مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ V وتىرىسىندا ءسوز سويلەدى. پرەزيدەنت ءوز سوزىندە ۇلتتىق قۇرىلتاي اۋقىمدى رەفورمالاردىڭ نەگىزگى قوزعاۋشى كۇشى بولعانىن اتاپ ءوتتى, دەپ جازادى Egemen.kz.
«وسى رەتتە, ۇلتتىق قۇرىلتاي ايرىقشا ءرول اتقارعانى ءسوزسىز. ءتورت جىلدا قۇرىلتاي مۇشەلەرى ەل ومىرىنە ىقپال ەتەتىن كوپتەگەن ماڭىزدى باستاما كوتەردى. ۇلتتىق قۇرىلتايدا ايتىلعان ۇسىنىستاردىڭ نەگىزىندە 26 زاڭ قابىلداندى. وسىنىڭ ءوزى قۇرىلتاي اۋقىمدى رەفورمالاردىڭ نەگىزگى قوزعاۋشى كۇشى بولعانىن ايقىن كورسەتەدى. ايەلدەردىڭ قۇقىعى مەن بالالاردىڭ قاۋىپسىزدىگىن قامتاماسىز ەتۋ ءۇشىن ناقتى قادامدار جاسالدى. لۋدومانياعا, ياعني ويىنقۇمارلىققا جانە ناشاقورلىققا قارسى بەلسەندى كۇرەس جۇرگىزىلە باستادى. ونوماستيكا سالاسىنداعى جۇمىستار رەتكە كەلتىرىلدى. مەملەكەتتىك ناگرادالار جۇيەسىنە جاڭادان قۇرمەتتى اتاقتار ەنگىزىلدى. سول ارقىلى ەڭبەك ادامدارىنىڭ مارتەبەسى ارتا ءتۇستى.
بۇدان بولەك ءبىز ۇلتتىڭ جاڭا ساپاسىن قالىپتاستىراتىن باستى قۇندىلىقتارىمىزدى ايقىنداپ الدىق. ۇرپاقتىڭ بولاشاعىنا زيانىن تيگىزەتىن كەسەلدەرگە بارىنشا توسقاۋىل قوياتىن بولدىق. قۇرىلتاي مۇشەلەرى وتكەن جىلعى جيىندا ىشكى ساياسات سالاسىن رەتكە كەلتىرۋ تۋرالى باستاما كوتەردى. ءتيىستى قۇجاتتى ازىرلەۋگە وزدەرىڭىز بەلسەنە اتسالىستىڭىزدار.
بىلتىر قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى, قۇندىلىقتارى مەن باعىتتارى بەكىتىلدى. ەندى, وسى قۇجاتتى باسىمدىق رەتىندە قاراپ, بەلسەندى تۇردە ىسكە اسىرۋىمىز كەرەك», دەدى قاسىم-جومارت توقاەۆ.
سونىمەن قاتار پرەزيدەنت نەكە ينستيتۋتىن ەر مەن ايەلدىڭ ەرىكتى وداعى رەتىندە زاڭنامالىق تۇرعىدان بەكىتۋ تۋرالى ويىن ايتتى.
كىسى قولىنان قازا تاپقان نۇرايدىڭ باسىندا بولعان جاعدايعا دا اسا ءمان بەردى.
بۇعان دەيىن قاسىم-جومارت توقاەۆ ارال تەڭىزى ماسەلەسىنە قاتىستى پىكىر ءبىلدىرىپ, ونى ساقتاۋ بۇكىل ادامزات ءۇشىن وزەكتى مىندەت ەكەنىن ايتقان بولاتىن.