الاتاۋ قالاسىندا قۇرىلىس جۇمىستارى باستالدى ما؟

ۇلتتىق ەكونوميكا ۆيتسە-ءمينيسترى باۋىرجان وماربەكوۆ پەن الماتى وبلىسى اكىمىنىڭ ورىنباسارى رۋستام يساتاەۆ پرەمەر-ءمينيستردى الاتاۋ قالاسىنىڭ اۋماعىنداعى ينۆەستيتسيالىق جوبالاردىڭ جۇزەگە اسىرىلۋ بارىسى, قالا قۇرىلىسى مەن ينفراقۇرىلىمدىق جوبالاردى جۇزەگە اسىرۋعا دايىندىق تۋرالى, سونداي-اق ءوڭىردى ەلەكتر ەنەرگياسىمەن قامتاماسىز ەتۋ, ونىڭ ىشىندە قاجەتتىلىكتەردى ەسكەرە وتىرىپ جاڭا وندىرىستەردى ىسكە قوسۋ بويىنشا اتقارىلىپ جاتقان جۇمىستاردى باياندادى.

ۇلتتىق ەكونوميكا مينيسترلىگىنىڭ مالىمەتىنشە, بۇگىندە الاتاۋدىڭ باس جوسپارىنا تۇزەتۋ ەنگىزىلىپ, ينجەنەرلىك جەلىلەردىڭ سالالىق سحەمالارى, ەگجەي-تەگجەيلى جوسپارلاۋ جوبالارى جانە ينفراقۇرىلىمدىق دامۋدىڭ جول كارتاسى بەكىتىلدى. جول كارتاسىنىڭ ءبىرىنشى كەزەڭى اياسىندا 365,1 ملرد تەڭگە سومانى قۇرايتىن 21 جوبانى جۇزەگە اسىرۋ كوزدەلگەن. 2026-2027 جىلدارى قوسالقى ستانسالاردى, سۋ جيناۋ تورابىن جانە گاز قۇبىرلارىمەن قاتار, ينجەنەرلىك ينفراقۇرىلىمنىڭ قولدانىستاعى نىساندارىن رەكونسترۋكتسيالاۋ مەن جاڭا وبەكتىلەر سالۋ جوسپارلانعان. 2028-2030 جىلدارداعى ەكىنشى كەزەڭدە قۇنى – 312,5 ملرد تەڭگە بولاتىن 9 جوبا جۇزەگە اسىرىلادى. ونىڭ ىشىندە ەكى قوسالقى ستانسا, اۆتوماتتاندىرىلعان گاز تاراتۋ ستانساسى بار گاز قۇبىرى, كارىز تازارتۋ جانە 49 شاقىرىم اۆتوموبيل جولدارىنىڭ قۇرىلىسى قامتىلادى.

پرەزيدەنت الاتاۋ قالاسىنا ارناۋلى مارتەبە بەرۋ تۋرالى جارلىققا قول قويدى

تۇتاستاي العاندا, 2050 جىلعا دەيىن ينۆەستيتسيالاردىڭ جالپى كولەمى 10,4 ترلن تەڭگە دەڭگەيىندە ينفراقۇرىلىمدىق جوبالار پۋلى قالىپتاستىرىلعان, ونىڭ 3,1 ترلن تەڭگەسىن 2030 جىلعا دەيىن جۇزەگە اسىرۋ جوسپارلانىپ وتىر. ينفراقۇرىلىمدى دامىتۋ بيۋدجەت قاراجاتى ەسەبىنەن عانا ەمەس, سونىمەن قاتار جەكە ينۆەستيتسيالار مەن EPC-كەلىسىمشارتتاردى تارتا وتىرىپ قامتاماسىز ەتىلەدى.

سونداي-اق ولجاس بەكتەنوۆكە الداعى ۋاقىتتا تارتىلاتىن ينۆەستيتسيالار تۋرالى دا اقپارات ۇسىنىلدى. بۇگىندە جالپى قۇنى – 1,5 ترلن تەڭگە بولاتىن 32 ينۆەستيتسيالىق جوبا قالىپتاستىرىلدى. اتالعان جوبالاردىڭ 20-سى بەلسەندى جۇزەگە اسىرۋ ساتىسىندا, ونىڭ 8-ءى – لوگيستيكا, التاۋى – قۇرىلىس جانە ونەركاسىپ, ۇشەۋى – تۋريزم, تاعى ءبىر ۇشەۋى – تاماق ونەركاسىبى سالاسىن قامتيدى. بۇل جوبالاردى جۇزەگە اسىرۋ شامامەن 1,2 ترلن تەڭگە ينۆەستيتسيا تارتۋعا جانە 22 مىڭنان استام جۇمىس ورنىن اشۋعا مۇمكىندىك بەرەدى.

