جاقىندا جاپونيانىڭ كيشي تەمىرجول ستانساسىنىڭ باستىعى رەتىندە يونتاما ەسىمدى مىسىق تاعايىندالدى. سىرت كوزگە بۇل ءۇردىس ەرىككەننىڭ ەرمەگى سەكىلدى كورىنەتىنى راس. بىراق بۇنىڭ دا پايدالى تۇستارى بارشىلىق ەكەن.
بىزگە تاڭسىق كورىنگەنىمەن, بۇل ءداستۇر جاپونيادا 2006 جىلى باستالعان. سول ۋاقىتتا تەمىرجول كومپانياسى تۋريستەردى تارتۋ ماقساتىندا تاما ەسىمدى مىسىقتى ساندەپ كيىندىرىپ, جولاۋشىلاردى قارسى الۋ مىندەتىن جۇكتەگەن. وسى ءبىر ماركەتينگتىك ءتاسىل شاعىن بەكەتكە كەلۋشىلەر سانىن كۇرت كوبەيتىپ, جەرگىلىكتى ەكونوميكاعا 1 ملرد يەننەن استام پايدا اكەلگەن. وسىلايشا, «Wakayama Electric Railway» كومپانياسى قىمبات جارناماعا جۇگىنبەي-اق, كرەاتيۆتى قادام ارقىلى ەل نازارىن اۋدارىپ, كىرىستى ارتتىرۋعا بولاتىنىن دالەلدەدى.