پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا مەملەكەت باسشىسىنىڭ ۇلتتىق قۇرىلتايدىڭ V وتىرىسىندا ايتىلعان تاپسىرمالارى شەڭبەرىندە ءبىلىم بەرۋ جانە دەنساۋلىق ساقتاۋ سالالارىن قارجىلاندىرۋ ماسەلەلەرى تۇبەگەيلى قايتا قارالاتىنىن حابارلادى, دەپ جازادى Egemen.kz
ايدا بالاەۆا بۇگىندە ءبىلىم بەرۋ سالاسىندا پيلوتتىق رەجيمدە جەكەمەنشىك مەكتەپتەردى تسيفرلىق ەسەپكە الۋدى, نەگىزگى پروتسەستەردى اۆتوماتتاندىرۋدى جانە قارجى ءبولۋ جۇيەسىمەن سينحرونداۋدى كوزدەيتىن جاڭا تەتىك ەنگىزىلگەنىن اتاپ ءوتتى. ناتيجەسىندە 785 جەكەمەنشىك مەكتەپ تولىق تسيفرلاندىرىلدى.
«بيۋدجەت قاراجاتىن ءتيىمدى ءارى ماقساتتى پايدالانۋ ءۇشىن جاڭا جەكەمەنشىك مەكتەپتەرگە مەملەكەتتىك تاپسىرىستى ورنالاستىرۋعا موراتوري ەنگىزىلەدى. مەملەكەتتىك قارجىلاندىرۋ ەندى تەك وڭىردەگى ناقتى قاجەتتىلىك بار جەكەمەنشىك مەكتەپتەرگە عانا باعىتتالادى. بۇل رەتتە مەملەكەتتىك مەكتەپتەردىڭ بولماۋى, ءۇش اۋىسىمدى وقىتۋدى جويۋ جانە اپاتتى مەكتەپتەردىڭ ورنىنا جاڭا ءبىلىم بەرۋ نىساندارىنىڭ سالىنۋى نەگىزگى باسىمدىق رەتىندە ايقىندالىپ وتىر», دەدى ايدا بالاەۆا.ۆيتسە-پرەمەر ءبىلىم سالاسىنا جەكەمەنشىك ينۆەستيتسيانى تارتۋ ءۇشىن مەملەكەتتىك تاپسىرىسسىز, تەك ينۆەستيتسيالىق شىعىندى وتەۋ مەحانيزمى ساقتالعانىن ايتتى. سونىمەن قاتار وقۋ-اعارتۋ مينيسترلىگى مۇددەلى مەملەكەتتىك ورگاندارمەن بىرلەسىپ, جەكەمەنشىك مەكتەپتەرگە ليتسەنزيادان كەيىنگى باقىلاۋ جۇرگىزەدى. باقىلاۋ اياسىندا ءبىلىم بەرۋ ساپاسىنىڭ ساقتالۋىنا, پەداگوگ كادرلارمەن قامتاماسىز ەتىلۋىنە جانە بالالاردىڭ قاۋىپسىزدىگىنە ەرەكشە نازار اۋدارىلادى.
ۇكىمەت جەكە مەديتسينالىق ۇيىمداردى قارجىلاندىرۋدا كوپتەگەن زاڭبۇزۋشىلىقتاردى انىقتادى
ال دەنساۋلىق ساقتاۋ مينيسترلىگى پرەزيدەنت تاپسىرماسىنا ساي حالىقتىڭ ناقتى قاجەتتىلىكتەرىنە, دەموگرافيالىق جانە كوشى-قون دەرەكتەرىنە سۇيەنە وتىرىپ, مەديتسينالىق كومەكتى جوسپارلاۋعا كوشەدى. قارجىلاندىرۋ كولەمى ەڭ ءتيىمدى مەملەكەتتىك جانە سەنىمدى جەكە ەمحانالارعا باعىتتالادى. جالعان ەسەپتىڭ الدىن الۋ ءۇشىن بىرىڭعاي تسيفرلىق باقىلاۋ ەنگىزىلمەك. تولەمدەر سالىستىرىلىپ, بارلىق قارجىلاندىرۋ كوزىنىڭ مالىمەتتەرى بىرىكتىرىلەدى. ەم الۋشىلارمەن كەرى بايلانىس ءموبيلدى قوسىمشا ارقىلى جۇزەگە اسادى. سونىمەن بىرگە ساپانى باقىلاۋ كۇشەيىپ, ليتسەنزيالاۋ تالاپتارى قاتاڭداتىلادى.
اتالعان شارالار قارجىلاندىرۋ جۇيەسىن ءادىل, اشىق جانە ءتيىمدى ەتۋگە, سونداي-اق حالىقتىڭ دەنساۋلىق ساپاسىن جاقسارتۋعا باعىتتالعان. مىندەتتى الەۋمەتتىك مەديتسينالىق ساقتاندىرۋ جۇيەسى قارجى مينيسترلىگىنە بەرىلدى. قازىر مەملەكەت باسشىسى تاپسىرماسىنا ساي, قۇقىق قورعاۋ ورگاندارىمەن بىرلەسىپ «زاڭ جانە ءتارتىپ» قاعيداتىنا سايكەس تەكسەرۋ ءجۇرىپ جاتىر.
كۇنىنە 150 جالعان پاتسيەنت: ەلوردالىق كلينيكا باسشىسى قور قارجىسىن قالاي جىمقىرعان؟
سونىمەن قاتار جەكە مەديتسينا جانە ءبىلىم بەرۋ ۇيىمدارىن قارجىلاندىرۋ مەحانيزمدەرىن قايتا قاراۋ بويىنشا ءىس-شارالار جوسپارى بەكىتىلدى.