الاتاۋ قالاسىندا اۋە تاكسي قىزمەتى ىسكە قوسىلادى

Iconic Towers جوباسىنا ارنايى نازار اۋدارىلدى. ونى سالۋ تۋرالى كەلىسىمگە 2025 جىلدىڭ قىركۇيەگىندە مەملەكەت باسشىسىنىڭ قىتايعا مەملەكەتتىك ساپارى اياسىندا قول قويىلعان بولاتىن. ينۆەستيتسيا كولەمى 800 ملن دوللاردان اسادى. ارحيتەكتۋرالىق تۇجىرىمدامانى ازىرلەۋ ءۇشىن امەريكالىق SOM كومپانياسى تارتىلدى. كەشەننىڭ جالپى اۋدانى 276,8 مىڭ شارشى مەتردى قۇرايدى جانە وعان ەكى مۇنارا, كەڭسەلەر, پاتەرلەر, قوناق ءۇي مەن ساۋدا ورىندارى كىرەدى. جوبالىق-سمەتالىق قۇجاتتامانى ازىرلەۋدى 2027 جىلدىڭ ساۋىرىنە دەيىن اياقتاۋ جوسپارلانىپ وتىر. قۇرىلىس جۇمىستارىن بيىل مامىر ايىندا باستاپ, 2029 جىلدىڭ سوڭىنا دەيىن اياقتاۋ جوسپارلانعان.

الاتاۋ قالاسىنىڭ ساۋلەتى ادام يگىلىگىنە قولايلى, بيزنەس ءۇشىن ىڭعايلى بولۋى كەرەك

الاتاۋ قالاسىنىڭ جوبالارىن جۇزەگە اسىرۋعا بايلانىستى الماتى وبلىسىندا ەلەكتر ەنەرگياسىن ورتاشا تۇتىنۋ كولەمى ءوسىپ كەلەدى: قازىر ول – 750-800 مۆت-تى قۇرايدى. بۇل رەتتە 2030 جىلعا قاراي بولجامدى ءوسىم – 2 064 مۆت, 2050 جىلعا قاراي – 4 164 مۆت بولۋى مۇمكىن دەپ باعالانىپ وتىر. قولدانىستاعى قۋات كوزدەرىنىڭ تاپشىلىعى قوسالقى ستانسالار قۇرىلىسى مەن رەكونسترۋكتسياسىن تالاپ ەتىپ وتىر. ۇكىمەت قازىردىڭ وزىندە 15 قوسالقى ستانسا سالۋ تۋرالى شەشىم قابىلدادى, بۇل جاڭا ترانسفورماتورلىق قۋات كولەمىن ىسكە قوسۋعا جانە ينۆەستورلاردى ەلەكتر ەنەرگياسىمەن قامتاماسىز ەتۋگە مۇمكىندىك بەرەدى.

الاتاۋ قالاسى بويىنشا بەكىتىلگەن جول كارتاسى اياسىندا شامامەن قۇنى – 162 ملرد تەڭگە بولاتىن تاعى 11 قوسالقى ستانسا سالۋ جانە رەكونسترۋكتسيالاۋ كوزدەلگەن. بۇل – قالانىڭ تۇراقتى دامۋى مەن ينۆەستيتسيالىق جوبالاردى جۇزەگە اسىرۋدىڭ نەگىزگى شارتى.

