جامبىل وبلىسىندا «تۇران» دەمالىس ايماعىنان 22 ءجاسوسپىرىم مەركى اۋداندىق كوپبەيىندى ورتالىق اۋرۋحاناسىنا جاتقىزىلدى. بالالارعا الدىن الا سەبەبى انىقتالماعان گاستروەنتەريت دياگنوزى قويىلدى, دەپ حابارلايدى Egemen.kz.
اتالعان جاعدايعا بايلانىستى جامبىل وبلىسى اكىمدىگىنىڭ ءباسپاسوز قىزمەتى اقپارات تاراتتى. بەلگىلى بولعانداي, بالالاردىڭ جاسى 12-17 جاس ارالىعىندا. ولاردىڭ بارلىعى كۇرەستەن وقۋ-جاتتىعۋ جيىنىنا قاتىسۋ ءۇشىن قىزىلوردا وبلىسىنان كەلگەن.
«اۋرۋحاناعا جاتقىزىلعاندارعا قويىلعان الدىن الا دياگنوز – ەتيولوگياسى انىقتالماعان گاستروەنتەريت (اسقازان مەن جىڭىشكە ىشەكتىڭ شىرىشتى قابىعىنىڭ قابىنۋى). اۋرۋدىڭ سەبەبىن انىقتاۋ ءۇشىن ناۋقاستاردان جانە تاعام ونىمدەرىنەن زەرتحانالىق سىنامالار الىندى. زەرتتەۋ ناتيجەلەرىن كۇتىپ وتىرمىز», دەپ حابارلادى اكىمدىك.
پاۆلوداردا ءبىر توپ ءبۇلدىرشىن بالاباقشادا ۇشىنىپ, اۋرۋحاناعا ءتۇستى
قازىرگى ۋاقىتتا وبلىستىق سانيتاريالىق-ەپيدەميولوگيالىق باقىلاۋ دەپارتامەنتى مەن اۋداندىق پوليتسيا ءبولىمى تەكسەرۋ جۇرگىزىپ جاتىر. وقيعا ورنىنا وبلىس اكىمىنىڭ ورىنباسارلارى ايجان ەسماعامبەتوۆا مەن سەرىك سالەموۆ باردى.
اۋرۋحاناعا جاتقىزىلعان بالالاردىڭ جاعدايى قاناعاتتانارلىق. لاگەردەگى قالعان بالالار مەديتسينالىق تەكسەرۋدەن ءوتتى, ولاردان اۋرۋ بەلگىلەرى انىقتالعان جوق. جالپى دەمالىس ايماعىندا 103 جاس سپورتشى جانە 13 جاتتىقتىرۋشى بولعان.
ايتا كەتەيىك, 2025 جىلى قازان ايىندا ارقالىقتا تويعا بارعان 85 ادام استان ۋلانىپ, اۋرۋحاناعا تۇسكەن بولاتىن.