شىمكەنت قالاسىندا پارلامەنت ءماجىلىسىنىڭ دەپۋتاتتارى, «AMANAT» پارتياسى فراكتسياسىنىڭ مۇشەلەرى دانابەك يسابەك پەن نۇرسۇلتان بايتىلەسوۆ جەرگىلىكتى جاستارمەن كەزدەستى, دەپ جازادى Egemen.kz.
جۇزدەسۋ بارىسىندا ءماجىلىس دەپۋتاتى د.يسابەك پارلامەنتتە اتقارىلىپ جاتقان جۇمىستارعا توقتالىپ, جاستارعا قاتىستى زاڭنامالىق باستامالار مەن قابىلدانعان شەشىمدەر جونىندە قىسقاشا بايانداپ بەردى. ونىڭ ايتۋىنشا, جاستاردى قولداۋ, ولاردىڭ الەۋمەتتىك جانە كاسىبي دامۋىنا جاعداي جاساۋ – مەملەكەت ساياساتىنىڭ باسىم باعىتتارىنىڭ ءبىرى.
«پارلامەنتتە قابىلدانىپ جاتقان زاڭدار ەڭ الدىمەن حالىقتىڭ, سونىڭ ىشىندە جاستاردىڭ ءومىر ساپاسىن جاقسارتۋعا باعىتتالعان. جاستاردىڭ ۇسىنىس-پىكىرلەرى ءاردايىم نازاردا تۇسپەيدى», دەدى ول.
جيىن بارىسىندا بەلسەندى جاستار بىرقاتار وزەكتى ماسەلەلەر كوتەردى. اتاپ ايتقاندا, «جاستار پراكتيكاسى» مەملەكەتتىك باعدارلاماسى اياسىندا العاش رەت جۇمىسقا ورنالاسقان جاستارعا تولەنەتىن قارجى كولەمىنىڭ تومەن ەكەنى ايتىلىپ, ونى ارتتىرۋعا ىقپال ەتۋدى سۇرادى. سونىمەن قاتار, جاستاردى كاسىپكەرلىككە باۋلۋ, ءوز ءىسىن باستاۋعا قولداۋ كورسەتۋ باعىتىنداعى جۇمىستاردى كۇشەيتۋ جايى ءسوز بولدى.
الماتى وبلىسىندا NEET ساناتىنداعى جاستار سانى ازايعان
ءوز كەزەگىندە قالا اكىمىنىڭ ورىنباسارى سارسەن قۇرانبەك جاڭادان قۇرىلعان جاستار باسقارماسىنىڭ جۇمىسىنا توقتالىپ, الداعى ۋاقىتتا جاستارعا قاتىستى جوبالار مەن باستامالاردىڭ جۇيەلى تۇردە جۇزەگە اسىرىلاتىنىن مالىمدەدى.
كەزدەسۋ سوڭىندا جاستار وسىنداي اشىق فورماتتاعى باسقوسۋلاردىڭ ءجيى ءوتۋى ماڭىزدى ەكەنىن ايتىپ, حالىق قالاۋلىلارىنا ءوز ۇسىنىستارىن تىكەلەي جەتكىزۋگە مۇمكىندىك جاساعاندارى ءۇشىن العىستارىن ءبىلدىردى.