«ينفراقۇرىلىم ارقاشان وزىق قارقىنمەن دامۋى كەرەك, بىراق ءبىز ءسال كەشىگىپ كەلەمىز. جالپى مۇنداي ماسەلە ەلىمىز بويىنشا بار. قازىر پرەزيدەنت بۇعان ۇلكەن كوڭىل ءبولىپ جاتىر. مەملەكەت باسشىسىنىڭ تاپسىرماسى بويىنشا ۇكىمەت قاجەتتى قاراجاتتى ءبولدى. ءبىز مەملەكەتتىك قارجىنى تۇراقتاندىرۋ ءۇشىن سالىق رەفورماسىن جۇرگىزدىك. بۇل قاراجات بىزگە ينفراقۇرىلىمعا سالۋ ءۇشىن قاجەت. بۇل اقشا ەشقايدا كەتپەيدى, تىكەلەي ەكونوميكاعا سالىنادى. ەگەر مەملەكەت ينفراقۇرىلىمعا ينۆەستيتسيا سالسا, وندا ينۆەستورلاردىڭ سەنىمى ارتىپ, ەلىمىزگە كەلە باستايدى. دامۋ وسىدان باستالادى. باسقا جول جوق. سوندىقتان, ءبىز ينۆەستيتسيا سالامىز جانە وسى جىلدان باستاپ بيۋدجەتتىڭ مۇمكىندىكتەرى باسقاشا بولادى. بىرگە جۇمىس ىستەيتىن بولامىز», دەدى ولجاس بەكتەنوۆ.

ۇكىمەت بارلىق قولداۋ شارالارىن كورسەتىپ جاتىر. قازىرگى ۋاقىتتا قالا ارنايى مارتەبەگە جانە قوسىمشا ينستيتۋتسيونالدىق جاعدايلارعا يە. ولجاس بەكتەنوۆ جەرگىلىكتى اتقارۋشى ورگانداردىڭ نازارىن قالانى دامىتۋ جونىندەگى جۇمىستى كۇشەيتۋ قاجەتتىگىنە اۋداردى. پرەزيدەنت بەلگىلەگەن مىندەتتەر شەڭبەرىندە الاتاۋ بۇگىندە ىسكەرلىك بەلسەندىلىك پەن يننوۆاتسيانىڭ جاڭا ورتالىعى رەتىندە قالىپتاسىپ كەلەدى. سوندىقتان قالانىڭ ساۋلەتى ادام يگىلىگىنە قولايلى جانە بيزنەس ءۇشىن ىڭعايلى بولۋى ءتيىس. وسىعان بايلانىستى Alatau City Authority قورى مەن الماتى وبلىسىنىڭ اكىمدىگىنە ينجەنەرلىك جانە الەۋمەتتىك ينفراقۇرىلىمدى دامىتۋ, ينۆەستيتسيالار تارتۋ, يندۋستريالىق, لوگيستيكالىق جانە يننوۆاتسيالىق جوبالاردى جۇزەگە اسىرۋ ءۇشىن قولايلى جاعدايلار جاساۋ ماسەلەلەرىن قاراستىرا وتىرىپ, قالانى دامىتۋ بويىنشا مەملەكەتتىك قولداۋدىڭ جان-جاقتى شارالارىن قابىلداۋ تاپسىرىلدى.

الاتاۋ – زاماناۋي ۋربانيستيكا ۇردىسىندەگى شاھار

تاماق ونەركاسىبى سالاسىندا ولجاس بەكتەنوۆ ينۆەستيتسيالارىنىڭ جالپى كولەمى شامامەن 360 ملن دوللار بولاتىن PepsiCo Central Asia اۋقىمدى جوباسى بويىنشا جۇمىستاردىڭ قارقىنىمەن تانىستى. جوبا ەكى كەزەڭمەن جۇزەگە اسىرىلىپ جاتىر جانە قوسىلعان قۇننىڭ جاڭا تىزبەگىن قالىپتاستىرۋعا, اگروونەركاسىپتىك كووپەراتسيانى دامىتۋعا, اۋىل شارۋاشىلىعى ونىمدەرىن ساقتاۋ مەن وڭدەۋدىڭ زاماناۋي تەحنولوگيالارىن ەنگىزۋگە باعىتتالعان. 900-گە دەيىن جۇمىس ورنىن قۇرۋ جوسپارلانعان, كاسىپورىننىڭ وندىرىستىك قۋاتى – 21 مىڭ توننانى قۇرايدى.

پرەمەر-مينيستر الاتاۋ قالاسىندا «Mars Petcare Kazakhstan» جشس-ءنىڭ ءۇي جانۋارلارىنا ارنالعان دايىن ازىق ءوندىرۋ زاۋىتىنا باردى. وندىرىستەردى لوكاليزاتسيالاۋ جانە قايتا وڭدەۋ ونەركاسىبىن دامىتۋ ساياساتى شەڭبەرىندە جۇزەگە اسىرىلىپ جاتقان جوبا جىلدىڭ ورتاسىندا باستالادى.