تۇركىستان وبلىسى شاردارا اۋدانىندا 70 جاستاعى دەنساۋلىعى ناشار اكەسىن جۇيەلى تۇردە ۇرىپ كەلگەن الماس ساداقباەۆقا قاتىستى سوت ۇكىمى جاريالاندى. سوتتالۋشىعا قاساقانا ورتاشا اۋىرلىقتاعى دەنە جاراقاتىن كەلتىرۋ جانە ازاپتاۋ دەرەگى بويىنشا ايىپ تاعىلعان, دەپ جازادى Egemen.kz.
سوتتا ايىپتالۋشىنىڭ كىناسى كۋاگەرلەردىڭ تۇسىنىكتەمەلەرى, اۋديو-بەينە ماتەريالدار مەن سوت ساراپتامالارىنىڭ قورىتىندىلارىمەن دالەلدەنگەن.
تۇركىستان وبلىستىق سوتى قارياعا كورسەتىلگەن ءزابىر مەن سوققىلاردىڭ ونىڭ ولىمىنە تىكەلەي بايلانىسى جوق ەكەنىن حابارلاپ وتىر.
الماس ساداقباەۆ سوت بارىسىندا ايىبىن مويىنداعان. ال مەملەكەتتىك ايىپتاۋشى سوتتالۋشىنى 6 جىل 2 اي باس بوستاندىعىنان ايىرۋ جازاسىن تاعايىنداۋدى سۇراعان.
ءىستى جۇرگىزگەن سۋديا ايىپتالۋشىنىڭ بۇرىن سوتتى بولماعانىن, كامەلەتكە تولماعان بالالارىنىڭ بارىن جانە ارەكەتىن مويىنداپ, وكىنىش بىلدىرگەنىن ەسكەرىپ, 5 جىل مەرزىمگە باس بوستاندىعىنان ايىرۋ جازاسىن تاعايىندادى.
ۇكىم زاڭدى كۇشىنە ەنگەن جوق.
جاڭاوزەندە ءبىر توپ ءجاسوسپىرىم وقۋشى مەن اكەسىن ۇرعان
ەسكە سالايىق, ايىپتالۋشى بىلتىر تامىز ايىنىڭ وزىندە اكەسىنە 3 رەت فيزيكالىق كۇش قولدانىپ, اسا قاتىگەزدىكپەن دەنساۋلىعىنا زيان كەلتىرگەن. قاريا كوپ ۇزاماي 2025 جىلدىڭ 2-نەن 3-ءشى قىركۇيەگىنە قاراعان ءتۇنى كوز جۇمعان.