تسەمەنت ونەركاسىبى ەل ءوندىرىسىنىڭ دامۋىنا ەرەكشە سەرپىن بەرىپ وتىر. بىلتىرعى 11 ايداعى كورسەتكىش بويىنشا تسەمەنت ءوندىرىسىنىڭ كولەمى 13,07 ملن تونناعا جەتىپ, بۇل سالانىڭ بۇكىل دامۋ تاريحىنداعى ەڭ جوعارى ءوسىم رەتىندە تىركەلدى.
ساۋدا جانە ينتەگراتسيا مينيسترلىگى 2025 جىلى تسەمەنت پەن پورتلاندتسەمەنت كلينكەرىن ءوندىرۋدىڭ تەحنولوگيالىق رەگلامەنتىنە قويىلاتىن تالاپتاردى ايقىندايتىن ۇلتتىق ستاندارتتى بەكىتكەن ەدى. مينيسترلىكتىڭ حابارلاۋىنشا, تسەمەنت ونىمدەرىنىڭ سايكەستىگىن ءراستايتىن راسىمدەر مەن ونىڭ تەحنولوگيالىق ۇدەرىستەرىنە سيپاتتاما بەرەتىن بىرىڭعاي تاسىلدەر ەنگىزىلگەن. وسىلايشا, تسەمەنت ونىمدەرىن سەرتيفيكاتتاۋدىڭ ۇلتتىق جۇيەسىن جەتىلدىرۋدىڭ ارقاسىندا سالا بۇرىن-سوڭدى بولماعان رەكوردتىق كورسەتكىشكە قول جەتكىزگەن.
ۇلتتىق ستاندارت «سايكەستىكتى باعالاۋ. تسەمەنت پەن پورتلاندتسەمەنت كلينكەرىنىڭ سايكەستىگىن راستاۋ ءتارتىبى» تالاپتارىن ەسكەرە وتىرىپ ازىرلەنگەن. بۇل قۇجات تسەمەنتتەردى سەرتيفيكاتتاۋ قاعيدالارىنا سايكەس كەلەدى, مەملەكەتتىك ستاندارتتار تالاپتارىمەن دە ۇيلەسەدى.
«تسەمەنت ونەركاسىبى – قۇرىلىس سالاسىنىڭ نەگىزگى بازالىق سەكتورلارىنىڭ ءبىرى جانە ەلدىڭ ينفراقۇرىلىمدىق دامۋىنا تىكەلەي اسەر ەتەدى. وندىرىلەتىن تسەمەنتتىڭ ساپاسى مەن تۇراقتىلىعى تەحنولوگيالىق پروتسەستەردىڭ قاتاڭ ساقتالۋىنا تىكەلەي بايلانىستى. ستاندارتتالعان تەحنولوگيالىق رەگلامەنتتى ەنگىزۋ ءوندىرىستى جۇيەلەۋگە, تەحنولوگيالىق پروتسەستەردىڭ باسقارىلۋىن كۇشەيتۋگە ءارى ءونىم ساپاسىنىڭ تۇراقتى دەڭگەيىن قامتاماسىز ەتۋگە مۇمكىندىك بەرەدى», دەلىنگەن مينيسترلىك حابارلاماسىندا.
ۇلتتىق ستاندارتتى قابىلداۋ وسى سالانىڭ دامۋىنا كەدەرگى كەلتىرىپ كەلگەن بىرقاتار جۇيەلى ماسەلەنى شەشۋگە ىقپال ەتكەن. اتاپ ايتقاندا, تەحنولوگيالىق رەگلامەنتتەردىڭ مازمۇنى مەن راسىمدەلۋىنە قويىلاتىن نورماتيۆتىك تالاپتاردىڭ بولماۋى, ءونىم ساپاسىنا, ەنەرگيا تيىمدىلىگىنە, ەكولوگيالىق قاۋىپسىزدىككە قويىلاتىن تالاپتاردىڭ كۇشەيۋى, سونداي-اق وندىرىستىك تاۋەكەلدەردى تومەندەتۋ قاجەتتىلىگى – وسى قۇجاتتى ازىرلەۋگە باستى سەبەپ بولعان.
بۇل تەحنولوگيالىق رەگلامەنت تسەمەنت پەن پورتلاندتسەمەنت كلينكەرىنىڭ سايكەستىگىن راستاۋ راسىمدەرىنەن ءوتۋ كەزىندە مىندەتتى تۇردە ۇسىنىلاتىن قۇجات بولىپ ەسەپتەلەدى. «ۇلتتىق ستاندارتتى ەنگىزۋدىڭ ەكونوميكالىق تيىمدىلىگى كوپ. بۇل وندىرىستىك پروتسەستەردىڭ تۇراقتىلىعىن ارتتىرىپ, ءونىم ساپاسىنىڭ بىركەلكىلىگىن ساقتاۋعا, وتاندىق تسەمەنت ونىمدەرىنىڭ ساپاسىن ارتتىرۋعا مۇمكىندىك بەرەدى», دەيدى مينيسترلىك وكىلدەرى.
سايكەستىكتى باعالاۋ جۇيەسىن دامىتۋ تاجىريبەسى قازىردىڭ وزىندە ءوزىنىڭ تيىمدىلىگىن ءىس جۇزىندە دالەلدەپتى. 2019 جىلى ست رك 3361-2022 ۇلتتىق ستاندارتى ەنگىزىلگەننەن كەيىن ەلىمىزدە جاسىرىن يمپورت كولەمى ايتارلىقتاي قىسقارىپ, تسەمەنت ءوندىرىسىنىڭ كورسەتكىشتەرى رەكوردتىق دەڭگەيگە جەتكەن. سالانىڭ بىلتىرعى تاريحي جەتىستىگى – سونىڭ ءبىر دالەلى.
«جاڭا ۇلتتىق ستاندارتتى ەنگىزۋ تسەمەنت ونىمدەرىنىڭ ساپاسىن باقىلاۋعا دا سەپتىگىن تيگىزبەك. سالاداعى ءادىل باسەكەلەستىكتى ورنىقتىرىپ, وتاندىق ءوندىرىستىڭ تۇراقتى ءوسۋىن قامتاماسىز ەتەدى.
تسەمەنت ونەركاسىبى بۇل ستاندارتتى ەنگىزۋگە ءىس جۇزىندە تولىق دايىن», دەيدى مينيسترلىك. جاڭا ستاندارت وندىرۋشىلەرگە دە اسا قيىندىق تۋعىزبايتىنىن مالىمدەگەن مينيسترلىك ونەركاسىپتىڭ دامۋىنا بايلانىستى جۇمىستار ءارى قاراي دا جالعاسىن تاباتىنىن جەتكىزدى.