ۇلتتىق بانك «ساق ءستيلى» بانكنوتالارىنىڭ جاڭا سەرياسىن كەزەڭ-كەزەڭىمەن شىعارۋدى جالعاستىرىپ جاتىر, دەپ حابارلايدى Egemen.kz.
جاڭا بانكنوتالاردى شىعارۋ كەزىندە ەسكى جانە جاڭا كۋپيۋرالار اينالىمدا قاتار جۇرەدى. ياعني, ازاماتتار ساۋدا-ساتتىقتا ەسكى اقشامەن دە تولەم جاساپ, ولاردى جاڭاسىنا ايىرباستاي الادى. وسى ۋاقىت ارالىعىندا بانكتەر جاڭا بانكنوتالارمەن جۇمىس ىستەۋ ءۇشىن ءوزىنىڭ بانكوماتتارى مەن كاسسالىق جابدىقتارىن باپتايدى. بۇل ءتاسىل اقشا اۋىستىرۋ كەزىندە حالىق پەن بيزنەستى اسىقتىرماي, قولايلى جاعداي جاساۋعا مۇمكىندىك بەرەدى.
«مىسالى, نومينالى 5 000 تەڭگەلىك بانكنوتالاردىڭ اينالىمدا قاتار ءجۇرۋ كەزەڭى 2023 جىلعى جەلتوقساننان 2025 جىلعى قىركۇيەككە دەيىن سوزىلعاندىقتان, حالىق پەن بيزنەس ەسكى اقشالاردى جاڭاسىنا ەش كەدەرگىسىز اۋىستىرۋعا مۇمكىندىك الدى. بۇگىنگى تاڭدا اينالىمدا قالعان ەسكى ۇلگىدەگى بانكنوتالاردىڭ كولەمى 1%-دان از. ولار بانكتەرگە كەيىن دە تۇسە بەرەدى, ال كەيبىر بولىگى جوعالىپ, سىرتقا اكەتىلۋىنە نەمەسە كوللەكتسيا تۇرىندە ساقتالۋىنا بايلانىستى قايتپاۋى دا مۇمكىن», دەپ ءتۇسىندىردى ۇلتتىق بانك.
2026 جىلى نومينالى 2 000 جانە 10 000 تەڭگەلىك بانكنوتالار ءۇشىن اينالىمدا قاتار ءجۇرۋ كەزەڭى اياقتالادى:
- 10 000 تەڭگە – 2024 جىلعى 28 ماۋسىمنان 2026 جىلعى 27 ماۋسىمعا دەيىن;
- 2 000 تەڭگە – 2024 جىلعى 25 جەلتوقساننان 2026 جىلعى 24 ماۋسىمعا دەيىن.
ۇلتتىق بانك توراعاسى ازاماتتارعا يپوتەكاعا ءۇي الۋدى كەيىنگە قالدىرۋعا كەڭەس بەردى
ۇلتتىق بانك 10 000 تەڭگەلىك بانكنوتالاردىڭ اينالىمدا قاتار ءجۇرۋ مەرزىمىن ۇزارتۋ مۇمكىندىگىن قاراستىرىپ جاتىر. سەبەبى ول بانكنوتالار حالىق پەن كاسىپكەرلەر اراسىندا كەڭىنەن تارالعان.
ۇلتتىق بانك بازالىق مولشەرلەمەنى 18% دەڭگەيىندە ساقتاپ قالدى
ونىڭ ۇستىنە, 2 000 مەن 10 000 تەڭگەلەردىڭ اينالىمدا قاتار بولۋ ۋاقىتى ءبىر مەزگىلدە اياقتالاتىندىقتان, بانك جۇيەسىنە قوسىمشا اۋىرتپالىق سالۋى مۇمكىن. سول سەبەپتى, مەرزىمدى ۇزارتۋ حالىق پەن بيزنەسكە ەسكى بانكنوتالاردى جاڭاسىنا بىرتىندەپ ءارى ىڭعايعا قاراي اۋىستىرۋعا كومەكتەسەدى, سونداي-اق ەسكى ۇلگىدەگى بانكنوتالاردىڭ تابيعي توزۋىن قامتاماسىز ەتەدى.
جاڭا جانە ەسكى ۇلگىدەگى بانكنوتالار اينالىمدا قاتار بولعان كەزەڭدە زاڭدى تولەم قۇرالى بولىپ قالا بەرەدى, ولار ءوز قۇنىنا ساي ەلىمىزدىڭ بۇكىل اۋماعىندا تولەمدەر مەن اۋدارىمداردا, بانك شوتتارىنا ەسەپتەۋدە قابىلداۋعا جاتادى.