جەتىسۋ وبلىسى جاركەنت قالاسىندا بالاسىن بايلاپ قويىپ, اياۋسىز ۇرعان 28 جاستاعى ايەلگە قاتىستى تەرگەۋ قىلمىستىق كودەكستىڭ 110-بابىنىڭ 2-بولىگى (ازاپتاۋ) بويىنشا جۇرگىزىلىپ جاتىر. اتالعان باپتىڭ سانكتسياسى 4 جىلدان 7 جىلعا دەيىن باس بوستاندىعىنان ايىرۋدى كوزدەيدى. تەرگەۋ كەزەڭىندە كۇدىكتى سوت شەشىمىمەن قاماۋعا الىندى, دەپ حابارلايدى Egemen.kz.
جەتىسۋ وبلىستىق پوليتسيا دەپارتامەنتىنىڭ مالىمدەۋىنشە, قاجەتتى تەرگەۋ ارەكەتتەرى جۇرگىزىلىپ جاتىر. بىرقاتار سوت ساراپتامالارى, سونىڭ ىشىندە سوت-پسيحياتريالىق ساراپتاما تاعايىندالعان. پروتسەسسۋالدىق شەشىم ساراپتاما ناتيجەلەرى الىنعاننان كەيىن جانە تەرگەۋ ارەكەتتەرى اياقتالعان سوڭ قابىلدانادى.
تۋعان بالاسىنا زورلىق كورسەتكەن ايەل تۇرمىستا جانە كۇيەۋىمەن بىرگە ەكى ۇلدى تاربيەلەپ وتىر. بالالاردىڭ بىرەۋى – 4 جاستا, ەكىنشىسى – 2,5 جاستا. الەۋمەتتىك جەلىلەردە تاراعان ۆيدەودا ايەلدىڭ 4 جاستاعى ۇلىن ۇرىپ جاتقان ءساتى كورىنىس تاپقان. ايەل تانىسىنىڭ ۇيىندە قوناقتا بولعان. ۇلىن سۋدى ءوشىرۋدى ۇمىتىپ كەتكەنى ءۇشىن اياۋسىز ساباعان.
سونداي-اق بالالاردىڭ اكەسىنە قاتىستى دا قىلمىستىق ءىس قوزعالعانى بەلگىلى بولدى. وعان كامەلەتكە تولماعان بالانى تاربيەلەۋ مىندەتتەرىن ورىنداماۋ ايىبى تاعىلىپ وتىر. زاڭناماعا سايكەس, ەر ادامعا ءىرى كولەمدە ايىپپۇل سالۋ, قوعامدىق جۇمىستارعا تارتۋ, نەمەسە 3 جىلعا دەيىن باس بوستاندىعىن شەكتەۋ نەمەسە ايىرۋ جازاسى قولدانىلۋى مۇمكىن.
قازىر ەكى بالا تالدىقورعان قالاسىنداعى بالالار مەكەمەلەرىنىڭ بىرىندە تاربيەشىلەر مەن دارىگەرلەردىڭ باقىلاۋىندا. بيلىك ورگاندارى ايەلدى اتا-انا قۇقىعىنان ايىرۋ ماسەلەسىن قاراستىرىپ جاتىر.