جەلىدە جارىسقان مۇعالىمدەر

اتالعان سايىس ءتورتىن­شى جىل قاتارى­نان ۇيىم­داستىرىلىپ وتىر. جەلىدەگى جارىسقا ءبىلىم ۇدەرىسىندە تسيفرلىق فورماتتاردى قولداناتىن مەكتەپ, كوللەدج جانە جوعارى وقۋ ورىندارىنىڭ وقىتۋشىلارى قاتىسقان. ءتورت جىل ىشىندە «TikTok» پلاتفورماسىندا شامامەن 100 مىڭعا جۋىق تانىمدىق بەينەروليك جاريالانعان.

ۇيىمداستىرۋشىلاردىڭ اي­تۋىنشا, مۇعالىم وقۋشىعا ءبىلىم بەرۋ ءۇشىن اۋەلى ونىڭ قىزى­عۋشىلىعىن وياتۋى ماڭىزدى. سوندىقتان جەتكىنشەكتى جەتەكتەگەن جەلىدە قىزىقتى ءھام پايدالى كونتەنتتىڭ وتە-موتە كوپ بولعانى دۇرىس.

بايقاۋ قورىتىندىسى بو­يىنشا جەڭىمپاز اتانعاندار­دىڭ ءبىرى – تاراز قالاسىنداعى نازارباەۆ زياتكەرلىك مەكتەبى­نىڭ فيزيكا ءپانى مۇعالىمى ميرلان جۋسانباەۆ. ول ءوز بەينەجازبا­سىندا كۇردەلى فيزيكالىق قۇبىلىستاردى قاراپايىم تىل­مەن جەتكىزىپ, ونى تاجىريبە مەن كوزگە بىردەن تۇسەتىن ۆيزۋالدى مىسالدار ارقىلى ناقتىلاپ كور­سەتەدى. وسىنداي ءتاسىل ونىڭ اۋدي­تورياسىنا, اسىرەسە وقۋشىلار مەن ستۋدەنتتەرگە, عىلىمدى «قيىن» دەپ قابىلداماي, پانگە قىزىعۋشىلىقپەن ءارى جاڭا قى­رى­نان قاراۋعا كومەكتەسەدى.

جەلىدەگى جارىستا ەرەكشە كوزگە تۇسكەن تاعى ءبىر قاتىسۋشى – شىمكەنت قالاسىنداعى №25 مەكتەپ-گيمنازياسىنىڭ ماتەماتيكا ءپانىنىڭ مۇعالىمى ءمادي رايىمبەك. ول قازاق تىلىندەگى قىسقا روليكتەرىندە لوگيكالىق ەسەپتەر مەن كۇردەلى تاپسىرمالاردى شەشۋدىڭ ءادىس-تاسىلدەرىن كەزەڭ-كەزەڭىمەن, تۇسىنىكتى تىلمەن جەتكىزگەن. مۇنداي كونتەنت وقۋشىلاردىڭ اناليتيكالىق ويلاۋىن شىڭداپ, باقىلاۋ جۇمىستارى مەن ەمتيحانعا دايىندىق بارىسىندا ناقتى پايداسىن تيگىزەدى.

«TikTok»-تاعى تاعىلىمدى تارتىستا وزا شاپقان ءۇشىنشى جەڭىمپاز – تالدىقورعان قالا­سىنداعى نازارباەۆ زيات­كەرلىك مەكتەبىنىڭ حيميا ءپانى مۇعا­لىمى اسەم راحيموۆا. پەدا­گوگ حيمياداعى كۇردەلى تاقى­رىپتاردى مۋزىكامەن ۇش­تاستىرىپ, كرەاتيۆتى مازمۇندا تۇسىندىرۋىمەن ەرەكشەلەنەدى. ول حيميالىق بايلانىستىڭ نەگىزگى ۇعىمدارىن قاراپايىم تىلمەن جەتكىزىپ, بازانى دۇرىس مەڭگەرسەڭ, كەز كەلگەن رەاك­تسيانىڭ ىشكى لوگيكاسىن تۇسىنۋگە بولاتىنىن ناقتى مىسالدار ارقىلى دالەلدەيدى.

بايقاۋ ناتيجەسىندە ءار اتا­لىمنىڭ جەڭىمپازىنا iPhone 17 سمارتفونى سىيعا بەرىلدى. اتالعان سايىس «TikTok» پلاتفورماسىندا تاعىلىمدى كونتەنت­تىڭ سانىن كوبەيتىپ قويعان جوق, ۇستازداردىڭ شىعارماشىلىعىن شىڭداپ, وقىتۋدى جاڭاشا ماز­مۇندا ۇسىنۋعا مۇمكىندىك بەردى. وسىنداي باستامالار ءبىلىم مەن تەحنولوگيانى توعىستىرىپ, جاس ۇرپاقتىڭ پانگە دەگەن قىزى­عۋ­شىلىعىن ارتتىراتىنى انىق.