ەلىمىزدىڭ ستراتەگيالىق «قاۋىپسىزدىك جاستىعى» سانالاتىن ۇلتتىق قوردىڭ جاي-كۇيى تۋرالى كەزەكتى ەسەپ جاريالاندى. 2026 جىلدىڭ 1 قاڭتارىنداعى مالىمەتكە سايكەس, قوردىڭ جيىنتىق اكتيۆتەرى 77,77 ملرد دوللاردى قۇرادى, دەپ حابارلايدى Egemen.kz.
رەسمي مالىمەتكە سۇيەنسەك, 2025 جىلدىڭ باسىندا ۇلتتىق قوردىڭ جالپى اكتيۆتەرى 29,85 ترلن تەڭگەنى قۇراعان. ەسەپتى كەزەڭدە قور قورجىنى 3,84 ترلن تەڭگەمەن تولىعىپ, ودان 5,95 ترلن تەڭگە جۇمسالعان. وسىلايشا, قوردان الىنعان قاراجات كولەمى تۇسىمنەن 2,1 ترلن تەڭگەگە ارتىق بولىپ وتىر.
ۇلتتىق قوردىڭ بيىلعى ينۆەستيتسيالىق كىرىسى بەلگىلى بولدى
تۇسىمدەردىڭ نەگىزگى وزەگىن, ءداستۇرلى تۇردە, مۇناي سەكتورى ۇيىمدارىنان تۇسەتىن تىكەلەي سالىقتار قۇرادى. ونىڭ كولەمى – 3,81 ترلن تەڭگە. سالىقتىق تۇسىمدەردىڭ قۇرىلىمىنا ۇڭىلسەك, كورپوراتيۆتىك تابىس سالىعىنان 1,27 ترلن تەڭگە, ءونىمدى ءبولۋ بويىنشا قازاقستاننىڭ ۇلەسىنەن 1,20 ترلن تەڭگە تۇسكەن. سونداي-اق پايدالى قازبالاردى ءوندىرۋ سالىعى 680,9 ملرد تەڭگەنى, ەكسپورتقا سالىناتىن رەنتا سالىعى 442,1 ملرد تەڭگەنى قۇرادى. ال جەر قويناۋىن پايدالانۋشىلاردىڭ قوسىمشا تولەمدەرى 180 ملرد تەڭگەگە جەتسە, بونۋستار مەن ارتىق پايدا سالىعىنان تۇسكەن قارجى 38 ملرد تەڭگەدەن اسپادى.
ۇكىمەت الداعى كەزەڭگە ناقتى ستراتەگيالىق مىندەتتەر جۇكتەپ وتىر. جاڭا سالىق رەفورماسىنىڭ اياسىندا 2026-2028 جىلدار ارالىعىندا ۇلتتىق قوردان الىناتىن قاراجات كولەمىن جىلىنا 2,6 تريلليون تەڭگەدەن اسىرماي شەكتەۋ جوسپارلانعان. بۇل قادام بيۋدجەتتىڭ ۇلتتىق قورعا تاۋەلدىلىگىن تومەندەتىپ, جيناقتاۋ فۋنكتسياسىن كۇشەيتۋگە باعىتتالعان. ەكى جىلدا 28 ملن دوللار يگەرىلدى: ازاماتتار ۇلتتىق قور قاراجاتىن قالاي جۇمساپ جاتىر؟ مەملەكەت باسشىسىنىڭ العا قويعان باستى ماقساتى – 2030 جىلعا قاراي ۇلتتىق قور اكتيۆتەرىن 100 ملرد دوللارعا جەتكىزۋ. قازىرگى قارقىن مەن قابىلدانعان فيسكالدىق شارالار وسى مەجەگە سەنىممەن جەتۋگە نەگىز قالاپ وتىر.