تاشكەنت بازارلارىنىڭ بىرىندە جىلدار بويى كىتاپ ساتىپ كۇن كورگەن اجەي ءبىر كۇنى «زاتتارىڭىزدى ەكى-ءۇش كۇننىڭ ىشىندە جيناپ, ساۋدا ورنىڭىزدى بوساتىڭىز» دەگەن رەسمي حابار الادى. كۇندەلىكتى تىرلىگى كىتاپپەن بايلانىستى جان ءۇشىن بۇل جاڭالىقتىڭ قالاي اسەر ەتكەنى ايتپاسا دا تۇسىنىكتى. وسى ءساتتى جاناشىر ءبىر ازامات بەينەجازباعا ءتۇسىرىپ, الەۋمەتتىك جەلىگە جاريالاپ جىبەرگەن ەكەن.
جەلىدە تاراعان بەينەجازبانى كورگەن جۇرت اجەيدى ىزدەپ كەلىپ, قولىنداعى بارىن كەزەك-كەزەك ساتىپ الا باستايدى. ارينە, حالىقتا «كەرەك بولىپ تۇر» دەگەننەن گورى, «قولداۋ بىلدىرەيىن» دەگەن نيەت باسىم ەدى.
ەڭ عاجابى, كەشكە قاراي ءبىر ازامات كەلىپ, اجەيدىڭ دۇكەنىندەگى كىتاپتىڭ ءبارىن تۇگەل ساتىپ الادى. جۇك كولىگىنە ازەر سىيعان مۇنشا كىتاپتىڭ باعاسى ارزان بولماعانى انىق. بىراق ول جىگىت «اجەي ۇيىنە اۋىر قاپ ارقالاپ قايتپاسىن, ەرتەڭگى كۇنى نە بولارىن ۋايىمداماسىن» دەگەن ويمەن وسىلاي جاساعان.
كەيۋانا ءۇشىن ول كۇنگى ەڭ ۇلكەن ولجا اقشا ەمەس ەدى. ەڭ باستىسى – «مەن دە بىرەۋگە كەرەكپىن», دەگەن سەزىم. كوپتىڭ ىشىندە ەلەۋسىز قالماي, جۇرتتىڭ جاناشىر نيەتىن كوردى. ءبىر ادامنىڭ مۇڭى ەلدىڭ جۇرەگىنە جەتكەنىن ۇققان ءسات – ونىڭ ەڭ ۇلكەن جۇبانىشى, ەڭ قىمبات قۋانىشى بولدى.
ءبىر قاراعاندا, بۇل جاي عانا بازارداعى ساۋدا ماسەلەسى سياقتى. ءبىر ورىن بوسايدى, ءبىر ادام كەتەدى. الايدا وسى جولى قوعام ء«بىر ادامنىڭ تاعدىرى ءبارىبىر ەمەس» ەكەنىن جۇمىلا ءجۇرىپ, ءىس جۇزىندە كورسەتتى. كوپشىلىك اجەيدى اياعاندىقتان ەمەس, قۇرمەتتەگەندىكتەن كەلدى. وسىلايشا, جىلدار بويى كىتاپ ساتىپ, ءوز كۇنىن كورگەن جاننىڭ ەڭبەگىنە قۇرمەت كورسەتتى.