر ابزال ميراسبەك ۇلىمەن, كومپوزيتورمەن جۇمىس ىستەۋ ءبىز ءۇشىن ۇلكەن مارتەبە. وسى ەلدە قازاقستاننىڭ اتاعىن شىعارىپ, نامىسىن قورعاۋ ءبىز ءۇشىن زور قۇرمەت», دەيدى ۇكىلى ىبىراي اتىنداعى اقمولا وبلىستىق فيلارمونياسى «گاككۋ» بي ءانسامبلىنىڭ ءسوليسى گۇلدانا شوقپاروۆا.
اسكەري قىزمەتشىلەر حالىقارالىق فەستيۆالدە ونەر كورسەتتى
اتالعان جوبا قازاق-ءۇندى مادەني ديپلوماتياسىنىڭ جارقىن ۇلگىسىن كورسەتىپ, حالىقتار اراسىنداعى ءوزارا تۇسىنىستىكتى نىعايتۋعا, سونداي-اق قازاقستاننىڭ حالىقارالىق مادەني بەدەلىن ارتتىرۋعا ىقپال ەتتى. بۇعان دەيىن كونتسەرتتىك باعدارلامالار كالكۋتتا, دەلي, چانديگارح قالالارىندا ۇسىنىلدى. گاسترولدىك ساپار بانگالور قالاسىندا جالعاسادى.
وپەرا جانە بالەت تەاترى سينگاپۋر ساحناسىندا ونەر كورسەتەدى