الەۋمەتتىك جەلىدە تورايعىر كولىنىڭ قىسقى كورىنىسى تۋرالى بەينەجازبالار تاراپ جاتىر. ادامدار تابيعاتتىڭ اسەم قويناۋىنداعى كول ۇستىندە كونكي تەۋىپ, العان اسەرلەرىمەن ءبولىستى.
باياناۋىلداعى تورايعىر كولى قىسقى سەرۋەندى ۇناتاتىندار ءۇشىن اشىق اسپان استىنداعى مۇز ايدىنى رەتىندە تاپتىرماس ورىنعا اينالدى. سۋ بەتىندەگى مۇز بىركەلكى قاتقانى سونشالىق, وعان بارىپ كونكي تەبۋدەن ءلاززات العاندار وزدەرىنىڭ اسەرلەرى تۋرالى الەۋمەتتىك جەلىدە جارىسا جاريالاپ جاتىر. مۇنداعى مۇز وتە بەرىك ءارى ءمولدىر.
تورايعىر كولى – جاسىباي دەمالىس ايماعىنا جاقىن جەردە, ايگىلى اقىن سۇلتانماحمۇت تورايعىروۆتىڭ كەسەنەسى جانىندا ورنالاسقان. جازدا كول سۋى بيىك قۇزدى شىڭداردىڭ تۇبىنەن تولقىندانا جارىسا شىعىپ, جاعاعا سوعىلادى. تۇستىك جيەگىندە ۇشكىر باستى بيىك شىڭ نايزاتاس تۇر. اقتار قازاققا قىسىمشىلىق كورسەتكەن تارشىلىق زاماندا بۇل شىڭنىڭ قاتپار تاستارى اراسىنا ساكەن سەيفۋللين جاسىرىنىپ, امان قالعان. كولدىڭ ءبىر شەتىندە اشىق بەتى سۋعا قاراعان ۇڭگىرتاس ۇڭىرەيەدى.
تورايعىردا ەلىمىزدىڭ قىزىل كىتابىنا ەنگەن قىزىلاعاش وسەدى. ەرتەدە اتا-بابامىز قاندىاعاش تالاسا وسكەن تاۋ باۋرايلارىندا بۇلاق بارىن بىلگەن. نەگىزى قازاقستاندا قاندىاعاش باياناۋىل مەن قارقارالىنىڭ تاۋلى-ورماندى القاپتارىندا, ەرەيمەنتاۋ تاۋلارىندا, ەلەك وزەنى جاعالاۋىندا, سونداي-اق قوستاناي وبلىسىنداعى قۇسمۇرىن ماڭىندا كەزدەسەدى, دەيدى جەر جاعدايىن جاقسى بىلەتىندەر. باياناۋىل تاۋلارىنداعى بۇل اعاشتىڭ ءتۇرى قاندى قاندىاعاش تيپىنە جاتادى. قاندىاعاشتى پارك قىزمەتكەرلەرى عىلىمي ينديكاتور رەتىندە پايدالانادى. جازعىتۇرىم تومەننەن جوعارى قاراي گۇلدەسە, جازدىڭ سۋلى, جاڭبىرلى بولاتىنىن بىلدىرەدى. ال كەرىسىنشە, جوعارىدان تومەن قاراي كوكتەسە, الداعى جازدا قۋاڭشىلىق كۇتىپ تۇرعانىن بولجاي بەرۋگە بولادى.
پاۆلودار وبلىسى